កម្ពុជា-តុលាការ - 
អត្ថបទចុះ​ផ្សាយ​នៅ​ថ្ងៃ សុក្រ 10 កុម្ភៈ 2012 - ព័ត៌មានទើប​កែប្រើ​លើកចុងក្រោយ​ ថ្ងៃ ពុធ 15 កុម្ភៈ 2012

ចៅក្រម​ស៊ើបអង្កេត​ជាតិ​និង​អន្តរជាតិ​បន្ត​ភាព​មិន​ចុះ​សម្រុង​

សហចៅក្រមស៊ើបអង្កេត​អន្តរជាតិ Laurent Kasper Ansermet
សហចៅក្រមស៊ើបអង្កេត​អន្តរជាតិ Laurent Kasper Ansermet
RFI/Leang Delux

ដោយ លី ម៉េងហួរ

នៅ​​ថ្ងៃ​​សុក្រ​​នេះ​លោក ​យូ ​ប៊ុន​ឡេង ​សហ​​ចៅក្រម​​ស៊ើបអង្កេត​​ជាតិ​ក្នុង​​តុលាការ​​ខ្មែរក្រហម​ បាន​បដិសេធ​​នូវ​​សេចក្ដី​ថ្លែងការណ៍​​របស់​​លោក ​Laurent​ Kasper​ Ansermet​ សហ​​ចៅក្រម​​ស៊ើប​​អង្កេត​​បម្រុង​​អន្តរជាតិ​។​ លោក​ Kasper Ansermet​ កាលពី​​ថ្ងៃ​​ទី​​៩​​កុម្ភៈ​​ម្សិលមិញ​ បាន​​ប្រកាស​​ពី​​ការងារ​​របស់​​លោក​​នៅ​​សាលាក្តី​​ខ្មែរក្រហម​ ព្រម​ទាំង​​​ប្រកាស​​បើក​​ស៊ើប​អង្កេត​​ឡើង​វិញ​​នូវ​​សំណុំរឿង​​០០៣។ ​ក៏​ប៉ុន្តែ​ក្នុង​សេចក្តី​ប្រកាស​នៅ​ថ្ងៃ​នេះ​លោក​​ យូ ​ប៊ុនឡេង​ បាន​បដិសេធ​ហើយ​ថា ​លោក Kasper Ansermet ​មិន​មាន​សិទ្ធិ​ធ្វើ​កិច្ចការ​ទាំង​នេះ​ទេ ​ដោយ​សារ​តែ ​មិនទាន់​មាន​ការ​តែងតាំង​ជា​ផ្លូវការ​ពី​ឧត្តម​ក្រុម​ប្រឹក្សា​នៃ​អង្គ​ចៅក្រម។

សេចក្តីរាយការណ៍​របស់ លី ម៉េងហូរពីភ្នំពេញ
 

10/02/2012 by លី ម៉េងហួរ

សេចក្តីប្រកាស​របស់​លោក​ចៅក្រម យូ ប៊ុន​ឡេង នៅ​ថ្ងៃ​សុក្រ​នេះ បង្ហាញ​នូវ​ជំហរ ៥ ចំណុច។ លោកយូប៊ុនឡេង​​ចាត់ទុកថា ការ​លួច​ចេញ​នូវ​សេចក្ដីប្រកាស​ព័ត៌មាន នៅ​ពីក្រោយ​ខ្នង​សហ​ចៅក្រម​ស៊ើបអង្កេត​ជាតិ ម្ដង​ហើយ​ម្ដងទៀត គឺជា​ការបង្ហាញ​នូវ​ចេតនា​មិន​ល្អ​របស់​លោក Laurent Kasper Ansermet​។
 
ម្យ៉ាងទៀត ខ្លឹមសារ​នៃ​សេចក្ដីថ្លែងការណ៍​របស់​លោក Kasper Ansermet បង្ហាញ​យ៉ាង​ច្បាស់​ក្រឡែត​​នូវ​ចេតនា​បំភ័ន្ត​មតិសាធារណៈ ជាពិសេស​ចំណុច ដែលថា “​សហ​ចៅក្រម​ស៊ើប​អង្កេត​​ជាតិ ជំទាស់​ទៅ​នឹង​សំណើ​បំពេញ​កិច្ច​ស៊ើបសួរ ដែល​បាន​ស្នើឡើង​ដោយ​លោក Kasper Ansermet ក្នុង​សំណុំរឿង​ពីរ​ថ្មី​ទៀត គឺ​០០៣ និង​០០៤”​។
 
​ក៏​ប៉ុន្តែ​តាម​សេចក្តីប្រកាស​នៅ​ថ្ងៃ​សុក្រ​នេះ សហ​ចៅក្រម​ស៊ើបអង្កេត​ជាតិ លោក យូ ប៊ុន​ឡេង បាន​បញ្ជាក់​ជា​ថ្មី​ថា លោក​មិន​ដែល​បាន​ពិភាក្សា​លើ​បញ្ហា​កិច្ច​នីតិវិធី​ណាមួយ​ជាមួយ​ចៅក្រម Laurent Kasper Ansermetឡើយហើយ​រិត​តែ​មិន​ដែល​ធ្លាប់បាន​ខ្វែងយោបល់​អំពី​ចំណាត់​ការ​​​នីតិវិធី​ណាមួយ​ជាមួយ​គាត់​ដែរ​។
 
​លោក​យូ​ប៊ុន​ឡេង​បញ្ជាក់ថា កន្លងមក​លោក​តែងតែ​គោរព​ជានិច្ច​នូវ​ជំហរ​ឯករាជ្យ​របស់​ស​ហ​ចៅក្រម​ស៊ើបអង្កេត​អន្តរជាតិ ហើយ​ជាពិសេស កិច្ចព្រមព្រៀង ច្បាប់ អ​.​វ​.​ត​.​ក និង​វិធាន​ផ្ទៃក្នុង មានចែង​យ៉ាងច្បាស់​អំពី​យន្តការ​ក្នុង​ការដោះស្រាយ នូវ​ការខ្វែង​យោបល់​គ្នា​របស់​សហ​ចៅក្រម​ទាំងពីរ ដើម្បី​ធានាបាន​នូវ​ដំណោះស្រាយ​បញ្ហា​មួយ​ស្រប​តាម​គោលការណ៍​ជំនុំជម្រះ​ក្ដី ប្រកបដោយ​យុត្តិធម៌​។

លោក យូ ប៊ុនឡេងសហ​ចៅក្រម​​ស៊ើប​អង្កេត​ជាតិ​និងជា​ប្រធានសាលា​ឧទ្ធរណ៍​
RFI/Leang Delux

លោក​ចៅក្រម យូ ប៊ុន​ឡេង នៅ​តែ​ប្រកាន់​ជំហ​រថា លោក Kasper Ansermet មិន​មាន​សិទ្ធិ​ធ្វើ​ចំណាត់ការ​ណាមួយ ជា​សហ​ចៅក្រម​ស៊ើបអង្កេត​អន្តរជាតិ​ឡើយ ព្រោះ​មកដល់ពេលនេះ លោក​ចៅក្រម​ស៊ើបអង្កេត​អន្តរជាតិ​បម្រុង Kasper Ansermet មិនទាន់​ត្រូវបាន​តែងតាំង​ជា​ផ្លូវការ​នៅឡើយ​។​
 
បន្ទាប់​ពី​ចូលធ្វើការ​នៅ​តុលាការ​ខ្មែរក្រហម កាលពីដើម​សប្តាហ៍​នេះ លោក Kasper Ansermet កាលពី​រសៀល​ថ្ងៃ​ទី​៩ ខែ​កុម្ភៈ ឆ្នាំ​២០១២ បាន​ចេញ​ប្រកាស​ព័ត៌មាន​មួយ ដោយ​លើក​ឡើង​ពី​នីតិវិធី​ផ្លូវច្បាប់​នៃ​ការបំពេញ​ការងារ​របស់លោក​។ លោក​ចៅក្រម​ស៊ើបអង្កេត​បម្រុង​​អន្តរជាតិ ក៏​ប្រកាស​បើក​ការស៊ើបអង្កេត​ឡើងវិញលើ​សំណុំរឿង​០០៣និង​បាន​ទាម​ទារ​​ឲ្យ​លោក​ចៅក្រម ប្រាក់ គឹម​សាន ប្រធាន​អង្គ​បុរេ​ជំនុំជម្រះរបស់​តុលាការ​ខ្មែរក្រហមលាលែង​​តំណែង ដោយ​សារ​​​តែ​អង្គ​បុរេ​ជំនុំជម្រះ មិនបាន​សម្រេច​លើ​ការខ្វែងគំនិត​គ្នា​រវាង​ចៅក្រម​ស៊ើបអង្កេត​ជាតិ និង​អន្តរជាតិ ក្នុង​សំណុំរឿង​០០៣ និង​០០៤​។
 
លោក Kasper Ansermet បាន​ប្តឹង​តវ៉ា​លើ​ការខ្វែងគំនិត​នោះ ទៅកាន់​អង្គ​បុរេ​ជំនុំជម្រះ កាលពី​ខែ​ធ្នូ និង​​នៅ​ដើម​ខែកុម្ភៈ​៕

tags: កម្ពុជា - តុលាការខ្មែរក្រហម
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close