ភូមា -

អត្ថបទចុះផ្សាយនៅថ្ងៃ សៅរ៍ 27 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 27 តុលា 2012

ពុទ្ធសាសនិកជនភូមាបញ្ចេញសំឡេងទាមទារការយកចិត្តទុកដាក់ពីពិភពលោក

ជនរងគ្រោះពីអំពើហិង្សាសប្តាហ៍នេះ នៅរ៉ាក់ឃីន ប្រទេសភូមា

REUTERS/Soe Zeya Tun

ដោយ អៀង សុខម៉ិញ

ដោយហួសចិត្តនឹងការយកចិត្តទុកដាក់ជ្រុលហួសហេតុពីសំណាក់សហគមន៍អន្តរជាតិទាំងមូល ចំពោះសហគមន៍អ៊ីស្លាមជនជាតិភាគតិចរ៉ូហ៊ីងយ៉ា បណ្តាជនភូមាអ្នកកាន់ពុទ្ធសាសនា នៅ រដ្ឋរ៉ាក់ឃីន បានសម្រេចចិត្តបំបែកទម្លាប់ស្ងៀមស្ងាត់ ជាប្រពៃណី បញ្ចេញកំហឹង ដំឡើងសំឡេង ដើម្បីទាក់ទាញចំណាប់អារម្មណ៍ពិភពលោក កុំឱ្យស្តាប់តែម្ខាង។

សេចក្តីរាយការណ៍របស់ អៀង សុខម៉ិញ

ស្តាប់ (02:27)

27/10/2012

“យើងគ្មានសិទ្ធិនិយាយស្តីអ្វីទេ ! គ្មានមុខនៅឆាកអន្តរជាតិ” ! នេះជាការបរិហាររបស់អគ្គលេខាធិការគណបក្សអភិវឌ្ឍន៍ជាតិរ៉ាឃីន Oo Hla Saw។

នៅពេលមានអំពើហិង្សាផ្ទុះឡើង ដែលជាផ្លូវការ មានស្លាប់យ៉ាងហោចណាស់ ១៥០នាក់ គិតចាប់ពីខែមិថុនាមក ផ្ទះសម្បែង វត្តអារាមពុទ្ធសាសនាត្រូវបំផ្លាញ ជនជាង៧៥០០០នាក់ ភៀសខ្លួនពីភូមិឋាន ទៅផ្តុំនៅទីក្រុង។ ប៉ុន្តែសហគមន៍អន្តរជាតិ អង្គការក្រៅរដ្ឋាភិបាល គិតគូរ និងព្រួយបារម្ភ យកចិត្តទុកដាក់តែលើជីវិតជនជាតិភាគតិចរ៉ូហ៊ីងយ៉ា តែប៉ុណ្ណោះ។ ម្យ៉ាងទៀត បើគ្មានអំពើហិង្សាសហគមន៍និងការភៀសខ្លួនទេ នោះគេមិនអាចហៅរ៉ូហ៊ីងយ៉ាថាជាជនជាតិភាគតិចនៅរ៉ាឃីនបានឡើយ ! នេះបើតាមការអះអាងរបស់ប្រជារ៉ាក់ឃីនម្នាក់ ដែលកំពុងភៀសខ្លួនពីអំពើហិង្សានៅក្រុងស៊ីតវ៉េ។

ដូច្នេះដើម្បីបំបែកភាពស្ងប់ស្ងាត់ មធ្យោបាយមានតែមួយ គឺនាំគ្នាធ្វើបាតុកម្ម។ បាតុកម្មកាលពីសប្តាហ៍មុន នាំមុខដោយព្រះសង្ឃពុទ្ធសាសនា ជាការបង្ហាញអំពីទឹកចិត្តរបស់ក្រុមអ្នកកាន់ព្រះពុទ្ធសាសនា ដែលត្រូវការបណ្តេញពួកអ៊ីស្លាម រ៉ូហ៊ីងយ៉ា ចេញទឹកដីរ៉ាក់ឃីន ពីភូមា!

រ៉ាក់ឃីន ជារដ្ឋដ៏ក្រីក្របំផុតទីពីររបស់ភូមា (ភូមាដែលជាប្រទេសក្រីក្របំផុតនៅលើពិភពលោកស្រាប់ទៅហើយនោះ) មានប្រជាជនជាង៤៤%រស់ក្រោមបន្ទាត់នៃភាពក្រីក្រ។ ប៉ុន្តែសហគមន៍ពុទ្ធសាសនារ៉ាក់ឃីននេះ ដែលរងគ្រោះពីរបបដឹកនាំផ្តាច់ការអស់កន្លះសតវត្សរ៍ និងដែលអាចរួមរស់ដោយសុខសាន្តជាមួយនឹងជាតិសាសន៍ចម្រុះដទៃទៀតបានទាំងអស់ លើកលែងតែពួករ៉ូហ៊ីងយ៉ា ដែលច្រើនជាពួកជ្រុលនិយម ត្រូវត្រដររស់ដោយខ្លួនឯង មិនដែលបានទទួលការគាំទ្រលើកទឹកចិត្តពីអន្តរជាតិទេ។

ថ្វីដ្បិតតែជំនួយអង្គការសហប្រជាជាតិ គ្មានលក្ខណៈប្រកាន់ពូជសាសន៍ ជនជាតិ និងសាសនាក៏ពិតមែន ប៉ុន្តែប្រភពជំនួយមនុស្សធម៌មួយបានទទួលស្គាល់ថាជំនួយមនុស្សធម៌ មួយរយៈពេលប៉ុន្មានឆ្នាំចុងក្រោយនេះគឺសំដៅជាពិសេសទៅជួយតែសហគមន៍រ៉ូហ៊ីយ៉ា។

គួរបញ្ជាក់ថា នៅក្នុងរដ្ឋរ៉ាក់ឃីន មានជនជាតិភាគតិចរ៉ូហ៊ីងយ៉ារស់នៅប្រមាណ ៨០ម៉ឺននាក់។ សហគមន៍រ៉ូហ៊ីងយ៉ានេះ គឺជាអ្នកកាន់សាសនាអ៊ីស្លាម ហើយមិនត្រូវបានរដ្ឋាភិបាលភូមាទទួលស្គាល់ថាជាជនជាតិភាគតិច និងជាពលរដ្ឋភូមាទេ៕