កម្ពុជា -

អត្ថបទចុះផ្សាយនៅថ្ងៃ សុក្រ 06 កក្កដា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 10 កក្កដា 2012

គ.ជ.ប.៖ លោកសមរង្ស៊ីនឹងមិនអាចឈរឈ្មោះបោះឆ្នោតនៅឆ្នាំ២០១៣បានទេ

លោកសមរង្ស៊ីនឹងមិនអាចឈរឈ្មោះបោះឆ្នោតនៅឆ្នាំ២០១៣បានទេ

RFI

ដោយ លី ម៉េងហួរ

លោក អ៊ឹម សួស្តី ប្រធាន គ.ជ.ប. បានប្រកាសក្នុងសន្និសីទកាសែត ជាចំហ នៅព្រឹកថ្ងៃសុក្រនេះ ដោយសំដៅលើលោកសមរង្ស៊ី ប្រធានគណបក្សប្រឆាំង ដែលកំពុងនិរទេសខ្លួននៅក្រៅប្រទេស និងត្រូវតុលាការកាត់ទោសកំបាំងមុខ ដាក់ពន្ធនាគារ ថាលោកនឹងមិនមានសិទ្ធិឈរឈ្មោះបោះឆ្នោតតំណាងរាស្ត្រ នៅឆ្នាំ២០១៣ឡើយ។ លោក សម រង្ស៊ី ត្រូវបានជាប់ឈ្មោះជាទណ្ឌិត បន្ទាប់ពីមានសាលក្រមស្ថាពររបស់តុលាការកំពូល ទាក់ទងទៅនឹងការដកតម្រុយបង្គោលព្រំដែន នៅស្រុកចន្ទ្រា ខេត្តស្វាយរៀងកាលពីចុងឆ្នាំ២០០៩។

សេចក្តីរាយការណ៍របស់លី ម៉េងហួរ

ស្តាប់ (01:49)

06/07/2012 by លី ម៉េងហួរ

ប្រធានគ.ជ.ប. លោក អ៊ឹម សួស្តី បានលើកឡើងថា តាមច្បាប់ បុគ្គលដែលជាប់ឈ្មោះជាទណ្ឌិត ដោយអំណាចសាលក្រមតុលាការ ចូលជាស្ថាពររួចហើយនោះ ពុំមានសិទ្ធិបោះឆ្នោត និងមិនមានសិទ្ធិឈរឈ្មោះឲ្យគេបោះឆ្នោតឡើយ។ ករណីនេះ គេសំដៅដល់លោកសមរង្ស៊ី ប្រធានគណបក្សប្រឆាំង នៅកម្ពុជា ដែលកំពុងនិរទេសខ្លួន នៅក្រៅប្រទេស គេចចេញពីការផ្តន្ទាទោសកំបាំងមុខ ក្នុងការដកតម្រុយបង្គោលព្រំដែនកម្ពុជា-វៀតណាម កាលពីចុងឆ្នាំ២០០៩។ ក្នុងសន្និសីទកាសែត នៅព្រឹកមិញ លោក អ៊ឹម សួស្ដី បានឆ្លើយតបនឹងសំណួររបស់អ្នកកាសែត ដោយពន្យល់ពីច្បាប់ទូទៅ មិនចេញឈ្មោះលោកសមរង្ស៊ីឡើយ។

ចំពោះការបន្តឃោសនា និងធ្វើនយោបាយពីក្រៅប្រទេសរបស់លោកសមរង្ស៊ី ត្រូវបានលោក អ៊ឹម សួស្តី លើកឡើងថា គ.ជ.ប នឹងពិនិត្យលើច្បាប់ឡើងវិញ ពីព្រោះថា នៅក្នុងច្បាប់គ្រប់គ្រងគណបក្សនយោបាយ និងច្បាប់បោះឆ្នោត មិនបានលើកឡើង។ ករណីលោកសមរង្ស៊ី ជាករណីមួយ ដែលទើបនឹងកើតមាន។

សូមបញ្ជាក់ថា លោក សម រង្ស៊ី ប្រធានគណបក្សប្រឆាំង កំពុងនិរទេសខ្លួននៅក្រៅប្រទេស។ តុលាការ បានផ្ដន្ទាទោសកំបាំងមុខលោកដាក់ពន្ធនាគារសរុបជាង ១០ ឆ្នាំ លើសំណុំរឿងជាច្រើនពាក់ព័ន្ធព្រំដែនកម្ពុជា-វៀតណាម។ ក្នុងសន្និសីទកាសែត នៅព្រឹកមិញ គ.ជ.ប. ក៏បានប្រកាសពីការចុះឈ្មោះអ្នកបោះឆ្នោតថ្មី ដែលនឹងត្រូវធ្វើឡើង រយៈពេល ៤២ ថ្ងៃ ចាប់ពីថ្ងៃទី១កញ្ញា ដល់ថ្ងៃទី១២តុលា។ បញ្ជីបោះឆ្នោតថ្មីនេះ នឹងត្រូវប្រើប្រាស់សម្រាប់ការបោះឆ្នោតតំណាងរាស្ត្រ ឬការបោះឆ្នោតរដ្ឋសភា នាថ្ងៃទី២៨កក្កដាឆ្នាំ២០១៣។
គ.ជ.ប. ក៏បានប្រកាសពីចំនួនអាសនៈរដ្ឋសភា អាណត្តិទី៥ ដែលត្រូវបោះឆ្នោត នៅឆ្នាំ២០១៣ មានចំនួន ១២៣ រូប ដូចអាណត្តិទី៣ និងទី៤៕