សមាគមអ្នកប្រជាធិបតេយ្យ ៖ លោកម៉ម សូណង់ដូមិនបាននៅពីក្រោយចលនាប៊ុន រដ្ឋា
សមាគមអ្នកប្រជាធិបតេយ្យបានសម្រេចចិត្តរៀបចំសន្និសីទកាសែតនៅព្រឹកថ្ងៃសុក្រនេះ ដើម្បីច្រានចោលរាល់ការចោទប្រកាន់ដែលថា លោកម៉ម សូណង់ដូប្រធានសមាគមអ្នកប្រជាធិបតេយ្យគឺជាអ្នកទទួលខុសត្រូវលើសកម្មភាពកាន់កាប់ដីរដ្ឋខុសច្បាប់នៅក្នុងឃុំកំពង់ដំរីខេត្តក្រចេះ។ សន្និសីទកាសែតត្រូវបានរៀបចំធ្វើ នៅពេលដែលមានព័ត៌មានថា លោកម៉ម សូណង់ដូដែលកំពុងនៅបរទេសមានគម្រោងមកកម្ពុជាក្នុងសប្តាហ៍ក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
លោកម៉ម សូណង់ដូដែលជាប្រធានវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យមិនបាននៅពីក្រោយចលនានៅភូមិប្រម៉ាឃុំកំពុងដំរីខេត្តក្រចេះនោះឡើយ។ នេះជាការប្រកាសរបស់លោកជា បំរ៉ុងអនុប្រធានសមាគមអ្នកប្រជាធិបតេយ្យនៅព្រឹកថ្ងៃសុក្រនេះ នៅក្នុងសន្និសីទកាសែត។
លោកជា បំរ៉ុងបានបញ្ជាក់ថា ការប្រព្រឹត្តរបស់ ប៊ុន រដ្ឋាមិនមានពាក់ព័ន្ធ និងមិនមានបទបញ្ជាពីលោក ម៉ម សូណង់ដូនោះទេ ពីព្រោះលោកម៉ម សូណង់ដូបានចាកចេញពីប្រទេសកម្ពុជា មុនព្រឹត្តិការណ៍ ដែលរដ្ឋាភិបាលតាមចាប់ប៊ុន រដ្ឋា នោះទៅទៀត។
ការអះអាងរបស់មន្ត្រីសមាគមអ្នកប្រជាធិបតេយ្យនៅពេលនេះបានធ្វើឡើង បន្ទាប់ពីលោក នាយករដ្ឋមន្ត្រី ហ៊ុន សែន បានប្រកាសចាត់វិធានការតាមផ្លូវច្បាប់ប្រឆាំងប្រធានសមាគម អ្នកប្រជាធិបតេយ្យ ក្រោមបទចោទប្រកាន់ថា បានបំផុសប្រជាជនឲ្យចាប់ដីខុសច្បាប់នៅភូមិប្រម៉ា ឃុំកំពង់ដំរីស្រុកឆ្លូងខេត្តក្រចេះ។
បើតាមការបញ្ជាក់របស់អនុប្រធានសមាគមអ្នកប្រជាធិបតេយ្យ លោកម៉ម សូណង់ដូដែលសព្វថ្ងៃកំពុងស្ថិតនៅសហរដ្ឋអាមេរិកនឹងវិលត្រឡប់មកកម្ពុជានៅសប្តាហ៍ក្រោយ។
សូមរម្លឹកថា កាលពីថ្ងៃទី១៦ឧសភា រដ្ឋាភិបាលបានបង្ក្រាបមនុស្សមួយក្រុមដែលរដ្ឋាភិបាលចាត់ទុកថា ពួកគេមានចេតនាបង្កើតតំបន់អបគមន៍ នៅក្នុងភូមិប្រម៉ាឃុំកំពង់ដំរីខេត្តក្រចេះដោយសារតែពួកគេបានចាត់ចែងបែងចែកដីធ្លីអោយប្រជាជនជំនួសអាជ្ញាធរ។
នៅក្នុងហេតុការណ៍បង្ក្រាបនោះ មានជនសង្ស័យ ៥ នាក់ត្រូវបានប៉ូលិសតាមចាប់ខ្លួន។ បើតាមការបញ្ជាក់របស់លោកនាយករដ្ឋមន្ត្រីមានមនុស្សពាក់ព័ន្ធមួយចំនួនបានចេញសារភាពហើយ ហើយពួកគេត្រូវបានបង្វែរអោយធ្វើជាសាក្សី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ