Delicious
Digg
Facebook
Twitter
Yahoo!
Technorati
កម្ពុជា-វៀតណាម -
អត្ថបទចុះផ្សាយនៅថ្ងៃ សៅរ៍ 04 សីហា 2012 -
ព័ត៌មានទើបកែប្រើលើកចុងក្រោយ ថ្ងៃ សៅរ៍ 04 សីហា 2012
នាយករដ្ឋមន្ត្រីឡើងបំភ្លឺសភារឿងព្រំដែនថ្ងៃព្រហស្បតិ៍សប្តាហ៍ក្រោយ
លោកនាយករដ្ឋមន្ត្រីប្រកាសថា លោកត្រូវការ៤ម៉ោងសម្រាប់ពន្យល់លម្អិតការងារព្រំដែន
( Photo : Reuters )
លោកនាយករដ្ឋមន្ត្រី ហ៊ុន សែន នឹងឡើងបំភ្លឺដោយផ្ទាល់មាត់ចំពោះមុខរដ្ឋសភាជាតិអំពីការបោះបង្គោលព្រំដែនជាមួយប្រទេសវៀតណាមនៅថ្ងៃព្រហស្បតិ៍សប្តាហ៍ក្រោយនេះ។ នេះបើយោងតាមរបៀបវារៈដែលបានគ្រោងទុក និងដែលរដ្ឋសភាបានប្រកាសឲ្យដឹងនៅចុងសប្តាហ៍នេះ។ ការឡើងទៅបំភ្លឺបញ្ហាព្រំដែនរបស់ប្រមុខរដ្ឋាភិបាលបានធ្វើឡើងតាមសំណើរបស់អ្នកតំណាងរាស្ត្រគណបក្សប្រឆាំងដែលតែងចោទរដ្ឋាភិបាលថាធ្វើឲ្យបាត់បង់ទឹកដី។
ការឆ្លើយបំភ្លឺដោយផ្ទាល់មាត់ពីសំណាក់ប្រមុខរដ្ឋាភិបាលអំពីការបោះបង្គោលព្រំដែនជាមួយវៀតណាមត្រូវបានរដ្ឋសភាកំណត់កាលបរិច្ឆេទរួចហើយគឺនៅថ្ងៃព្រហស្បតិ៍ទី៩សីហាសប្តាហ៍ក្រោយនេះ។ នេះបើយោងតាមសេចក្តីប្រកាសជូនដំណឹងរបស់អគ្គលេខាធិការដ្ឋានរដ្ឋសភា។
លោកនាយករដ្ឋមន្ត្រី ហ៊ុន សែន បានប្រកាសជាមុនរួចស្រេចទៅហើយកាលពីថ្ងៃទី២សីហាថា លោកនឹងចូលទៅឆ្លើយបំភ្លឺបញ្ហានេះដោយផ្ទាល់នៅចំពោះមុខរដ្ឋសភាតបតាមសំណើរបស់គណបក្សប្រឆាំង។ តំណាងរាស្ត្រគណបក្សសម រង្ស៊ីបានកោះអញ្ជើញលោកនាយករដ្ឋមន្ត្រីឲ្យចូលទៅបំភ្លឺអំពីដំណើរការបោះបង្គោលព្រំដែនជាមួយវៀតណាមបន្ទាប់ពីមន្ត្រីទទួលបន្ទុកកិច្ចការព្រំដែនកម្ពុជាបានបង្ហើបអំពីការដោះដូរភូមិមួយចំនួននៅតាមព្រំដែនទៅឲ្យប្រទេសវៀតណាម។ បញ្ហាព្រំដែនក៏បានក្លាយជារឿងរសើបជាថ្មីបន្ទាប់ពីលោកនាយករដ្ឋមន្ត្រី ហ៊ុន សែន និងសមភាគីវៀតណាមលោក ង្វៀន តឹនយុង បានបើកសម្ពោធបង្គោលព្រំដែនថ្មីមួយទៀតរវាងខេត្តកំពតនិងខេត្តកៀងយ៉ាងកាលពីពេលថ្មីៗនេះ។
ការបោះបង្គោលព្រំដែនរវាងកម្ពុជានិងវៀតណាមគឺជារឿងដ៏ចម្រូងចម្រាស់មួយនៅក្នុងឆាកនយោបាយប្រទេសកម្ពុជា។ គណបក្សប្រឆាំងបានហៅការបោះបង្គោលនេះថាជាការធ្វើឡើងក្រោមគំនាបរបស់វៀតណាមដែលធ្វើឲ្យបាត់បង់ទឹកដីខ្មែរជាច្រើន។ បក្សប្រឆាំងតែងចោទរដ្ឋាភិបាលយ៉ាងធ្ងន់ធ្ងររហូតដល់ប្រើពាក្យ«ក្បត់ជាតិ» កាត់ទឹកដីឲ្យវៀតណាមទៀតផង។ ប៉ុន្តែ រដ្ឋាភិបាលតែងបដិសេធការចោទប្រកាន់នេះ។ លោកសម រង្ស៊ីមេដឹកនាំបក្សប្រឆាំងដែលត្រូវបានតុលាការផ្តន្ទាទោសឲ្យជាប់ពន្ធនាគារជិត ១០ឆ្នាំ និងបានរត់គេចទៅក្រៅប្រទេសតាំងពីចុងឆ្នាំ ២០០៩ មកនោះ ក៏ដោយសារតែបញ្ហាព្រំដែននេះដែរ។
ការឆ្លើយបំភ្លឺដោយផ្ទាល់មាត់របស់លោកនាយករដ្ឋមន្ត្រី ហ៊ុន សែន នៅចំពោះមុខរដ្ឋសភា គឺជាព្រឹត្តិការណ៍ដែលគេទន្ទឹងរង់ចាំបំផុត។ លោកនាយករដ្ឋមន្ត្រីបានប្រកាសថា លោកត្រូវការរយៈពេល៤ម៉ោងសម្រាប់ពន្យល់លម្អិតអំពីការងារព្រំដែន និងបានស្នើឲ្យមានការផ្សាយបន្តផ្ទាល់តាមកញ្ចក់ទូរទស្សន៍ដើម្បីឲ្យប្រជាពលរដ្ឋបានស្តាប់ទូទាំងប្រទេសទៀតផង។
ព្រឹត្តិការណ៍នេះក៏បានធ្វើឡើងខណៈដែលការងារបោះបង្គោលព្រំដែនគោករវាងកម្ពុជានិងវៀតណាមត្រូវគេគ្រោងនឹងបញ្ចប់នៅដំណាច់ឆ្នាំ ២០១២ នេះ។ ប្រទេសទាំងពីរក៏គ្រោងនឹងបន្តការវាស់វែងខណ្ឌសីមាព្រំដែនទឹកជាបន្តទៀត។ ដូច្នេះ ការឆ្លើយបំភ្លឺរបស់ប្រមុខរដ្ឋាភិបាលអំពីបញ្ហានេះគឺជារឿងចាំបាច់មួយ ប៉ុន្តែ វាទំនងជាមិនអាចធ្វើឲ្យគណបក្សប្រឆាំងស្ងប់ចិត្តបាននោះទេ៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (4)
please also publish on
please also publish on website
បើសិនជាមានការចាក់បញ្ចាំងតាមកញ
បើសិនជាមានការចាក់បញ្ចាំងតាមកញ្ចក់ទូរទស្សគឺជាការប្រសើរ តែសម្រាប់ខ្ញុំចង់អោយការចាក់បញ្ចាំងនេះ ផ្សាយតាំងតែចាប់ផ្ដើមរហូតដល់បញ្ចប់ ពេលវេលាប្រជុំ មិនគួរចាក់ផ្សាយតែត្រង់សម្ដី នាយករដ្ឋមន្រ្ដីនិយាយនោះទេ
រឿងបំភ្លឺនៅរដ្ឋសភារបស់រដ្ឋមន្
រឿងបំភ្លឺនៅរដ្ឋសភារបស់រដ្ឋមន្ត្រីខ្មែរ ច្រើនតែនិយាយតែម្នាក់ឯង ហាមមិនឲ្យគេសួរ។ គ្មានន័យទែ។
អ្នកសួរចេះតែសួរ
អ្នកសួរចេះតែសួរ អ្នកចាំឆ្លើយមិនប្រាកដថាអាចចេះតែឆ្លើយរួចភ្លាមៗនោះទេ ។ បើឆ្លើយមិនចេញភ្លាមគេគិតថាខ្លួនហ្នឹងថាត្រូវហើយ ។ រួចបើសិនជាគេមកសួរយើងភ្លាមៗនូវអ្វីដែលយើងមិនបានព្រៀងទុក សួរថាយើងអាចឆ្លើយបានអត់ ។
ប្រតិកម្មជុំវិញអត្ថបទនេះ