ចិន -

អត្ថបទចុះផ្សាយនៅថ្ងៃ ព្រហស្បតិ៍ 15 មីនា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 15 មីនា 2012

លោក Bo Xilai អ្នកម៉ៅនិយមចិនបែបថ្មី ខ្ទាតចេញពីអំណាច

Bo Xilai, l'Ex N°1 de Chongqing, Chine

ដោយ អៀង សុខម៉ិញ

អន្តរកាលនយោបាយ ជាឱកាសមួយដែលឥស្សរជននយោបាយ នាំគ្នា បញ្ចេញឆ្មុងរៀងៗខ្លួនដើម្បីដណ្តើមយកតួនាទីកំពូលៗ និងសំខាន់ៗ ប៉ុន្តែ នៅប្រទេសចិនអ្វីៗហាក់ត្រូវបានគេរៀបចំរួចស្រេចហើយ និងជាពេលវេលាដ៏គ្រោះថ្នាក់បំផុត ! នេះជាករណីលោកអភិបាលក្រុង ចុងឈីង Bo Xilai។ ជាមនុស្សមានស្នាដៃ មានសមត្ថភាព ជាកូនរបស់មេបដិវត្តម្នាក់ សម័យ ម៉ៅសេទុង ចង់ធ្វើជាគូប្រជែងដណ្តើមតួនាទីប្រធានាធិបតីចិន អណត្តិក្រោយ ប៉ុន្តែ ដោយគ្មានការភ្ញាក់ផ្អើល ជីវិតនយោបាយរបស់ត្រូវបញ្ចប់ ឈឹង តែត្រឹមថ្ងៃនេះ ពោលគឺ៦ខែ មុនថ្ងៃបើកសមាជបក្សលើកទី១៨ទៅទៀត ! បក្សកុម្មុយនិស្តចិន បានប្រកាសដកលោកចេញពីតំណែង ដូចគេដកស្មៅ !

សេចក្តីរាយការណ៍របស់ អៀង សុខម៉ិញ

ស្តាប់ (02:22)

15/03/2012

សេចក្តីប្រកាសដក លោក Bo Xilai ដោយទីភ្នាក់ងារចិនថ្មី នៅវេលាម៉ោង១០ព្រឹក ម៉ោងនៅប្រទេសចិន គឺដូចសំឡេងរន្ទះ ពុះបំបែកជីវិតនយោបាយចិន ! ឥស្សរជនម្នាក់ ដែល អ្នកវិភាគនយោបាយយល់ថាកំពុងប្រកួតប្រជែង យកតួនាទីប្រធានាធិបតីចិន នៅឆ្នាំក្រោយ ស្រាប់តែត្រូវខ្ទាតចេញពីតំណែងជាលេខាបក្សក្រុងចុងឈីង (Chongqing) ដែលមានប្រជាជនរស់នៅប្រមាណ៣០លាននាក់ ក្នុងពេលតែមួយប៉ប្រិចភ្នែក។ តំណែងអភិបាលក្រុងនេះ ត្រូវជំនួសដោយឧបនាយករដ្ឋមន្ត្រី ដែលជាមនុស្សស្និទ្ធ នឹងលោកហ៊ូជិនតាវ ប្រធានាធិបតីបច្ចុប្បន្ន ។

គ្រាន់តែលេចឮដំណឹងនេះភ្លាម ប្រតិកម្មតាមប្រព័ន្ធអ៊ីនធឺណែត Twitter ... បានធ្លាក់មកជាបន្តបន្ទាប់ស្ទើរគាំងស្ទះប្រព័ន្ធ។ បណ្តាជនចិនជាច្រើន ជាពិសេសអ្នកចុងឈីង យល់ថា លោក ប៉ូ ស៊ីឡៃ សក្តិសមជាប្រមុខដឹកនាំប្រទេស ព្រោះមានអំណោយទានពីកំណើត មានសមត្ថភាព មានស្នាដៃច្រើន ធ្លាប់ជារដ្ឋមន្ត្រីក្រសួងពាណិជ្ជកម្ម និងបានបម្រើក្នុងជួរបក្សជាផ្លូវការ តាំងពី១៩៨០មក។

មានអាយុ៦២ឆ្នាំ ជាកូនអ្នកបដិវត្តដំបូងម្នាក់របស់ចិន លោក ប៉ូស៊ីឡៃ ដែលមានប្រជាប្រិយភាពខ្លាំង នៅចុងឈីង និងដែលជួនកាលក្រអើតក្រទមបន្តិចផង បានបង្ហាញមហិច្ឆតា ចង់ក្តោបអំណាចថ្នាក់ជាតិ និងចង់ចូលជាសមាជិក គណៈកម្មាធិការអចិន្ត្រៃយ៍ការិយាល័យនយោបាយ របស់បក្សកុម្មុយនិស្តចិន ដែលជា “បេះដូងនៃអំណាចចិន”ជ្រុលហួសពេក។ ម្យ៉ាងទៀត កាលពីមួយឆ្នាំមុន លោកបានលាតត្រដាងនិន្នាការនយោបាយ ជាអ្នក "ម៉ៅនិយម” ដោយចំហពេក។ ជាហេតុធ្វើឱ្យរដ្ឋាភិបាលក្រុងប៉េកាំងសព្វថ្ងៃ ដែលជាអ្នកកំណែទម្រង់និយម មិនសប្បាយចិត្ត។ អ្នកកំណែទម្រង់និយម ក្រុមរបស់លោក ហ៊ូជិនតាវ ប្រធានាធិបតីបច្ចុប្បន្ន ដែលប្រុងប្រយ័ត្នខ្លាំងនឹងការស្ទុះឡើងនៃក្រុមម៉ៅនិយមបែបថ្មីនេះ (ក្រុមកូនចៅមេបដិវត្តមុនៗ)។

ដូច្នេះ ការដកតំណែងលោក ប៉ូស៊ីឡៃ មិនមែនជារឿងដែលគួរឱ្យភ្ញាក់ផ្អើលពេកទេ។ កាលពីដើម កុម្ភៈ លោកWang Lijun ដៃស្តាំរបស់លោក Bo Xilai ត្រូវបានក្រុងប៉េកាំងដកចេញពី តំណែង បន្ទាប់ពីបានបាត់ខ្លួន និងក្រោយមកបានភៀសខ្លួនទៅជ្រកនៅក្នុងស្ថានកុងស៊ុលអាមេរិកាំង គឺជាការព្រមានលោក ប៉ូស៊ីឡៃ កុំឱ្យស្រមើស្រម៉ៃ ចង់ទៅកាន់កាប់មុនតំណែងកំពូលរួចស្រេចទៅហើយ៕

tags: ចិន