ចិន -

អត្ថបទចុះផ្សាយនៅថ្ងៃ អង្គារ 15 ឧសភា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 15 ឧសភា 2012

វិនិយោគបរទេសបានធ្លាក់ស្រុតចុះ៦ខែបន្តបន្ទាប់គ្នា

វិនិយោគបរទេសនៅក្នុងប្រទេសចិនបានធ្លាក់ស្រុតចុះ៦ខែបន្តបន្ទាប់គ្នា

REUTERS/Tyrone Siu

ដោយ សៀក សារិន

វិនិយោគបរទេសដោយផ្ទាល់ Investissements Directs Etrangers នៅក្នុងប្រទេសចិនបានស្គាល់ការធ្លាក់ស្រុតចុះទៀតនៅខែមេសាឆ្នាំ២០១២។ ទាំងនេះបានធ្វើឲ្យការបោះទុនធ្វើវិនិយោគបរទេសដោយផ្ទាល់ ធ្លាក់ចុះ៦ខែបន្តបន្ទាប់គ្នា។ នេះជាតួលេខផ្សាយឲ្យដឹងនៅថ្ងៃអង្គារទី១៥ឧសភាដោយក្រសួងពាណិជ្ជកម្មចិន។

សេចក្តីរាយការណ៍របស់ សៀក សារិន

ស្តាប់ (01:30)

15/05/2012 by សៀក សារិន

នៅខែមេសាឆ្នាំ២០១២កន្លងទៅនេះ ការបោះទុនធ្វើវិនិយោគបរទេសដោយផ្ទាល់ Investissements Directs Etrangers នៅក្នុងប្រទេសចិនមានប្រមាណ៨,៤ពាន់លានដុលា្លរ ឬបានសេចក្តីថា បានធ្លាក់ស្រុតចុះអស់០,៧%ក្នុង១ឆ្នាំ។

ដូច្នេះ សម្រាប់រយៈកាលបួនខែនៃឆ្នាំ២០១២នេះ វិនិយោគបរទេសដោយផ្ទាល់ នៅក្នុងប្រទេសចិនមាន៣៧,៩ពាន់លានដុលា្លរ ឬបានធ្លាក់ស្រុតចុះអស់២,៤%បើប្រៀបផ្ទឹមទៅនឹងរយៈកាលដដែលនៅឆ្នាំ២០១១។

ការបោះទុនធ្វើវិនិយោគដែលមានប្រភពចេញពីសហភាពអឺរ៉ុបបានថយស្រុតចុះអស់២៧,៩%ក្នុង១ឆ្នាំ បើគេប្រៀបផ្ទឹមជាមួយតួលេខកាលពីឆ្នាំទៅ។
ផ្ទុយទៅវិញ ការបោះទុនធ្វើវិនិយោគដែលមានប្រភពចេញពីសហរដ្ឋអាមេរិកបែរជាបានកើនឡើងប្រមាណ១,៩%។

គួរកត់សម្គាល់ថា ភាគច្រើននៃវិនិយោគបរទេសដោយផ្ទាល់ Investissements Directs Etrangers នៅក្នុងប្រទេសចិន មានប្រភពចេញពីតំបន់អាស៊ី មានដូចជាប្រទេសជប៉ុន កូរ៉េខាងត្បូង ហុងកុង ម៉ាកាវ តៃវ៉ាន់ ឬចេញពីប្រទេសអាស៊ីអាគ្នេយ៍សំខាន់ៗប្រាំគឺ សិង្ហបុរី ម៉ាឡេស៊ី ថៃ ហ្វីលីពីន និងឥណ្ឌូនេស៊ី។

ដូច្នេះ ឃើញថាការបោះទុនធ្វើវិនិយោគបរទេសដោយផ្ទាល់ Investissements Directs Etrangers នៅក្នុងប្រទេសចិនបានស្គាល់ការធ្លាក់ស្រុតចុះ ស្របតាមចលនាថយស្រុតចុះនៃកំណើនសេដ្ឋកិច្ចរបស់មហាអំណាចសេដ្ឋកិច្ចទីពីរពិភពលោក ដែលកំពុងត្រូវប្រឈមមុខទល់នឹងការលំបាកនៃការនាំចេញទៅកាន់ទីផ្សារអឺរ៉ុបដែលកំពុងមានវិបត្តិសេដ្ឋកិច្ចនិងវិបត្តិហិរញ្ញវត្ថុ ហើយដែលជាទីផ្សារទីមួយរបស់ខ្លួនផងទៀត៕