វៀតណាម -

អត្ថបទចុះផ្សាយនៅថ្ងៃ អង្គារ 06 ធ្នូ 2011 - ព័ត៌មានទើបកែប្រើលើកចុងក្រោយ ថ្ងៃ អង្គារ 06 ធ្នូ 2011

ម្ចាស់ជំនួយអន្តរជាតិជំរុញឲ្យវៀតណាមពន្លឿនកំណែទម្រង់សេដ្ឋកិច្ច

REUTERS

ដោយ នុយ ប៊ែរណាដែត

សហគមន៍អន្តរជាតិដែលជាម្ចាស់ជំនួយសំរាប់ប្រទេសវៀតណាម នៅថ្ងៃអង្គារទី៦ធ្នូនេះ បានជំរុញឲ្យវៀតណាម បង្កើនការខិតខំប្រឹងប្រែងរបស់ខ្លួនថែមទៀតក្នុងការកែប្រែរចនាសម្ព័ន្ធនៃសេដ្ឋកិច្ចរបស់ខ្លួន និងព្រមានប្រាប់ប្រទេសកុម្មុយនិស្តមួយនេះ ឲ្យកែលំអបញ្ហាសិទ្ធិមនុស្ស នៅក្នុងប្រទេសឲ្យបានល្អប្រសើរ ដែលជាឧបសគ្គមួយរាំងស្ទះដល់ការរីកចម្រើនសេដ្ឋកិច្ចរបស់ខ្លួន។

សេចក្តីរាយការណ៍របស់ នុយ ប៊ែរណាដែត

ស្តាប់ (02:12)

06/12/2011 by នុយ ប៊ែរណាដែត

នៅឱកាសរួមប្រជុំប្រចាំឆ្នាំនៃបណ្តាប្រទេសម្ចាស់ជំនួយនៅទីក្រុងហាណូយ លោកស្រី Victoria Kwakwa នាយិកាធនាគារពិភពលោក ប្រចាំប្រទេសវៀតណាម បានថ្លែងបញ្ជាក់នៅថ្ងៃអង្គារ៦ធ្នូនេះ ថា “ជាការងាយស្រួលជាង សំរាប់វៀតណាម គួរតែបន្តធ្វើកំណែទម្រង់នៃរចនាសម្ព័ន្ធសេដ្ឋកិច្ចរបស់ខ្លួន ចាប់ពីឥឡូវនេះទៅ ជាជាង ខំធ្វើក្រោយពីប្រទេសបានរងគ្រោះដោយវិបត្តិ”។

បណ្តាប្រទេសដែលបានចូលរួមនៅក្នុងសម័យប្រជុំប្រចាំឆ្នាំនេះ បានវាយតម្លៃថា ”ទីក្រុងហាណូយ ត្រូវតែធ្វើកំណែទម្រង់ឡើងវិញនៅក្នុងវិស័យធនាគារធ្វើឯកជនភាវូបនីយកម្មនៃសហគ្រាសរដ្ឋ សម្រួលនីតិវិធី ខាងផ្នែករដ្ឋបាលនិងប្រយុទ្ធប្រឆាំងកម្ចាត់អំពើពុករលួយពាសវាលពាសកាល។

គួររំលឹកថានៅដើមឆ្នាំ២០១១នេះ គណបក្សកុម្មុយនិស្តវៀតណាម(PCV)ដែលកាន់អំណាចនៅក្នុងប្រទេស បាន អនុវត្តផែនការនយោបាយរឹតបន្តឹងមួយ ដើម្បីត្រួតពិនិត្យឡើងវិញលើអតិផរណាក្នុងបច្ចុប្បន្ននេះ ដែលមានប្រមាណជា ២០%នៃឩនភាពពាណិជ្ជកម្មគឺស្មើនឹងចំនួន ១ម៉ឺន២៤០០លានដុល្លារនៅឆ្នាំ២០១០ និង នៅលើប្រាក់ដុងវៀតណាម ដែល បានចុះតម្លៃ៤ដងក្នុងរយៈពេល១៥ខែ។

ទន្ទឹមនេះដែរ បណ្តាប្រទេសម្ចាស់ជំនួយ បានសំដែងការស្តាយរបស់ពួកគេស្តីពី ការរំលោភសិទ្ធិមនុស្សនៅក្នុងប្រទេសវៀតណាម ជាទីដែលពុំអត់ឱនឲ្យមានការទិតៀនរិះគន់រដ្ឋអំណាចអ្វីណាមួយឡើយ។

ម្យ៉ាងទៀត យោងតាមអង្គការការពារសិទ្ធិមនុស្សអន្តរជាតិ Amnesty international សកម្មជននយោបាយជាច្រើនសិបនាក់ បានទទួលទោសជាប់គុក យ៉ាងធ្ងន់ធ្ងរ ចាប់តាំងពីវៀតណាម បានធ្វើយុទ្ធនាការបង្ក្រាប គាបត្បៀត សេរីភាពក្នុងការបញ្ចេញវោហារ ចាប់ពីចុងឆ្នាំ ២០០៩ មក។

នៅក្នុងបញ្ហាសិទ្ធិមនុស្សនេះដែរ លោកនាយករដ្ឋមន្រ្តីវៀតណាម លោក Nhuyen Tan Dung បាននិយាយធានាអះអាងដល់បណ្តាប្រទេសម្ចាស់ជំនួយថា” សិទ្ធិសេរីភាព របស់ប្រជាពលរដ្ឋនិងលទ្ធិប្រជាធិបតេយ្យ គឺ ជាគោលដៅរបស់រដ្ឋាភិបាលវៀតណាម ប៉ុន្តែ “នៅក្នុងក្របខ័ណ្ឌច្បាប់និងរដ្ឋធម្មនុញ្ញ”៕