រុស្ស៊ី-ស៊ីរី -

អត្ថបទចុះផ្សាយនៅថ្ងៃ ពុធ 22 សីហា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 22 សីហា 2012

បញ្ហាលាចេញពីតំណែង នៃប្រធានាធិបតីស៊ីរី ក៏អាចជាកម្មវត្ថុនៃកិច្ចចរចា

ឧបនាយករដ្ឋមន្ត្រីស៊ីរី លោក Qadri Jamil នៅម៉ូស្គូ ថ្ងៃទី២១ សីហា ២០១២

REUTERS/Maxim Shemetov

ដោយ កែវ ឆាយា

សេចក្តីនេះ ថ្លែងក្នុងសន្និសីទកាសែត នៅក្រុងម៉ូស្គូ រសៀលម្សិលមិញ ដោយលោកឧបនាយករដ្ឋមន្ត្រីស៊ីរី Qadri Jamil បន្ទាប់ពីគាត់បានជួបពិភាក្សា ជាមួយលោករដ្ឋមន្ត្រីការបរទេសរុស្ស៊ី Serguei Lavrov ដោយឆ្លើយតបនឹងសំនួរអ្នកកាសែត ទាក់ទងនឹងកិច្ចចរចា ជាយថាហេតុជាមួយភាគីប្រឆាំងនៅស៊ីរី។

សេចក្តីរាយការណ៍របស់ កែវ ឆាយា ពីទីក្រុងម៉ូស្គូ

ស្តាប់ (02:26)

22/08/2012

ពេលដែលក្នុងប្រទេសស៊ីរីផ្ទាល់ កំពុងប្រព្រឹត្តទៅ ការច្បាំងប្រយុទ្ធគ្នាយ៉ាងក្រពុលមុខ រវាងកងទ័ពរដ្ឋាភិបាល និង ក្រុមប្រដាប់អាវុធប្លែកៗនៃភាគីប្រឆាំង ដើម្បីដណ្តើមគ្នាយកក្រុង Alep ជាក្រុងទី២នៃប្រទេស គណៈប្រតិភូរដ្ឋាភិបាលស៊ីរី ត្រូវបានទទួលជួបពិភាក្សា ថ្ងៃអង្គារ ទី២១សីហា នៅក្រុង ម៉ូស្គូ ជាមួយលោក Serguei Lavrov រដ្ឋមន្ត្រីការបរទេសរុស្ស៊ី ប្រទេសដែលស្និទ្ធនឹងរបបគ្រប់គ្រងនៃលោកប្រធានាធិបតី Bashar-el Assad។

បន្ទាប់មក ដោយថ្លែងក្នុងសន្និសីទកាសែត ទាក់ទងនឹងអភិក្រមនៃសំវាទជាយថាហេតុ ជាមួយភាគីប្រឆាំង ប្រមុខគណៈប្រតិភូនោះ លោកឧបនាយករដ្ឋមន្ត្រី Qadri Jamil បានសង្កត់ធ្ងន់ថា ៖
“ការទាមទារឲ្យលោកប្រធានាធិបតី Bashar-el Assad ចុះចេញពីតំណែង មិនអាចជាល័ក្ខខ័ណ្ឌ ជាមុនឡើយសម្រាប់បើកធ្វើសំវាទនោះ។ ប៉ុន្តែ ប្រសិនបើ កិច្ចចរចានោះចាប់ផ្តើមមែន នោះបញ្ហាណាក៏ដោយអាចនឹងត្រូវលើកយកទៅពិនិត្យមើល បូកទាំងបញ្ហាលាចេញពីតំណែងនៃលោកប្រធានាធិបតី Bashar-el Assad”។

ចំណែក រដ្ឋមន្ត្រីស៊ីរីខាងផ្សះផ្សាជាតិ លោក Ali Haidar ដែលវត្តមានក្នុងសន្និសីទកាសែតដែរ បានបន្ថែមថា ៖ “ដើម្បីឲ្យសំវាទនោះ អាចចាប់ផ្តើមទៅកើត រដ្ឋាភិបាលស៊ីរីត្រៀមយកត្រចៀកផ្ទៀងស្តាប់យោបល់របស់គ្រប់ភាគីទាំងអស់”។

ដូច្នេះ មានន័យថា រដ្ឋាភិបាលស៊ីរី មិនយល់ព្រមដោយត្រង់ផ្ទាល់ឯណា តាមការទាមទារ ម្តងហើយម្តងទៀតរបស់ភាគីប្រឆាំងទាក់ទងនឹងលោកប្រធានាធិបតី Bashar-el Assad។

ក្នុងជំនួបម្សិលមិញនៅម៉ូស្គូ តំណាងរដ្ឋាភិបាលស៊ីរី និងប្រមុខការទូតរុស្ស៊ី ក៏បានប្រតិកម្មចំពោះគម្រោងលោកប្រធានាធិបតីអាមេរិក Barack Obama ដែលថាអាចនឹងមានអន្តរាគមន៍យោធាអាមេរិកាំង ទៅក្នុងប្រទេសស៊ីរី ប្រសិនបើរដ្ឋាភិបាលស៊ីរី ថ្លោះការហ៊ានប្រើអាវុធគីមី គឺថា ៖
តាមយោបល់ម៉ូស្គូ អន្តរាគមន៍ជាឯកតោភាគីបែបនេះ មានន័យ ជាការរំលោភបំពានលើច្បាប់អន្តរជាតិតែម្តង។ តាមលោកប្រមុខការទូតរុស្ស៊ី Serguei Lavrov ជម្រើសតែមួយគត់ ដែលនៅសល់ សម្រាប់ពួកប្រទេសខាងលិច គឺបង្កឲ្យបាន “លក្ខណៈដើម្បីឲ្យសំវាទ” អាចប្រព្រឹត្តទៅកើត រវាងភាគីបដិបក្ខ នៅស៊ីរី។

តាមក្រុងដាម៉ាស អន្តរាគមន៍យោធាពីក្រៅទៅក្នុងប្រទេសស៊ីរី គឺ”មិនអាចធ្វើទៅកើតឡើយ”។ សម្រាប់លោកឧបនាយករដ្ឋមន្ត្រីស៊ីរី Qadri Jamil អន្តរាគមន៍នេះ មុខជាជះចំហាយអាក្រក់ ទៅឆ្ងាយពីព្រំដែនប្រទេសស៊ីរីផ្ទាល់៕