និស្សិតពេទ្យប្តេជ្ញាមិនចូលប្រឡងបញ្ចប់ថ្នាក់ជាតិ ប្រសិនបើគ្មានដំណោះស្រាយ
និស្សិតពេទ្យនៃសាកលវិទ្យាល័យវិទ្យាសាស្ត្រសុខាភិបាល នៅព្រឹកថ្ងៃសៅរ៍នេះ បានប្តេជា្ញថាមិនចូលប្រលងបញ្ចប់ថ្នាក់ជាតិដូចដែលសាកលវិទ្យាល័យតម្រូវនោះឡើយ។ ការប្តេជ្ញានេះបានធ្វើឡើងក្រោយពីទីស្តីការគណៈរដ្ឋមន្ត្រីបានចេញលិខិតមួយ កាលពីថ្ងៃសុក្រ ម្សិលមិញដោយតម្រូវឲ្យនិស្សិតពេទ្យទាំងអស់ដែលបញ្ចប់ការសិក្សា ត្រូវតែចូលរួមការប្រឡងបញ្ចប់ថ្នាក់ជាតិ។ និស្សិតពេទ្យបានអះអាងថា ខ្លួននឹងនៅតែបន្តការតវ៉ាជារៀងរាល់ថ្ងៃរហូតទល់តែមានដំណោះស្រាយដែលអាចទទួលយកបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ក្រុមនិស្សិតពេទ្យនៃសាកលវិទ្យាល័យវិទ្យាសាស្ត្រសុខាភិបាលប្រមាណ ៥០នាក់ នៅថ្ងៃសៅរ៍ទី១៩ មេសានេះ នៅតែលើកគ្នាបន្តតវ៉ាទាមទារឲ្យសាកលវិទ្យាល័យលើកលែងការប្រឡងបញ្ចប់ថ្នាក់ជាតិ ដល់ពួកគេ។
លោក ដា រីញែល តំណាងឲ្យក្រុមនិស្សិតតវ៉ា បានប្រាប់វិទ្យុបារាំងអន្តរជាតិ RFI ថា ក្រុមនិស្សិតពេទ្យដែលមកតវ៉ានេះ ជានិស្សិតជំនាន់ទី ៣៤ ដែលបានបញ្ចប់ការសិក្សានៅក្នុងឆ្នាំ២0១៣។ លោកបន្តថា មូលហេតុដែលក្រុមនិស្សិតរបស់លោកលើកគ្នាតវ៉ា ដោយសារសាកលវិទ្យាល័យបានអនុវត្តផ្ទុយទៅអនុក្រឹត្យរបស់រដ្ឋាភិបាល ដែលតម្រូវឲ្យមានការប្រឡងបញ្ចប់ថ្នាក់ជាតិតាំងពីឆ្នាំ២០០៧ តែសាកលវិទ្យាល័យទើបយកមកអនុវត្តនៅក្នុងឆ្នាំ ២០១៤នេះ។
តំណាងក្រុមនិស្សិតតវ៉ារូបនេះបានសម្តែងការព្រួយបារម្ភថា ក្នុងការប្រឡងបញ្ចប់ថ្នាក់ជាតិលើកដំបូងនេះ ពួកគេមិនទាន់ដឹងពីរបៀបនៃការប្រឡង ពេលវេលាត្រៀមប្រឡងក៏មិនគ្រប់គ្រាន់ និងតម្លៃទិញពាក្យប្រឡងក៏មានតម្លៃខ្ពស់ថែមទៀត។ បើតាមលោក ដា រីញែល ពាក្យប្រឡងមានតម្លៃដល់ទៅ១២៥ដុល្លារ ក្នុងមួយច្បាប់។ លោក ដា រីញែលបានបញ្ជាក់ថា ក្រុមនិស្សិតពេទ្យនឹងធ្វើពហិកាមិនចូលប្រឡងបញ្ចប់ថ្នាក់ជាតិ ដែលនឹងត្រូវធ្វើឡើងនៅថ្ងៃទី២៦ មេសានេះនោះទេ ហើយព្រមានថា នឹងនៅតែបន្តតវ៉ារហូតមានដំណោះស្រាយ ។
កាលពីថ្ងៃសុក្រ ម្សិលមិញ ស្របពេលដែលក្រុមនិស្សិតពេទ្យនៅតែបន្តតវ៉ានៅពីមុខសាកលវិទ្យាល័យវិទ្យាសាស្ត្រសុខាភិបាលនោះ ទីស្តីការគណៈរដ្ឋមន្ត្រីបានផ្ញើលិខិតតបមួយទៅកាន់រដ្ឋមន្ត្រីក្រសួងសុខាភិបាល លោក ម៉ម ប៊ុនហេង។ ក្នុងលិខិតនោះ ទីស្តីការគណៈរដ្ឋមន្ត្រីបានឯកភាពតាមសំណើរបស់ក្រសួងសុខាភិបាល ដោយតម្រូវឲ្យនិស្សិតដែលទើបបានបញ្ចប់ការសិក្សាថ្នាក់វេជ្ជបណ្ឌិតទូទៅ បរិញ្ញាបត្រឱសថ និងទន្តបណ្ឌិតទាំងអស់ ត្រូវចូលរួមការប្រឡងបញ្ចប់ថ្នាក់ជាតិ។ ចំពោះនិស្សិតដែលមិនទាន់បានប្រឡងបញ្ចប់ថ្នាក់ជាតិជាស្ថាពរ ក្រសួងមិនទទួលពាក្យសុំប្រឡងជ្រើសរើសក្របខណ្ឌជាមន្ត្រីរាជការ និងមិនអាចប្រកបវិជ្ជាជីវៈសុខាភិបាលបាននោះទេ។
សាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល និង លោក ម៉ម ប៊ុនហេង រដ្ឋមន្ត្រីក្រសួងសុខាភិបាល មិនអាចទាក់ទងសុំបំភ្លឺបានទេ នៅថ្ងៃសៅរ៍ ទី១៩ មេសានេះ។ ក៏ប៉ុន្តែ លោក ម៉ម ប៊ុនហេង ធ្លាប់បានចុះទៅជួបជាមួយក្រុមនិស្សិតតវ៉ាម្តង កាលពីកើតមានការតវ៉ាដំបូង នៅមុនចូលឆ្នាំខ្មែរ។ ពេលនោះ លោក ម៉ម ប៊ុនហេង បានមានប្រសាសន៍ថា គ្រប់និស្សិតទាំងអស់ទាំងរដ្ឋ និង ឯកជន ត្រូវប្រឡងបញ្ចប់ថ្នាក់ជាតិ ក្រោយពីរៀនចប់ដើម្បីបញ្ជាក់ពីសមត្ថភាព និងកម្រិតនៃការអប់រំមុនចេញប្រកបវិជ្ជាជីវៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ