ដីធ្លីក្នុងតំបន់ខ្លះចាប់ផ្ដើមងើបឡើងវិញបន្តិច ប៉ុន្តែដីធ្លីនៅក្នុងតំបន់ខ្លះទៀតនៅបន្តសន្លប់នៅឡើយ

ទស្សនៈព្រឹត្តិការណ៍សេដ្ឋកិច្ចខ្មែរ

ចន្ទ 11 តុលា 2010

ដីធ្លីក្នុងតំបន់ខ្លះចាប់ផ្ដើមងើបឡើងវិញបន្តិច ប៉ុន្តែដីធ្លីនៅក្នុងតំបន់ខ្លះទៀតនៅបន្តសន្លប់នៅឡើយ

ស្តាប់ (04:16)

បញ្ចូលទៅក្នុង Playlist របស់ខ្ញុំ

ចម្លងទុក

Embed

សំណង់អាគារកំពុងសាងសង់ នៅភ្នំពេញ

ដោយ គី សុខលីម

ដីធ្លីតំបន់ខ្លះចាប់ផ្ដើមងើបឡើងវិញបន្តិច ប៉ុន្តែដីធ្លីនៅក្នុងតំបន់ខ្លះទៀតនៅបន្តសន្លប់នៅឡើយ។ តើដីធ្លីក្នុងតំបន់ណាចាប់ផ្ដើមមានហាងឆេងឡើងវិញនិងដីធ្លីក្នុងតំបន់ណានៅបន្តជាប់គាំងនោះ?

តម្លៃដីធ្លីនៅទីក្រុងភ្នំពេញចាប់ផ្ដើមរំញោចឡើងវិញបន្តិចហើយ ប៉ុន្តែហាងឆេងដីធ្លីនៅតំបន់ដាច់ស្រយាលនៅងាប់ស្ដូកនៅឡើយ។ នេះគឺជាការវាយតម្លៃរបស់ទីភ្នាក់ងារអចលនទ្រព្យ Visal Real Estate ក្នុងឆមាសទី២នៃឆ្នាំ២០១០នេះ។ លោក ស៊ា ឆៃលីន ប្រធានទីភ្នាក់ងារអចលនទ្រព្យVisal Real Estate បានបញ្ជាក់ប្រាប់ថា ចាប់តាំងពីដើមឆមាសទី២នៃឆ្នាំ២០១០មក ចំនួនភ្ញៀវដែលរកទិញអចលនទ្រព្យតាមរយៈទីភ្នាក់ងាររបស់លោកមានការកើនឡើងជាងឆមាសទី១។

ការកើនឡើងនៃចំនួនអតិថិជននេះបានជំរុញអោយអ្នកជំនាញក្នុងវិស័យដីធ្លីទាញសេចក្តីសន្និដ្ឋានបានខ្លះថា ទីផ្សារអចលនទ្រព្យអាចចាប់ផ្ដើមដឹងខ្លួនឡើងវិញបន្តិចម្តងៗបន្ទាប់ពីសន្លប់មួយរយៈធំមក។ ចាប់តាំងពីឆ្នាំ២០០៨មក ទីផ្សារអចលនទ្រព្យបានដាំក្បាលចុះសឹងហៅមិនឮ។ ក្នុងរយៈពេលនោះ សម្បូរណាស់អ្នកប្រកាសលក់អចលនទ្រព្យប៉ុន្តែគ្មានឡើយអ្នកទិញ។ គ្រប់ទីកន្លែងនៃប្រទេសកម្ពុជា គេសង្កេតឃើញតែផ្លាកដាក់លក់អចលនទ្រព្យ។

ជាងបីឆ្នាំក្រោយមក ស្ថានភាពស្ងាត់ជ្រងំបានរសាត់ចេញឆ្ងាយបន្តិចម្តងៗ។ លោក ស៊ា ឆៃលីន ប្រធានទីភ្នាក់ងារអចលនទ្រព្យVisal Real Estate បានបញ្ជាក់ទៀតថា ដីធ្លីដែលចាប់ផ្ដើមមានអ្នករកទិញឡើងវិញនោះ គឺភាគច្រើនជាដីក្នុងតំបន់ពាណិជ្ជកម្ម និងដីក្នុងតំបន់ស្នាក់នៅទំនើបៗដូចជាដីនៅតំបន់បឹងកេងកងចំកណ្ដាលទីក្រុងភ្នំពេញជាដើម។ បើយោងតាមលោក ស៊ា ឆៃលីន ដីមួយម៉ែត្រការ៉េនៅតំបន់បឹងកេងកងអាចលក់បានក្នុងតម្លៃ២០០០ដុល្លារអាមេរិកក្នុងពេលបច្ចុប្បន្ន រីឯកាលពីពេលហាងឆេងធ្លាក់ខ្លាំង ដីនៅក្នុងតំបន់នេះមានតម្លៃតែ១៥០០ដុល្លារប៉ុណ្ណោះក្នុងមួយម៉ែត្រការ៉េ។
សូមរម្លឹកបន្តិចថា ដីក្នុងតំបន់បឹងកេងកងដែលជាតំបន់លេខមួយនោះមានតម្លៃរហូតដល់ជាង៤០០០ដុល្លារក្នុងមួយម៉ែត្រការ៉េកាលពីតម្លៃដីធ្លីឡើងខ្ពស់បំផុតនៅចុងឆ្នាំ២០០៧។

ដូចគ្នាដែរសម្រាប់ដីក្នុងតំបន់ពាណិជ្ជកម្ម អ្នកជំនាញដីធ្លីបានបន្តទៀតថា ដីនៅក្នុងតំបន់ផ្លូវមុនីវង្សជាផ្លូវដែលសម្បូរទៅដោយសកម្មភាពសេដ្ឋកិច្ចនោះបានឡើងថ្លៃគួរសមវិញហើយ។ នៅតំបន់ដងមហាវិថីមុនីវង្សនាពេលបច្ចុប្បន្ននេះ ដីអាចមានតម្លៃក្នុងចន្លោះពី១២០០ទៅដល់៣៥០០ដុល្លារក្នុងមួយម៉ែត្រការ៉េអាស្រ័យទៅតាមតំបន់និងទំហំដីឡូត៍នីមួយៗ។ រីឯពេលហាងឆេងធ្លាក់ ដីទីនេះអាចមានតម្លៃក្នុងចន្លោះពី៧០០ទៅ២៥០០ដុល្លារក្នុងមួយម៉ែត្រការ៉េ។

ការប៉ាន់ស្មាននៃការងើបឡើងនៃទីផ្សារអចលនទ្រព្យបានធ្វើឡើងចំពេលដែលអ្នកជំនាញសេដ្ឋកិច្ចបានទស្សន៍ទាយពីការងើបឡើងវិញនៃសេដ្ឋកិច្ចនៅក្នុងប្រទេសកម្ពុជា។ ធនាគារអភិវឌ្ឍន៍អាស៊ីបានព្យាករថា សេដ្ឋកិច្ចនៃប្រទេសក្រីក្រមួយនេះនឹងទទួលបានកំណើន៥ភាគរយសម្រាប់ឆ្នាំ២០១០នេះ។

កំណើនសេដ្ឋកិច្ច៥ភាគរយរបស់កម្ពុជាគឺបានមកពីកំណើននៃការនាំចេញសំលៀកបំពាក់និងការកើនឡើងនៃចំនួនភ្ញៀវទេសចរបរទេស។ របាយការណ៍របស់ធនាគារអភិវឌ្ឍន៍អាស៊ីបានសរសេរបញ្ជាក់ថា ក្នុងរយៈពេល៧ខែដើមឆ្នាំ២០១០ការនាំចេញផលិតផលកាត់ដេរពីកម្ពុជាទៅសហរដ្ឋអាមេរិកបានកើនឡើងជាង១០ភាគរយបើគិតជាទឹកប្រាក់និងកំណើនប្រហែល២៤ភាគរយបើគិតជាបរិមាណទំនិញ។

ចំណែកឯវិស័យទេសចរណ៍វិញ កំណើនទេសចរបរទេសបានកើនឡើង១២,៤ភាគរយក្នុងរយៈពេល៦ខែដើមឆ្នាំ២០១០បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។

មិនត្រឹមតែប៉ុណ្ណោះធនាគារអភិវឌ្ឍន៍អាស៊ីបានព្យាករថា កំណើនសេដ្ឋកិច្ចឆ្នាំ២០១១នឹងមាន៦ភាគរយ។ ការស្ទុះឡើងវិញនៃកំណើនសេដ្ឋកិច្ចអាចជាកត្តាមួយក្នុងចំណោមកត្តាដទៃទៀតក្នុងការរុញច្រានអោយវិស័យអចលនទ្រព្យងើបឡើងវិញប៉ុន្តែដើម្បីអោយដឹងថាវាងើបឡើងវិញឆាប់ឬក៏យឺតនោះគ្មាននរណាអាចទស្សន៍ទាយបាននោះទេ។

ហាងឆេងដីធ្លីទីក្រុងភ្នំពេញក្នុងតំបន់ពាណិជ្ជកម្មនិងក្នុងតំបន់ស្នាក់នៅទំនើបៗមានសញ្ញាងើបឡើងវិញបន្តិចមែនប៉ុន្តែអ្នកជំនាញដីធ្លីបានបញ្ជាក់ថា ដីធ្លីនៅតាមតំបន់ដាច់ស្រយាលនៅតែគ្មានតម្លៃដដែល៕