ម្ចាស់ជំនួយសាទរការផ្តន្ទាទោសឌុច តែចង់បានការលើកកម្ពស់បទដ្ឋានច្បាប់
ភ្លាមៗក្រោយពីការប្រកាសសាលដីកាផ្តន្ទាទោស កាំង ហ្គេចអ៊ាវហៅឌុចឲ្យជាប់ពន្ធនាគារអស់មួយជីវិត ប្រតិកម្មបានធ្លាក់មកជាបន្តបន្ទាប់។ ប្រទេសបារាំង និងជប៉ុន ដែលជាសហប្រធាននៃក្រុមប្រទេសផ្តល់ជំនួយឲ្យសាលាក្តីខ្មែរក្រហម បានសាទរចំពោះសាលដីការបស់អង្គជំនុំជម្រះតុលាការកំពូល ប៉ុន្តែតំណាងប្រទេសផ្តល់ជំនួយទាំងពីរមិនភ្លេចរម្លឹកមន្ត្រីតុលាការខ្មែរក្រហមឲ្យលើកកម្ពស់បទដ្ឋាននិងនីតិវិធីច្បាប់ឲ្យបានខ្ពស់បំផុត។ អង្គការសង្គមស៊ីវិលនៅកម្ពុជា ក៏នាំគ្នាចេញសេចក្តីថ្លែងការណ៍ជាបន្តបន្ទាប់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
សាលដីកាផ្តន្ទាទោសឌុចឲ្យជាប់ពន្ធនាគារអស់មួយជីវិតបានទទួលការសាទរពីប្រទេសម្ចាស់ជំនួយនៃសាលាក្តីខ្មែរក្រហម។ ភ្លាមៗក្រោយពីការប្រកាសសាលដីកាប្រឆាំងឌុចពីសំណាក់អង្គជំនុំជម្រះតុលាការកំពូលកាលពីថ្ងៃទី៣កុម្ភៈម្សិលមិញ ស្ថានទូតបារាំង និងជប៉ុន ប្រចាំកម្ពុជាបានចេញសេចក្តីថ្លែងការណ៍រួមគ្នាមួយ ដោយសម្តែងការសាទរចំពោះសាលដីកានេះ។ សេចក្តីថ្លែងការណ៍បានឲ្យដឹងថា ប្រទេសផ្តល់ជំនួយសូមសាទរចំពោះការបិទបញ្ចប់សំណុំរឿង ០០១ ជាប្រវត្តិសាស្ត្ររបស់សាលាក្តីខ្មែរក្រហម។
ប្រទេសបារាំង និងជប៉ុន ក្នុងនាមសហប្រធាននៃបណ្តាប្រទេសជាមិត្តរបស់សាលាក្តី បានកត់សម្គាល់ថា ការសម្រេចសេចក្តីផ្តន្ទាទោសឌុចឲ្យជាប់ពន្ធនាគារអស់មួយជីវិតគឺជាអ្វីដែលគេទន្ទឹងរង់ចាំជាយូរមកហើយ។ សាលដីកានេះក៏ជាការបញ្ជាក់ឲ្យឃើញពីការទទួលស្គាល់ការឈឺចាប់របស់ប្រជាជនកម្ពុជា និងជនរងគ្រោះក្នុងរបបខ្មែរក្រហមចន្លោះពីឆ្នាំ១៩៧៥ដល់១៩៧៩។ តំណាងប្រទេសផ្តល់ជំនួយទាំងពីររបស់សាលាក្តីខ្មែរក្រហមក៏បានវាយតម្លៃថា នេះគឺជាការបោះជំហានមួយដ៏វែងឆ្ងាយឆ្ពោះទៅកាន់យុត្តិធម៌ និងការបង្រួបបង្រួមជាតិរបស់ប្រជាជនកម្ពុជា។ ទន្ទឹមនឹងនោះដែរ តំណាងប្រទេសម្ចាស់ជំនួយទាំងពីរក៏បានរម្លឹកដល់មន្ត្រីជាតិ និងអន្តរជាតិនៃតុលាការខ្មែរក្រហមឲ្យលើកកម្ពស់បទដ្ឋាន និងនីតិវិធីច្បាប់ឲ្យបានខ្ពស់បំផុត និងសុំឲ្យពួកគេបំពេញតួនាទីដើម្បីបុព្វហេតុយុត្តិធម៌ និងក្នុងពេលវេលាសមស្របដើម្បីជាប្រយោជន៍សម្រាប់ពលរដ្ឋកម្ពុជាទាំងអស់។
គណៈកម្មាធិការប្រព្រឹត្តិកម្ម នៃអង្គការ-សមាគមការពារសិទ្ធិមនុស្សកម្ពុជា (CHRAC) ដែលជាសម្ព័ន្ធអង្គការមិនមែនរដ្ឋាភិបាលចំនួន ២៣ ក៏បានចេញសេចក្តីថ្លែងការណ៍សាទរចំពោះសាលដីកាផ្តន្ទាទោសឌុចនេះដែរ។ ប៉ុន្តែ ពួកគេក៏បានជំរុញរដ្ឋាភិបាលកម្ពុជា អង្គការសហប្រជាជាតិ និងម្ចាស់ជំនួយ ឲ្យបន្តកិច្ចសហប្រតិបត្តិការគ្នាក្នុងលក្ខណៈស៊ីសង្វាក់មួយដើម្បីឈានទៅដំណើរការដោយឯករាជ្យ និងមិនលម្អៀងសម្រាប់សំណុំរឿង០០២ សំណុំរឿង០០៣ និង០០៤។
ដោយឡែក ឧបការីរដ្ឋមន្ត្រីការបរទេសអាមេរិក លោក Kurt M. Campbell ក៏បាននិយាយដល់សំណុំរឿង ០០៣ និង០០៤ផងដែរ។ ក្រោយពីជំនួបជាមួយលោកហោ ណាំហុង នៅទីក្រុងភ្នំពេញ កាលពីរសៀលថ្ងៃសុក្រម្សិលមិញ លោក Kurt M. Campbell អះអាងថា សហរដ្ឋអាមេរិកអាចនឹងជួយផ្នែកហិរញ្ញវត្ថុបន្ថែមទៀតដល់សាលាក្តីខ្មែរក្រហម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ