គណៈ​កម្មការ​ការពារ​និង​ថែរក្សាត្រីផ្តោតទន្លេមេគង្គ អគ្គនាយករដ្ឋបាលជលផល​​នៃ​ក្រសួង​​កសិកម្ម​​​និង​អង្គការ​​ថែរ​ក្សា​សត្វព្រៃ​ WWF ​បានចុះហត្ថលេខារួមគ្នាលើសេចក្តីប្រកាស​មួយ​ដើម្បី​​ការពារត្រីផ្សោតដែលប្រឈមនឹងការបាត់បង់នៅក្នុងខេត្តក្រចេះ ខេត្តស្ទឹងត្រែង​និង​​តំបន់​​ព្រំដែនកម្ពុជាឡាវ។

សេចក្តីប្រកាសនេះមានឈ្មោះថា៖“សេចក្តីប្រកាសខេត្តក្រចេះស្តីពីការថែរក្សាត្រីផ្សោត Irrawaddy ក្នុងទន្លេមេគង្គ”។

ត្រីផ្សោតគឺជាត្រីមួយចំណោមត្រី៥៨ប្រភេទផ្សេងទៀតនៅក្នុងប្រទេសកម្ពុជាដែលតម្រូវអោយមានការការពារពីព្រោះត្រីប្រភេទនេះបាននិងកំពុងប្រឈមនឹងការបាត់បង់។
ក្នុងអំឡុងឆ្នាំ២០០០ដល់ឆ្នាំ២០០៦កន្លងមក ត្រីផ្សោតបានងាប់១៥ក្បាលក្នុងមួយឆ្នាំៗ។ ការងាប់​នេះបណ្តាលមកពីការដាក់មង​យកត្រីរបស់ប្រជាពលរដ្ឋប៉ុន្តែ​ចាប់តាំង​ពី​ឆ្នាំ​២០០៧​មក​ ការងាប់ត្រីផ្សោតដោយសារការជាប់មងរបស់ប្រជាពលរដ្ឋបានថយចុះយ៉ាងច្រើន។ ជាក់ស្តែង ក្នុងឆ្នាំ២០១១កន្លងមនេះ មានតែត្រីផ្សោត៣ក្បាល​ប៉ុណ្ណោះបានងាប់​ដោយសារ​ការដាក់​មង។

លោក ទូច ស៊ាងតាណា ប្រធានគណៈកម្មការថែរក្សានិងអភិរក្សត្រី​ផ្សោតមេគង្គកម្ពុជាបាន​និយាយ​​ប្រាប់នៅថ្ងៃសៅរ៍នេះថាវាមានសារៈសំខាន់​ណាស់ក្នុងការ​គិតគូរ​​ពីការថែរក្សាកាពារ​ត្រីផ្សោត​​ដែលនៅសេសសល់។ លោកបានបន្តទៀតថា ដើម្បីការពារត្រីផ្សោត​អោយ​មាន​ប្រសិទ្ធិភាព តួអង្គពាក់ព័ន្ធត្រូវសហការគ្នាអោយ​បានច្រើននិងយល់គ្នាអោយបានច្រើន​បន្ថែម​ទៀត។ ម្យ៉ាងវិញទៀត ការដាក់មងរបស់ប្រជាពលរដ្ឋត្រូវតែបញ្ចប់ពីព្រោះ​ដោយសារការដាក់​មង​នេះ ត្រីផ្សោតបានងាប់ជាបន្តបន្ទាប់។

លោក សេង ទៀក នាយកអង្គការ WWF ប្រចាំនៅកម្ពុជាបានបន្ថែមទៀតថាការចុះ​ហត្ថលេខា​​លើ​សេចក្តីប្រកាសរួមខេត្តក្រចេះគឺជា​កិច្ចខិតខំប្រឹងប្រែង​យ៉ាងខ្លាំងរវាងតួអង្គ​ពាក់ព័ន្ធ​ក្នុង​ការ​ការពារប្រភេទត្រី​កម្រពីការបាត់បង់និងអាចជួយជំរុញ​បង្កើនប្រភេទត្រីទាំង​នេះ​​ឡើង​វិញ​នៅ​ក្នុង​ទន្លេមេគង្គ។

របាយការណ៍នានាបានបង្ហាញថា នៅក្នុងទន្លេ Irrawaddy ប្រទេសភូមា ត្រីផ្សោត​ត្រូវ​បាន​គេ​ប៉ាន់​ប្រមាណថាមានចំនួនជាង១ពាន់ក្បាល។​ប្រទេសកម្ពុជា​ជាពិសេស​ខេត្ត​ក្រចេះ​និង​ខេត្ត​ស្ទឹង​ត្រែងមានត្រីផ្សោតក្នុងចន្លោះពី១៧០ទៅ១៨០ក្បាល។ កូន​ត្រីផ្សោត​ពីរ​ក្បាល​ថ្មី​ទៀត​ទើប​ចាប់កំណើតកាលពីចុងឆ្នាំ២០១១កន្លងមកនេះនៅក្នុងប្រទេសកម្ពុជា៕