ភូមា - 
អត្ថបទចុះ​ផ្សាយ​នៅ​ថ្ងៃ អាទិត្យ 01 មេសា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ ចន្ទ 02 មេសា 2012

លោកស្រី អ៊ុង សានស៊ូជី​ជាប់​ឆ្នោត​តំណាងរាស្រ្ត​លើក​ដំបូង​ក្នុង​ជីវិត​នយោបាយ

លោកស្រី អ៊ុង សានស៊ូជី​ជាប់​ឆ្នោត​តំណាងរាស្រ្ត​លើក​ដំបូង​ក្នុង​ជីវិត​នយោបាយ
លោកស្រី អ៊ុង សានស៊ូជី​ជាប់​ឆ្នោត​តំណាងរាស្រ្ត​លើក​ដំបូង​ក្នុង​ជីវិត​នយោបាយ
REUTERS/Damir Sagolj

ដោយ គួច គន្ធារ៉ា

នៅ​ថ្ងៃ​អាទិត្យ ទី១ មេសា​នេះ ភូមា​បាន​រៀប​ចំ​បោះឆ្នោត​សភា​ដើម្បី​ជ្រើសរើស​អ្នក​តំណាងរាស្រ្ត​​ថ្មី​ចំនួន ៤៥រូប។ អ្នកតំណាងរាស្រ្ត​ថ្មី​ទំាង ៤៥រូប​នឹង​​ទៅ​អង្គុយ​កន្លែង​របស់​អ្នកតំណាងរាស្រ្ត​ចាស់​ដែល​បាន​ចូល​ទៅ​បម្រើ​ការងារ​នៅ​ក្នុង​រដ្ឋាភិបាល។ តាម​ព័ត៌មាន​ដែល​ផ្តល់​ដោយ​គណបក្សប្រឆំាង គឺ​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ លោកស្រី អ៊ុង សានស៊ូជី​បាន​ជាប់​ឆ្នោត​តំណាងរាស្រ្ត​នៅ​ក្នុង​មណ្ឌល Kahwmu។ ការ​បោះឆ្នោត​ថ្ងៃ​នេះ​ត្រូវ​បាន​សហគមន៍​អន្តរជាតិ​ចាត់​ទុក​ថា សំខាន់​ខ្លំាង​ណាស់។

បទអន្តរាគមន៍​របស់ គួច គន្ធារ៉ា
 

01/04/2012 by គួច គន្ធារ៉ា

បើ​ពិនិត្យ​ជា​រួម​ទៅ ការ​បោះឆ្នោត​ជ្រើសរើស​តំណាងរាស្រ្ត​ថ្មី​តែ​ចំនួន ៤៥នាក់ នៅ​ក្នុង​ចំណោម​អ្នកតំណាងរាស្រ្ត​ទំាង ៤៤០នាក់​ដែល​មាន​នៅ​ក្នុង​រដ្ឋសភា​ភូមា​បច្ចុប្បន្ន ហាក់​ដូច​ជា​គ្មាន​អ្វី​សំខាន់​ទេ។ ប៉ុន្តែ​ក្រោម​​ភ្នែក​ច្រមុះ​ប្រជាជន​ភូមា​ទូទៅ និង​សហគមន៍​អន្តរជាតិ គឺ​សំខាន់​ខ្លំាង​ណាស់។ សំខាន់ ព្រោះ​មាន​លោកស្រី អ៊ុង សានស៊ូជី ប្រធាន​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ​ចូលរួម ជា​លើកទីមួយ។ គួរ​ជម្រាប​ជូន​ថា ការ​បោះឆ្នោត​សភា​ថ្ងៃ​នេះ​នឹង​មិន​ធ្វើ​ឲ្យ​មាន​ការ​ប្រែប្រួល​ទម្ងន់​សំឡេង​ភាគច្រើន​នៅ​ក្នុង​រដ្ឋសភា​ទេ ពោល​សំឡេង​ភាគច្រើន​ដាច់ខាត​នៅ​តែ​បន្ត​ស្ថិត​ក្នុង​កណ្តាប់​ដៃ​គណបក្ស​របស់​លោក ថេន សេន ដដែល។ តែ​សម្រាប់​សហគមន៍​អន្តរជាតិ អ្វី​ដែល​សំខាន់​នៅ​ចំពោះ​មុខ គឺ​វត្តមាន​លោកស្រី អ៊ុង សានស៊ូជី​នៅ​ក្នុង​រដ្ឋសភា ក្នុង​នាម​ជា​អ្នកតំណាងរាស្រ្ត​ម្នាក់​របស់​គណបក្ស​ប្រឆំាង។

ជោគជ័យ​របស់​លោកស្រី អ៊ុង សានស៊ូជី ក៏​ជា​ជោគជ័យ​របស់​លោក ថេន សេន
 
តាម​ពិត​ទៅ គ្មាន​ហេតុផល​ណា​មួយ​ដែល​លោកស្រី អ៊ុង សានស៊ូជី​មិន​ជាប់​ឆ្នោត​ជា​តំណាងរាស្រ្ត ហើយ​ក៏​គ្មាន​ហេតុផល​ណា​មួយ ដែល​រដ្ឋាភិបាល​ត្រូវ​រារំាង​មិន​ឲ្យ​លោកស្រី អ៊ុង សានស៊ូជី​ក្លាយ​ជា​អ្នកតំណាងរាស្រ្ត​ដែរ។ ផ្ទុយ​ទៅ​វិញ រដ្ឋាភិបាល​គួរ​តែ​ត្រេកត្រអាល​ចំពោះ​ជោគជ័យ​របស់​លោកស្រី អ៊ុង សានស៊ូជី ព្រោះ​ថា ជោគជ័យ​របស់​លោកស្រី អ៊ុង សានស៊ូជី​នៅ​ក្នុង​ការ​បោះឆ្នោត​ថ្ងៃ​នេះ ក៏​​ជា​ជោគជ័យ​របស់​រដ្ឋាភិបាល​ទីក្រុង​ណៃពីដ៏​ខ្លួន​ឯង និង​របស់​អាស៊ាន នៅ​ចំពោះ​មុខ​សហគមន៍​អន្តរជាតិ។ គួរ​រម្លឹក​ជូន​ថា តំាង​ពី​ក្រោយ​ការ​បោះឆ្នោត​សភា​ក្នុង​ខែ​វិច្ឆិកា ឆ្នំា ២០១០ និង​ការ​រំលាយ​ចោល​របបសឹក​ក្នុង​ខែ​មីនា ឆ្នំា ២០១១ ដោយ​ដាក់​ជំនួស​របប​ស៊ីវិល​វិញ​មក លោក​ប្រធានាធិបតី ថេន សេន​បាន​អនុវត្ត​​នយោបាយ​កំណែទម្រង់​ជា​ច្រើន​បន្តបន្ទាប់ រហូត​ធ្វើ​ឲ្យ​គ្រប់​គ្នា​មាន​ការ​ភ្ញាក់ផ្អើល​យ៉ាង​ខ្លំាង។ ដូច្នេះ​ឃើញ​ថា ការ​បោះឆ្នោត​សភា​មួយ​ផ្នែក​ថ្ងៃ​នេះ ក៏​​ជា​ជំហាន​បន្ទាប់​នៅ​ក្នុង​នយោបាយ​បើក​ចំហ​របស់​លោក ថេន សេន​ដែរ។ ម្យ៉ាង​វិញ​ទៀត ជោគវាសនា​របស់​ភូមា​ជាមួយ​សហគមន៍អន្តរជាតិ​នឹង​ស្តែង​ចេញ​តាម​រយៈ​លទ្ធផល​នៃ​ការ​បោះឆ្នោត​ក្នុង​ថ្ងៃ​នេះ ពិសេស គឺ​ការ​លើក​ចេញ​វិញ​នូវ​ទ័ណ្ឌកម្ម​នយោបាយ និង​សេដ្ឋកិច្ច​ដែល​សហភាពអឺរ៉ុប និង​សហរដ្ឋអាមេរិក​បាន​ដាក់​លើ​ភូមា។
 
លោកស្រី អ៊ុង សានស៊ូជី​ត្រូវ​ពង្រឹង​គណបក្ស​សម្រាប់​ការ​បោះឆ្នោត​សភា​នៅ​ឆ្នំា ២០១៥
 
ជោគជ័យ​របស់​លោកស្រី អ៊ុង សានស៊ូជី​ថ្ងៃ​នេះ គឺ​ជា​ការ​បោះ​មួយ​ជំហាន​ទៅ​មុខ​យ៉ាង​វែង​នៅ​ក្នុង​ជីវិត​តស៊ូ​នយោបាយ​របស់​លោកស្រី។ គឺ​មាន​តែ​តាម​ច្រក​រដ្ឋសភា​ទេ ដែល​លោកស្រី​អាច​នឹង​បន្ត​បុព្វហេតុ​របស់​ខ្លួន​ត​ទៅ​មុខ​ទៀត​បាន។ នៅ​ចំពោះ​មុខ មាន​ជម្រើស​ពីរ​ដែល​លោកស្រី​ត្រូវ​ជ្រើសរើស ទីមួយ៖ បញ្ចូល​ខ្លួន​ទៅ​ក្នុង​រដ្ឋាភិបាល​ដោយ​យល់ព្រម​ទទួល​យក​តំណែង​មួយ​នៅ​ក្នុង​ក្រសួង​ណា​មួយ​ដែល​ស្នើ​ឡើង​ដោយ​លោក​ប្រធានាធិបតី ថេន សេន និង​ទីពីរ៖ មិន​ចូល​ក្នុង​រដ្ឋាភិបាល ដោយ​បន្ត​រក្សា​តួនាទី​តំណាងរាស្រ្ត។ តែ​ទោះ​បី​ជា​ក្នុង​ជម្រើស​មួយ​ណា​ក៏​ដោយ ក៏​នៅ​មាន​រឿង​អាទិភាព​មួយ​ដែល​លោកស្រី អ៊ុង សានស៊ូជី មិន​អាច​បំភ្លេច​បាន​ទេ នោះ​គឺ​ការ​​ពង្រឹង​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ​សម្រាប់​ចូលរួម​ការ​បោះឆ្នោត​សភា​នៅ​ឆ្នំា ២០១៥ ខាង​មុខ៕

tags: ភូមា
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close