តើរូបិយវត្ថុអ្វីនឹងត្រូវប្រើប្រាស់ក្នុងផ្សារភាគហ៊ុនកម្ពុជា?
នៅក្នុងខណៈពេលដែលផ្សារភាគហ៊ុនកម្ពុជាគ្រោងនឹងបើកទ្វារនៅក្នុងឆ្នាំនេះ ភាពចម្រូងចម្រាសរឿងការប្រើប្រាស់រូបិយវត្ថុក្នុងផ្សារភាគហ៊ុនកំពុងកើតមានឡើង។ តើគេគួរប្រើប្រាស់លុយរៀលខ្មែរ? លុយដុល្លារអាមេរិក? ឬគួរការប្រើប្រាស់រូបិយវត្ថុទាំងពីររួមគ្នា?។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ គី សុខលីម ពីទីក្រុងភ្នំពេញ
បន្ទាប់ពីលើកពេលម្តងជាពីរដងរួចមក មន្រ្តីជាន់ខ្ពស់នៃរាជរដ្ឋាភិបាលកម្ពុជាបានអោយដឹងថា ផ្សារភាគហ៊ុនខ្មែរអាចនឹងដាក់អោយដំណើរការជាផ្លូវការនៅខែកក្កដាខាងមុខនេះ។
ស្របពេលដែលនីតិវិធីច្បាប់រៀបចំការបង្កើតផ្សារភាគហ៊ុនកំពុងធ្វើដំណើរទៅមុខ ការជជែកគ្នាអំពីការប្រើប្រាស់រូបិយវត្ថុនៅក្នុងផ្សារភាគហ៊ុនត្រូវបានអ្នកជំនាញរៀបចំឡើងជារឿយៗ ប៉ុន្តែរហូតមកដល់ពេលនេះ នៅមិនទាន់មានការសម្រេចយ៉ាងណានៅឡើយទេ។ ការសម្រេចជាផ្លូវការមិនទាន់មានមែន ប៉ុន្តែអ្នកជំនាញបានបង្ហើបអោយដឹងជាមុនថា ការប្រើប្រាស់រូបិយវត្ថុនៅក្នុងទីផ្សារមូលប័ត្រកម្ពុជាអាចមានជម្រើសបីយ៉ាងផ្សេងគ្នា។
ទីមួយ៖ ការប្រើប្រាស់លុយរៀលខ្មែរ។ ទីពីរ៖ការប្រើប្រាស់ប្រាក់ដុល្លារអាមេរិក និងទីបី ៖ ការប្រើប្រាស់រូបិយវត្ថុទាំងពីររួមគ្នា។ ការសម្រេចយកជម្រើសណាមួយសុទ្ធតែមានគុណសម្បត្តិ និងគុណវិបត្តិរៀងៗខ្លួន។
ជម្រើសទីមួយ យកប្រាក់រៀលគឺអនុញ្ញាតអោយប្រទេសកម្ពុជាអាចរក្សាអធិបតេយ្យជាតិ និងអត្តសញ្ញាណជាតិ ប៉ុន្តែការទូទាត់អាចជួបការលំបាក ពីព្រោះប្រាក់ដុល្លារអាមេរិកាំងមានវត្តមានច្រើនជ្រុលនៅកម្ពុជា។
ជម្រើសទីពីរ យកប្រាក់ដុល្លារ គឺបង្កការងាយស្រួលដល់ការធ្វើពាណិជ្ជកម្ម និងការទូទាត់ផ្សេងៗ ប៉ុន្តែប្រការនេះអាចរុញច្រានអោយប្រាក់ដុល្លាររឹតតែមានវត្តមានកាន់តែច្រើននៅក្នុងសេដ្ឋកិច្ចរបស់ខ្មែរ។ សព្វថ្ងៃនេះ ប្រាក់ដុល្លារ៩០ភាគរយបាននិងកំពុងធ្វើចរាចរណ៍នៅក្នុងសេដ្ឋកិច្ចរបស់ខ្មែរ។ នេះបើយោងតាមការបញ្ជាក់របស់លោក ហង់ ជួនណារ៉ុន រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ។
រីឯជម្រើសទីបី ៖ គឺការប្រើប្រាស់រូបិយវត្ថុទាំងពីរពោល គឺដុល្លារផង និងលុយរៀលផង។ ការជ្រើសរើសយកជម្រើសទីបីនេះ គឺបើកផ្លូវអោយប្រទេសកម្ពុជាអាចរក្សាអធិបតេយ្យជាតិបានផង និងងាយស្រួលក្នុងការទូទាត់ផង។
ទាក់ទងទៅនឹងការប្រើប្រាស់រូបិយវត្ថុនៅក្នុងទីផ្សារមូលប័ត្រកម្ពុជានាពេលអនាគត លោក ហង់ ជួនណារ៉ុន រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានបញ្ជាក់នៅក្នុងសន្និសីទអន្តរជាតិ ស្តីពីកម្ពុជា ៖ ប្រទេសមួយមានរូបិយវត្ថុច្រើនបិទបញ្ចប់ទៅវិញកាលពីម្សិលមិញថា ក្រសួងសេដ្ឋកិច្ចនិងហិរញ្ញវត្ថុ និងធនាគារជាតិបានដាក់បញ្ហានេះជូនលោកនាយករដ្ឋមន្រ្តី ហ៊ុន សែន រួចហើយ ប៉ុន្តែការសម្រេចយ៉ាងណានោះគេនៅមិនទាន់ដឹងនៅឡើយទេ។
អ្នកជំនាញបរទេសមួយចំនួននៅក្នុងសន្និសីទអន្តរជាតិកម្ពុជា ៖ ប្រទេសមួយមានរូបិយវត្ថុច្រើនបានលើកឡើងថា ប្រទេសក្នុងទ្វីបអាស៊ីមួយចំនួនមានវត្តមានប្រាក់ដុល្លារច្រើនដែរក្នុងសេដ្ឋកិច្ចរបស់គេ ប៉ុន្តែនៅពេលដែលផ្សារហ៊ុនបើកអោយដំណើរការ រដ្ឋាភិបាលសម្រេចអោយប្រើប្រាស់រូបិយវត្ថុជាតិតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ