បារាំង -

អត្ថបទចុះផ្សាយនៅថ្ងៃ អាទិត្យ 22 មេសា 2012 - ព័ត៌មានទើបកែប្រើលើកចុងក្រោយ ថ្ងៃ អាទិត្យ 22 មេសា 2012

ការបោះឆ្នោតជ្រើសរើសប្រធានាធិបតីបារាំងជុំទីមួយ

បេក្ខជនប្រធានាធិបតីបារាំងឆ្នាំ២០១២ ទាំង១០រូប

ដោយ អៀង សុខម៉ិញ

ការិយាល័យបោះឆ្នោត នៅទូទាំងប្រទេស បានបើកទ្វារ តាំងពី ម៉ោង៨ព្រឹកដល់ម៉ោង៨ល្ងាច នៅតាមទីក្រុងទីប្រជុំជនធំៗ និងម៉ោង៦ល្ងាចនៅតាមភូមិ ទទួលបណ្តាជនបារាំងប្រមាណ៤៥លាននាក់ ឱ្យមកបោះឆ្នោតជ្រើសរើសប្រធានាធិបតី។ នៅក្នុងឆ្នាំ ២០១២ បេក្ខជនឈរឈ្មោះសរុបមាន១០រូប។ ការបោះឆ្នោតជុំទីពីរនឹងប្រព្រឹត្តទៅនៅថ្ងៃទី៦ឧសភា។

សេចក្តីអត្ថាធិប្បាយរបស់ អៀង សុខម៉ិញ

ស្តាប់ (07:09)

22/04/2012

បេក្ខជនដែលចូលមកប្រកួតប្រជែង ក្នុងសម័យបោះឆ្នោតជ្រើសរើសប្រធានាធិបតីបារាំង ឆ្នាំ២០១២ មាន១០រូប ៖

- ប្រធានាធិបតីផុតអាណត្តិ លោក នីកូឡា សាកូហ្ស៊ី អាយុ៥៧ឆ្នាំ ម្តាយឪពុកមានដើមកំណើតបរទេស ជនជាតិហុងគ្រី។ លោកបានជាប់ឆ្នោតជាប្រធានាធិបតីបារាំង កាលពីឆ្នាំ២០០៧។ លោក នីកូឡា សាកូហ្ស៊ី ឈរឈ្មោះជាថ្មី-ជាបេក្ខជនប្រធានាធិបតី របស់បក្សស្តាំនិយម UMP នេះ ក្នុងខណៈដែលប្រជាប្រិយភាពរបស់លោក ធ្លាក់ចុះដល់កំរិតទាបបំផុត ហើយបើនិយាយអំពីតុល្យការការងារ៥ឆ្នាំ ជាប្រធានាធិបតីបារាំងវិញ ប្រជាជនបារាំងមួយភាគធំមិនពេញចិត្តទេ ដោយចោទប្រកាន់ថាបានដឹកនាំរដ្ឋាភិបាលអនុគ្រោះដល់តែអ្នកមាន បង្កើនហានិភ័យក្នុងសង្គម ចំនួនអ្នកឥតការងារធ្វើកើនឡើងខ្លាំង ចូលចិត្តចេញមុខចេញមាត់ជ្រុលពេក។ ប៉ុន្តែ គណបក្សស្តាំនិយម នៅតែគាំទ្រលោក ព្រោះយល់ថា លោកនីកូឡា សាកូហ្ស៊ី ជាបុគ្គលដែលប្រកបដោយថាមពល ស្វាហាប់ សម្រេចការងារនៅលើឆាកអន្តរជាតិបានយ៉ាងប្រពៃ ជាពិសេសនៅក្នុងពេលមានវិបត្តិសេដ្ឋកិច្ច និងហិរញ្ញវត្ថុនៅឆ្នាំ២០០៨ និង២០១១។ កម្មវិធីនយោបាយរបស់លោក ឬរបស់បក្សក្នុងពេលឃោសនា គឺមានអត្ថន័យជាអ្នកស្តាំនិយមពិតៗ ដោយផ្តោតជាសំខាន់លើ សន្តិសុខ អន្តោប្រវេសន៍ អ៊ីស្លាម។

-          បេក្ខជនដែលមានប្រជាប្រិយភាពជាងគេ គឺលោក ហ្វ្រង់ស័រ ហូឡង់ (៥៧ឆ្នាំ) នៃគណបក្សសង្គមនិយម។ ជាអ្នកឆ្វេងនិយម មាននិន្នាការធ្វើកំណែទម្រង់ មានមហិច្ឆតាក្លាយជាប្រធានាធិបតីបារាំង ដឹកនាំរដ្ឋាភិបាលតាមបែបសាមញ្ញ មិនឆើតឆាយដូចប្រធានាធិបតីចាស់។ លោកធ្លាប់ជាមានតួនាទីជាលេខាទីមួយរបស់បក្សសង្គមនិយម-បក្សឆ្វេងនិយមដ៏ធំបង្អស់នៅបារាំងរយៈពេល១១ឆ្នាំ ធានាបានការបង្រួបបង្រួមបក្ស និងបានតាំងខ្លួនជាបេក្ខជនដែលមិនធ្វើឱ្យប្រជាជនខកចិត្ត។ កម្មវិធីនយោបាយរបស់លោក គឺសំដៅកាត់បន្ថយឧុនភាពថវិកាជាតិ ដូចខាងស្តាំនិយមដែរ តែលោកបានសន្យាធ្វើកំណែទម្រង់ប្រព័ន្ធពន្ធដារ ដើម្បីឱ្យមានសមភាពរវាងអ្នកក្រ-អ្នកមាន និងបញ្ហាសង្គម ប៉ុន្តែលោកគ្មានបទពិសោធន៍លើឆាកអន្តរជាតិ មិនធ្លាប់មានតួនាទីអ្វីក្នុងក្រសួងណាមួយពីមុនមកទេ។ លោកត្រូវបានគេរិះគន់ថាមិនស្វាហាប់ មិនចេះអារកាត់បញ្ហាភ្លាមៗ។ ភរិយាដើមរបស់លោក គឺលោកស្រី Ségolène Royal អតីតបេក្ខជននារីប្រធានាធិបតីចាញ់ឆ្នោតកាលពីឆ្នាំ ២០០៧។
-          លោកហ្សង់លុច មេឡង់ឆុង (Jean Luc Mélenchon) ៦០ឆ្នាំ ជាតំណាងបេក្ខជន គណបក្សរណសិរ្សឆ្វេងនិយម ស្និទ្ធនឹងបក្សកុម្មុយនិស្ត បានបង្កើតជាព្រឹត្តិការណ៍លេចធ្លោច្រើននៅពេលឃោសនា។ លោកបានវោហាខ្លាំង ចង់រៀបចំក្រុមអ្នកឆ្វេងនិយមឡើងវិញ ដើម្បីប្រយុទ្ធប្រឆាំងនឹងសេដ្ឋកិច្ចសេរីនិយម និងទីផ្សារអឺរ៉ុប។
-          លោកស្រី ម៉ារីន ឡឺប៉ែន (Marine Le Pen) ៤៣ឆ្នាំ ឈរឈ្មោះជាលើកដំបូង ឱ្យគណបក្សរណសិរ្សជាតិ (ស្តាំនិយមជ្រុល) កំពុងតែខិតខំទាក់ទាញសំឡេងឆ្នោត ចង់ដណ្តើមជោគជ័យឡើងដល់ជុំទីពីរ ដូចសម័យឪពុកលោកស្រី កាលពីឆ្នាំ២០០២។ គោលនយោបាយរបស់បក្សនេះ គឺប្រយុទ្ធប្រឆាំងនឹងជនអន្តោប្រវេសន៍ និងអស្ថិរភាព សង្គម ធ្វើឱ្យមានការកុងកាច់ខ្លាំងជាមួយនឹងគណបក្សUMP កំពុងកាន់អំណាច។
-          គណបក្សកណ្តាលនិយម តំណាងដោយលោក ហ្វ្រង់ស័រ បាយរូ (François Bayrou)។ គណបក្សនេះមាននយោបាយការពារផលិតផលក្នុងស្រុក ធ្វើនៅបារាំង Made in France ប៉ុន្តែដោយការស្ទុះឡើងនៃគណបក្សរណសិរ្សជាតិ និងរណសិរ្សឆ្វេងនិយម បានធ្វើឱ្យជោគវាសនាគណបក្សក្នុងសម័យបោះឆ្នោតលើកនេះ មានលក្ខណៈមិនច្បាស់លាស់។ កាលពីសម័យបោះឆ្នោតឆ្នាំ២០០៧ គណបក្សកណ្តាលនិយម MODemនេះ បានជាប់ឆ្នោតលំដាប់ទីបី។

ក្រៅពីនេះនៅមានបេក្ខជនមកពីគណបក្សតូចៗចំនួន៦ទៀត ៖ លោកស្រី អេវ៉ា ហ្សូលី (Eva Joly) ៦៨ឆ្នាំ ជាអ្នកបរិស្ថាន- លោកស្រី ណាតាលី អារតូ (Nathalie Arthaud) អាយុ៤២ឆ្នាំ ជាគ្រូបង្រៀន មកពីគណបក្សតស៊ូកម្មករ។ លោកហ្វីលីព ពូទូ (Philippe Poutou) នៃគណបក្សប្រឆាំងនឹងមូលធននិយម។ អ្នកទាំងបី សុទ្ធសឹងជាអ្នកមាននិន្នាការឆ្វេងនិយម។ ចំណែកបក្សស្តាំនិយមតូចៗវិញ មានជាអាទិ៍ លោក នីកូឡា ឌុយប៉ុង-អៃញ៉ង់ (Nicolas Dupont-Aignan) ជា ស្តាំនិយមបែបថ្មី មិនបុរាណ និងលោក ហ្សាក់ ហ្សឺមីណាត (Jacques Cheminade)បេក្ខជនវ័យចំណាស់ជាងគេអាយុ៧០ឆ្នាំ។

បើតាមតួលេខផ្តល់ដោយក្រសួងមហាផ្ទៃ មកទល់នឹងម៉ោង១២ថ្ងៃត្រង់ ចំនួនអ្នកទៅបោះឆ្នោតមានប្រមាណ២៨,២៩%ប៉ុណ្ណោះ ពោលគឺទាបជាងកាលពីឆ្នាំ២០០៧ បើប្រៀបក្នុងរយៈពេលដូចគ្នា។

ជារៀងរាល់ពេលបោះឆ្នោតប្រធានាធិបតីម្តងៗ មានបណ្តាជនបារាំងប្រមាណពី១៥%ទៅ៣០% មិនទៅបោះឆ្នោត។ វិបត្តិសេដ្ឋកិច្ច បានធ្វើឱ្យអ្នកអត់ការងារ អ្នកមានការងារមិនជាប់លាប់ មិនចាប់អារម្មណ៍ចង់ទៅបោះឆ្នោត។ ម្យ៉ាងទៀតបើតាមការសិក្សាជាច្រើនបង្ហាញថា មកពីបេក្ខជនប្រធានាធិបតីលើកឡើងតែអំពីបញ្ហាសន្តិសុខ អន្តោប្រវេសន៍ ដែលមិនមែនជាអាទិភាពចម្បងរបស់ប្រជាជនបារាំងបច្ចុប្បន្ន ទើបធ្វើឱ្យពួកគេ រឹតតែលែងចង់ទៅបោះឆ្នោតទៀត។

អវត្តមានមិនទៅបោះឆ្នោតអាចជះឥទ្ធិពលទៅលទ្ធផលឆ្នោតខ្លាំង និងជាបុព្វហេតុមួយនាំចំណេញដល់បក្សជ្រុលនិយម រណសិរ្សជាតិ របស់លោកស្រីម៉ារីន ឡឺប៉ែន និងរណសិរ្សឆ្វេងនិយមរបស់លោកមេឡង់ឆុង។ ហេតុដូច្នេះហើយបានជាបេក្ខជនប្រធានាធិបតីទាំងអស់ ជាពិសេសបេក្ខជននាំមុខគេទាំងពីរ គឺលោកនីកូឡា សាកូហ្ស៊ី និងលោក ហ្វ្រង់ស័រ ហូឡង់ បានអំពាវនាវហើយ អំពាវនាវទៀត ឱ្យបណ្តាជនបារាំងនាំគ្នាទៅបោះឆ្នោត៕