លោកអូបាម៉ាលើកចេញនូវទណ្ឌកម្មខ្លះៗពាក់ព័ន្ធនឹងវិនិយោគ
ចុះផ្សាយនៅថ្ងៃ៖
ស្តាប់ - ០៣:០៦
លោកប្រធានាធិបតីអាមេរិកបារ៉ាក់អូបាម៉ាបានសម្រេចលើកចេញនៅថ្ងៃព្រហស្បតិ៍ទី១៧ឧសភាឆ្នាំ២០១២នូវ គំនាបខ្លះៗពាក់ព័ន្ធនឹងការបោះទុនធ្វើវិនិយោគនៅក្នុងប្រទេសភូមា ក៏ប៉ុន្តែរក្សាទុកនូវក្របខ័ណ្ឌគតិយុត្តិនៃទណ្ឌកម្ម។ ទីក្រុងវ៉ាស៊ីនតោនបានសម្រេចពុំធ្វើតាមសហភាពអឺរ៉ុបដែលបានព្យួរទណ្ឌកម្មប្រឆាំងនឹងទីក្រុងរ៉ង់ហ្គូនសម្រាប់រយៈកាលមួយឆ្នាំ គិតតាំងពីខែមេសាកន្លងទៅនេះ។តើហេតុអ្វីបានជារដ្ឋបាលអាមេរិកធ្វើយ៉ាងដូច្នេះ?
បានជារដ្ឋបាលអាមេរិកបានសម្រេចលើកចេញនៅថ្ងៃព្រហស្បតិ៍ទី១៧ឧសភាឆ្នាំ២០១២ នូវគំនាបខ្លះៗពាក់ព័ន្ធនឹងការបោះទុនធ្វើវិនិយោគនៅក្នុងប្រទេសភូមា មកពីសហរដ្ឋអាមេរិកនៅមានការប្រយ័ត្នប្រយែង ហើយលោកប្រធានាធិបតីបារ៉ាក់អូបាម៉ាយល់ថា “ការវិវឌ្ឍន៍ជាវិជ្ជមាននៃកំណែទម្រង់របស់រដ្ឋាភិបាលភូមាបច្ចុប្បន្ននៅមានលក្ខណៈតិចតួចពុំទាន់គ្រប់គ្រាន់។ ពិតមែនតែរដ្ឋាភិបាលភូមាបានខិតខំធ្វើការកែទម្រង់នៅក្នុងវិស័យជាច្រើន មានដូចជាការដោះលែងអ្នកទោសនយោបាយភូមាជាច្រើនរយនាក់ ធ្វើការចរចាពីការឈប់បាញ់គ្នាជាមួយក្រុមកុលសម្ព័ន្ធប្រដាប់អាវុធជាច្រើនក្រុមក្តី ហើយនិងធ្វើការចរចាជាមួយក្រុមបក្សប្រឆាំងភូមាសំខាន់ៗ ដើម្បីអភិវឌ្ឍលទ្ធិប្រជាធិបតេយ្យនៅក្នុងប្រទេសភូមាក៏ដោយ”។
“សហរដ្ឋអាមេរិកនៅតែបន្តគាំទ្រការខិតខំធ្វើកំណែទម្រង់របស់រដ្ឋាភិបាលភូមាបច្ចុប្បន្ន។ ក៏ប៉ុន្តែស្ថានភាពនៅប្រទេសភូមានៅតែជាការគំរាមមួយដល់សន្តិសុខជាតិនិងដល់នយោបាយក្រៅប្រទេសរបស់សហរដ្ឋអាមេរិក”។ នេះជាការថ្លែងបញ្ជាក់របស់លោកប្រធានាធិបតីអាមេរិកបារ៉ាក់អូបាម៉ា។
គួរបញ្ជាក់ថា ប្រមុខបក្សប្រឆាំងភូមាលោកស្រីអ៊ុងសានស៊ូជីបានព្រមានប្រាប់រដ្ឋបាលអាមេរិកកាលពីថ្ងៃពុធទី១៦ឧសភាកន្លងទៅតាមវីដេអូ-សន្និសីទថា “ទីក្រុងវ៉ាស៊ីនតោនពុំត្រូវមានទស្សនៈវិជ្ជមានខ្លាំងពេកទេ”។ ហើយលោកស្រីបក្សប្រឆាំងភូមាបានថ្លែងប្រាប់ទៀតថា “អភិក្រមប្រជាធិបតេយ្យនៅក្នុងប្រទេសភូមាក៏ពុំមែនច្បាស់ជាមានដំណើរឈានទៅមុខរៀងរហូតនោះឡើយ”។
សាររបស់ប្រមុខបក្សប្រឆាំងភូមាលោកស្រីអ៊ុងសានស៊ូជីនេះបានត្រូវលោកប្រធានាធិបតីអាមេរិកបារ៉ាក់អូបាម៉ាទទួលយល់ស្របតាមទាំងស្រុង ដូច្នេះហើយបានជារដ្ឋបាលរបស់លោកអូបាម៉ានៅរក្សាទុកជាធរមាននូវទណ្ឌកម្មសម្រាប់ដាក់ជាយថាហេតុទៅលើទីក្រុងរ៉ង់ហ្គូន។ ក៏ប៉ុន្តែលោកអូបាម៉ាបានលើកចេញនូវគំនាបខ្លះៗពាក់ព័ន្ធនឹងការបោះទុនធ្វើវិនិយោគ ដើម្បីអនុញ្ញាតឲ្យសហគ្រាសអាមេរិកាំងមួយចំនួនអាចទៅប្រកបអាជីវកម្មនៅប្រទេសភូមា។
ដូច្នេះ ទាំងនេះក៏ជាវីធីមួយសម្រាប់ជួយជំរុញឲ្យទីក្រុងរ៉ង់ហ្គូនបន្តដំណើរកែទម្រង់ដើម្បីឈានទៅរកលទ្ធិប្រជាធិបតេយ្យ ហើយក៏ជាចម្លើយឆ្លើយតបមួយដែរធ្វើទៅកាន់វិនិយោគិនអាមេរិកាំងដែលបារម្ភខ្លាចបាត់បង់ទីផ្សារភូមាដ៏សក្តានុពល ហើយដែលកំពុងតែស្គាល់ការដណ្តើមចង់បានដោយគូប្រជែងមកពីទ្វីបអឺរ៉ុបនិងទ្វីបអាស៊ី។
ហើយនៅទីបំផុត នៅថ្ងៃព្រហស្បតិ៍ទី១៧ឧសភាឆ្នាំ២០១២ម្សិលមិញ លោកប្រធានាធិបតីអាមេរិកបារ៉ាក់អូបាម៉ាក៏បានតែងតាំងលោក Derek Mitchell អ្នកជំនាញខាងកិច្ចការអាស៊ី ធ្វើជាឯកអគ្គរដ្ឋទូតអាមេរិកប្រចាំប្រទេសភូមា។ លោក Derek Mitchell ដែលបានខិតខំកាលពីឆ្នាំទៅជំរុញឲ្យមានការខិតជិតរកគ្នារវាងសហរដ្ឋអាមេរិកនិងប្រទេសភូមា។
ដូច្នេះ បើប្រសិនជាមានការយល់ព្រមពីសំណាក់ព្រឹទ្ធសភាអាមេរិក នោះ លោក Derek Mitchell នឹងត្រូវក្លាយទៅជាអ្នកការទូតអាមេរិកទីមួយដែលនឹងឡើងមកកាន់តំណែងជាឯកអគ្គរដ្ឋទូតអាមេរិកាំងប្រចាំប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ