បន្ទុកធ្ងន់របស់ក្រុមប្រឹក្សាជាតិអន្តរកាល ក្រោយមរណភាពកាដាហ្វី
រំដោះលីប៊ីទាំងស្រុងចេញផុតពីក្រញាំដៃជនផ្តាច់ការ ! នឹងត្រូវប្រកាសនៅថ្ងៃស្អែក ពីទីក្រុងបិនហ្កាហ្ស៊ី ! នេះបើយោងតាមអ្នកទទួលខុសត្រូវរបស់ក្រុមប្រឹក្សាជាតិអន្តរកាល CNT។ CNT ដែលមានភារៈរៀបចំបង្កើតរដ្ឋាភិបាលអន្តរកាល និងបង្រួបបង្រួមក្រុមយុទ្ធជនបដិវត្តន៍។ ប៉ុន្តែនេះជាបន្ទុកមួយដ៏ធ្ងន់ធ្ងរ និងលំបាកបំផុតសម្រាប់CNT ព្រោះ មានការប្រេះឆា ក្នុងរង្វង់ក្រុមប្រឹក្សាជាតិផង មានការទាមទាររបស់ប្រមុខយោធាផង និងពួកអ្នកបដិវត្តន៍ផង។
ចុះផ្សាយនៅថ្ងៃ៖
ស្តាប់ - ០២:២៩
ក្រុមប្រឹក្សាជាតិអន្តរកាល នៅទន់ខ្សោយ និងផុយស្រួយណាស់ ជាហេតុធ្វើឲ្យ អាទិភាពចម្បងចំពោះមុខ ដែលត្រូវសម្រេចឲ្យបានយ៉ាងឆាប់បំផុត មានជាអាទិ៍ ការបង្រួបបង្រួមក្រុមប្រដាប់អាវុធទាំងអស់ឲ្យក្លាយជាកងទ័ពជាតិតែមួយ រក្សាសុវត្ថិភាព និងសន្តិសុខជូនជាតិ ដើម្បីបញ្ចៀសសង្គ្រាមស៊ីវិល និងបង្កើតក្បាលម៉ាស៊ីននយោបាយច្បាស់លាស់ ក្លាយជាវិញ្ញាសាដ៏ស្មុគស្មាញបំផុត។
ស្មុគស្មាញខ្លាំង ដោយក្រុមប្រឹក្សាជាតិអន្តរកាលលីប៊ីខ្លួនឯង មានជម្លោះ និងសម្ពាធតានតឹងផ្ទៃក្នុង រវាងសមាជិកជាអ្នកនយោបាយ និងយោធា។ ប្រធានក្រុមប្រឹក្សាជាតិអន្តរកាល លោក ម៉ូស្តាហ្វា អាដែល ហ្សាលីល (Moustapha Abdeljalil) ផ្ទាល់ បានបញ្ជាក់ថាភាពតានតឹង បានកើតឡើង តាំងពីខែកក្កដា ២០១១មក។ លោក ម៉ាមូត ជីប្រីល (Mahmoud Jibril) មេដឹកនាំទីពីររបស់ CNT និងជាអតីតមនុស្សស្និទ្ធនឹងមេដឹកនាំផ្តាច់ការកាដាហ្វី ទើបបានប្រកាសលាលែងចេញពីតំណែងកាលពីថ្ងៃទី ១៩តុលា។
សមាសភាពរបស់CNT មានចរន្តនយោបាយផ្ទុយគ្នាខ្លាំងណាស់ ខ្លះជាអ្នកអ៊ីស្លាមនិយមជ្រុល ជាអ្នកសេរីនិយម ឬជាអតីតមនុស្សរបស់កាដាហ្វី ជាហេតុធ្វើឲ្យមានការមិនទុកចិត្តគ្នាខ្លាំង ក្នុងការបង្កើតរដ្ឋលីប៊ីថ្មី។
បន្ទុកដ៏ធ្ងន់ធ្ងរមួយទៀត និងបន្ទាន់បំផុតដែររបស់អាជ្ញាធរលីប៊ី គឺការគ្រប់គ្រងចរាចរណ៍អាវុធ និងបញ្ចូលយុទ្ធជនបដិវត្តន៍ ជាកងកម្លាំងទ័ពជាតិ។ កងស្វ័យត្រាណ យុទ្ធជនស៊ីវិលបំពាក់អាវុធធ្វើបដិវត្តន៍ ជាច្រើនកង និងក្រុម នៅស្ទើរពេញផ្ទៃប្រទេស ជាចំណែកមួយនៃជ័យជម្នះរបស់CNT។ ពួកគេធ្វើសកម្មភាពដោយឯករាជ្យ ស្តាប់តែមេបញ្ជាការនៅតាមតំបន់ប៉ុណ្ណោះ។ ដូច្នេះនៅពេលផ្សះផ្សាជាតិ មេបញ្ជាការយោធានីមួយៗត្រូវការមានមុខ មានសំឡេង មានតួនាទីក្នុងរដ្ឋាភិបាលថ្មីដែរ។ មេបញ្ជាការនៅទ្រីប៉ូលី ដែលជាមេទ័ពសំខាន់ម្នាក់ និងជាអតីតអ្នកអ៊ីស្លាមនិយមជ្រុលផង បានព្រមានរួចជាស្រេច ថាមិនបណ្តោយឲ្យមានអ្នកឆ្លៀតយកចំណេញពីបដិវត្តន៍នេះឡើយ។
ប៉ុន្តែទោះយ៉ាងណាក្តី ក៏តំណាងCNTនៅក្រុងប៉ារីស បានអះអាងថា លីប៊ី កំពុងស្ថិតនៅលើផ្លូវនៃការស្ថាបនាជាតិឡើងវិញ។ ការស្លាប់របស់កាដាហ្វី និងការរំដោះលីប៊ីបានទាំងស្រុងពីក្រញាំដៃមេដឹកនាំផ្តាច់ការ នឹងត្រូវជួយសម្រួលដល់ការអនុវត្តន៍ ផែនទីចង្អុលផ្លូវរបស់ក្រុមប្រឹក្សាជាតិអន្តរកាល ដែលអនុម័តកាលពីខែសីហា។ មួយខែទៀត នឹងមានការបង្កើតរដ្ឋាភិបាលអន្តរកាល ដែលមានបន្ទុករៀបចំការបោះឆ្នោតដោយសេរី ក្នុងរយៈពេល៨ខែក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ