អំពើហិង្សាសហគមន៍កាន់តែរាលដាល ពុទ្ធសាសានិកជនពីរនាក់ចាប់ខ្លួន
អំពើហិង្សាប្រឆាំងនឹងសហគមន៍អ្នកកាន់សាសនាអ៊ីស្លាម បានរាលដាលដល់រដ្ឋកាឈីនតំបន់ភាគខាងជើងប្រទេស ដែលមានបណ្តាជនភាគច្រើនកាន់សាសនាគ្រិស្ត និងដែលពុំធ្លាប់មានជម្លោះជាតិសាសាន៍ដូច្នេះទេ។ ក្នុងអំពើហិង្សានេះ មានអ្នកកាន់ព្រះពុទ្ធសាសានាពីរនាក់ ត្រូវបានចាប់ខ្លួន និងកំពុងសាកសួរចម្លើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
“ប្រដាប់ដោយកាំបិត ដំបង ក្រុមហ្វូងមនុស្សជិះម៉ូតូ ប្រមាណ៣០នាក់ បាននាំគ្នា វាយ ដំលុកលុយបំផ្លិចបំផ្លាញ ហាងទំនិញអ៊ីស្លាម ក្រោមក្រសែភ្នែក ភ័យខ្លាច និងអសមត្ថភាពតទល់របស់ម្ចាស់ហាងជាអ្នកកាន់សាសនាអ៊ីស្លាម ដែលបានត្រឹមពួនមើលពីចម្ងាយ សំងំយកសុខកាយ !” នេះជាសំដីរៀបរាប់របស់អ្នករកស៊ីភូមាកាន់សាសនាអ៊ីស្លាម នៅស្រុកHpakant នៃរដ្ឋកាឈីន។
បណ្តាជនភាគតិចកាឈីន ជាអ្នកគ្រិស្តសាសនិកជន ប៉ុន្តែដោយសារធនធានធម្មជាតិត្បូងថ្មក្រោមដីដ៏សម្បូរបែប រដ្ឋកាឈីនបានទាក់ទាញបណ្តាជនភូមាគ្រប់សហគមន៍ គ្រប់ជនជាតិ និងសាសនាមករស់នៅ ឬតាំងទីរកស៊ីចិញ្ចឹមជីវិត។
រដ្ឋកាឈីន ដែលមានការប្រយុទ្ធគ្នាយ៉ាងសន្ធោសន្ធៅ រវាងកងទ័ពរដ្ឋាភិបាល និងក្រុមឧទ្ទាមជនជាតិភាគតិច កាឈីន អស់រយៈពេលជិតពីរឆ្នាំចុងក្រោយនេះ មិនធ្លាប់ជួបប្រទះអំពើហិង្សាសាសនាទេ។ ប៉ុន្តែ ពេលនេះ ពោលគឺនៅថ្ងៃព្រហស្បតិ៍ម្សិលម្ង៉ៃ សកម្មភាពលួចបំផ្លិចបំផ្លាញប្រឆាំងនឹងផលប្រយោជន៍អ្នកកាន់សាសនាអ៊ីស្លាមបានកើតមានឡើង រហូតជំរុញឱ្យមានការចាប់ខ្លួនមនុស្សពីរនាក់ជាអ្នកកាន់សាសនាព្រះពុទ្ធ មកសួរចម្លើយ។ នេះបើតាមការជូនដំណឹងរបស់ប៉ូលិសភូមា នៅល្ងាចថ្ងៃសុក្រម្សិលមិញ ដោយគូសបញ្ជាក់ថា កងកម្លាំងសន្តិសុខត្រូវបានដាក់ពង្រាយ។
ប៉ុន្តែទោះជាយ៉ាងដូច្នេះក្តី ក៏បណ្តាជនអ្នកកាន់សាសនាអ៊ីស្លាមនៅកាឈីន នៅតែភ័យខ្លាច ព្រោះយល់ថារដ្ឋាភិបាលមិនអាចធានារ៉ាប់រងសុវត្ថិភាពឱ្យបានទាំងស្រុង ឯចលនាស្អប់ខ្ពើមអ្នកកាន់សាសនាអ៊ីស្លាមហាក់មានឬសចាក់គល់ចាក់ចេញក្នុងស្រទាប់បណ្តាជនភូមាអ្នកពុទ្ធសាសនា។ ក្នុងសប្តាហ៍នេះនៅភាគកណ្តាលប្រទេស អំពើហិង្សាប្រភេទនេះបានសម្លាប់មនុស្សម្នាក់។ ៤៣នាក់ កាលពីខែមីនា។ ហើយកាលពីឆ្នាំ២០១២ ការប្រឈមមុខដាក់គ្នារវាងក្រុមអ្នកពុទ្ធសាសនា និងជនជាតិភាគតិចរ៉ូហ៊ីងយ៉ា កាន់សាសនាបានផ្តាច់ជីវិតមនុស្សអស់ប្រមាណ២០០នាក់ និងជនភៀសខ្លួនរាប់សិបពាន់នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ