កំណែទម្រង់នយោបាយ នាំភូមាឱ្យរួចទាំងទណ្ឌកម្ម ទាំងបំណុល
សហភាពអឺរ៉ុប នឹងព្យួរទណ្ឌកម្មទាំងអស់ ដែលបានដាក់ប្រឆាំងនឹងភូមាតាំងពីឆ្នាំ១៩៩៦មក លើកលែងតែទណ្ឌកម្មទិញដូរអាវុធយុទ្ធភ័ណ្ឌចេញ ចាប់ពីថ្ងៃទី២៣មេសាទៅ សម្រាប់រយៈពេលមួយឆ្នាំ។ ចំណែកជប៉ុនវិញ នឹងប្រកាសលុបបំណុលដែលភូមាជំពាក់ជាងបីពាន់លានយ៉េនចោល នាឱកាសទស្សនកិច្ចលើកដំបូងរបស់ប្រធានាធិបតីភូមានៅទីក្រុងតូក្យូ ចុងសប្តាហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:១៦
លោកប្រធានាធិបតីភូមា ធេន សេន ជាប្រមុខរដ្ឋភូមាទីមួយ ដែលអញ្ជើញទៅបំពេញទស្សនកិច្ចនៅជប៉ុន ក្នុងរយៈពេល២៨ឆ្នាំចុងក្រោយ។ ជាទស្សនកិច្ចដែលមានគោលដៅស្វែងរកការវិនិយោគ ប៉ុន្តែនាឱកាសជំនួបរវាងនាយករដ្ឋមន្ត្រីជប៉ុនជាមួយលោកប្រធានាធិបតីភូមា ជប៉ុនទំនងជានឹងប្រកាសលុបបំណុល ដែលភូមាជំពាក់ជប៉ុន ទាំងការ ទាំងដើម ចោលទាំងស្រុង ព្រមទាំងផ្តល់ប្រាក់កម្ចី ដើម្បីអភិវឌ្ឍន៍ផ្លូវថ្នល់ ផ្លូវដែក និងកំពង់ផែ ក្នុងទឹកប្រាក់ដែលគេមិនទាន់ដឹងច្បាស់នៅឡើយទេ។
ក្រៅពីការចាប់ផ្តើមចេញមុខលើឆាកអន្តរជាតិរបស់ប្រមុខរដ្ឋ លោកស្រីអ៊ុង សានស៊ូជី ជ័យលាភីរង្វាន់ណូបែលសន្តិភាព ដែលអាក់ខានមិនធ្វើដំណើរចេញពីប្រទេស ព្រោះខា្លចរបបសឹកឆ្លៀតនិរទេសលោកស្រីរហូតនោះ នឹងអញ្ជើញទៅបំពេញទស្សនកិច្ចនៅន័រវេស និងអង់គ្លេស ជាលើកទីមួយដែរ នៅខែមិថុនា ឆ្នាំ២០១២។ ទស្សនកិច្ចរបស់ លោកស្រីនេះ បញ្ជាក់ថាពីទំនុកចិត្តលើការធ្វើកំណែទម្រង់។ ការធ្វើកំណែទម្រង់ពិតៗរបស់រដ្ឋាភិបាលស៊ីវិលភូមាបាននាំមកនូវផ្លែផ្កា យ៉ាងទាន់ហន់។
បន្ទាប់ពីសហរដ្ឋអាមេរិក ដែលបានលើកទណ្ឌកម្មប្រឆាំងនឹងភូមា ទាក់ទងនឹងផ្នែកហិរញ្ញវត្ថុចេញ ដល់វេនសហភាពអឺរ៉ុបម្តងដែលនឹងត្រូវប្រកាសអនុម័តជាផ្លូវការ ព្យួរ ឈប់ដាក់ទណ្ឌកម្មប្រឆាំងនឹងភូមា មួយឆ្នាំ។
កិច្ចព្រមព្រៀងព្យួរទណ្ឌកម្ម ទាំងអស់ លើកលែងតែទណ្ឌកម្មទិញដូរអាវុធចេញ នឹងត្រូវផ្តល់សច្ចាប័នដោយរដ្ឋមន្ត្រីការបរទេស នៅថ្ងៃចន្ទទី២៣មេសា។ សហភាពអឺរ៉ុប បានដាក់ទណ្ឌកម្មភូមា តាំងពីឆ្នាំ១៩៩៦មក ក្រោយពេលដែលរដ្ឋាភិបាលសឹកភូមាបានចាប់ឃុំឃាំងលោកស្រីប្រមុខបក្សប្រឆាំង អ៊ុង សានស៊ូជី។
ទណ្ឌកម្មដែលអឺរ៉ុបដាក់លើភូមា មានអាទិ៍
- ទណ្ឌកម្មលើកការទិញដូរអាវុធយុទ្ធភណ្ឌ
- ហាមឃាត់មិនឱ្យ មនុស្សស្និទ្ធនឹងរបបសឹក ចំនួន៤៩១នាក់ ធ្វើដំណើរមកអឺរ៉ុប
- បិទខ្ទប់ទ្រព្យសម្បតិ្តពួកគេនៅបរទេស
- ហាមឃាត់មិនឱ្យក្រុមហ៊ុន និងអង្គការអឺរ៉ុបធ្វើវិនិយោគ ឬទាក់ទងជាមួយនឹងក្រុមហ៊ុនរដ្ឋភូមា
- ហាមឃាត់មិនឱ្យនាំ ព្រៃឈើ រ៉ែ ត្បូងថ្មមានតម្លៃ ចូលអឺរ៉ុប
- ផ្តល់ជំនួយមានកំរិត
មួយឆ្នាំក្រោយការធ្វើកំណែទម្រង់ដ៏អស្ចារ្យ និងដែលពុំគួរឱ្យជឿពីមុនមក សហភាពអឺរ៉ុប នៅតែមានការប្រុងប្រយ័ត្ន សុខចិត្តព្យួរទណ្ឌកម្ម ជាជាងលើកចេញទាំងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ