ភូមា - 
អត្ថបទចុះ​ផ្សាយ​នៅ​ថ្ងៃ ចន្ទ 02 មេសា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ ចន្ទ 02 មេសា 2012

លោកស្រី អ៊ុង សានស៊ូជី៖« ជោគជ័យ​របស់​ខ្ញុំ ជា​ជោគជ័យ​របស់​ប្រជាជន​ភូមា​ទំាង​អស់ »

លោកស្រី អ៊ុង សានស៊ូជី ប្រធាន​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ​នៅ​ភូមា
លោកស្រី អ៊ុង សានស៊ូជី ប្រធាន​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ​នៅ​ភូមា
©Reuters

ដោយ គួច គន្ធារ៉ា

នៅ​ថ្ងៃ​បន្ទាប់ ពី​ការ​បោះឆ្នោត​ជ្រើសរើស​តំណាងរាស្រ្ត​ថ្មី​ចំនួន ៤៥នាក់​នៅ​ភូមា​កាល​ពី​ថ្ងៃ​អាទិត្យ ទី១ មេសា​មក គេ​នៅ​មិន​ទាន់​ដឹង​អំពី​លទ្ធផល​ជា​ផ្លូវការ​នៅ​ឡើយ​ទេ។ ប៉ុន្តែ​គណបក្សប្រឆំាង គឺ​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ​របស់​លោកស្រី អ៊ុង សានស៊ូជី​បាន​ប្រកាស​ឲ្យ​ដឹង​នៅ​ថ្ងៃ​នេះ​ថា បេក្ខជន​ទំាង ៤៤នាក់​របស់​ខ្លួន​បាន​ជាប់​ឆ្នោត​ជា​តំណាងរាស្រ្ត​ទំាង​អស់​គ្នា ក្នុង​នោះ​ក៏​មាន​លោកស្រី​ប្រធាន​គណបក្ស​ម្នាក់​ដែរ។ លោកស្រី អ៊ុង សានស៊ូជី​ដែល​បាន​ប្រកាស​ថា ជោគជ័យ​របស់​គាត់ ជា​ជោគជ័យ​របស់​ប្រជាជន​ភូមា​ទំាងមូល។

សេចក្តីរាយការណ៍​របស់ គួច គន្ធារ៉ា
 

02/04/2012 by គួច គន្ធារ៉ា

គ្មាន​អ្វី​គួរ​ឲ្យ​សង្ស័យ​ទៀត​ឡើយ មាន​អាយុ ៦៦ឆ្នំា និង​ជា​ជ័យលាភី​រង្វាន់​ណូបែល​សន្តិភាព​ក្នុង​ឆ្នំា ១៩៩១ លោកស្រី អ៊ុង សានស៊ូជី​នឹង​ចូល​អង្គុយ​កៅអី​តំណាងរាស្រ្ត​ជាលើក​ទីមួយ​នៅ​ក្នុង​ប្រវត្តិ​តស៊ូ​នយោបាយ​របស់​លោកស្រី។ លទ្ធផល​ផ្លូវការ​នៅ​មិន​បាន​ប្រកាស​នៅ​ឡើយ​ទេ តែ​បើ​យោង​តាម​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ​របស់​លោកស្រី អ៊ុង សានស៊ូជី​ឲ្យ​ដឹង​នៅ​ថ្ងៃ​នេះ​ថា ខ្លួន​ទទួល​បាន​អាសនៈ​ចំនួន ៤៤ នៅ​ក្នុង​ចំណោម​អាសនៈ​ប្រកួតប្រជែង​ទំាង ៤៥ មាន​ន័យ​ថា បេក្ខជន​ទំាង ៤៤នាក់​របស់​គណបក្សប្រឆំាង​បាន​ជាប់​ឆ្នោត​តំណាងរាស្រ្ត​ទំាង​អស់​គ្នា។ អ្វី​ជា​ការ​គួរ​ឲ្យ​កត់​សម្គាល់​នោះ​នៅ​ត្រង់​ថា បេក្ខជន​របស់​បក្សប្រឆំាង​មិន​មែន​ជាប់​ឆ្នោត​តែ​នៅ​ក្នុង​មណ្ឌល​ដែល​សម្បូរ​ដោយ​សកម្មជន​របស់​ខ្លួន​នោះ​ទេ សូម្បី​តែ​នៅ​មណ្ឌល​ទីក្រុង​ណៃពីដ៏​ដែល​មាន​ប្រជាជន​រស់នៅ​ភាគច្រើន ជា​បុគ្គលិក​រដ្ឋការ និង​ទាហាន ក៏​គណបក្សប្រឆំាង​ទទួល​បាន ៤អសនៈ​ដែរ។ នេះ​ស​បញ្ជាក់​ឲ្យ​ឃើញ​ពី​ប្រជាប្រិយភាព​របស់​លោកស្រី អ៊ុង សានស៊ូជី​នៅ​ក្នុង​ចំណោម​ប្រជាជន​ភូមា​ទូទៅ។
 
ថ្លែង​នៅ​ចំពោះ​មុខ​សកម្មជន​របស់ខ្លួន​ដែល​ប្រមូលផ្តុំ​គ្នា​នៅ​ទីស្នាក់ការកណ្តាល​គណបក្ស​ក្នុង​ទីក្រុង​រ៉ង់ហ្គូន លោកស្រី​អ៊ុង សានស៊ូជី​បាន​ចាត់​ទុក​ជោគជ័យ​របស់​លោកស្រី ថា​ជា​ជោគជ័យ​របស់​ប្រជាជន​ភូមា​ទំាងមូល ដោយ​សង្ឃឹម​ថា ជា​ការ​ចាប់​ផ្តើម​បើក​ទំព័រ​នយោបាយ​ថ្មី​មួយ​នៅ​ភូមា។ គឺ​ជា​ទំព័រ​នយោបាយ​ថ្មី​មួយ​ដែល​ប្រជាជន​ត្រូវ​ដើរ​តួនាទី​ដ៏​សំខាន់​នៅ​ក្នុង​កិច្ចការ​នយោបាយ និង​ជា​អ្នក​សម្រេច​ជោគវាសនា​ខ្លួន​ដោយ​ខ្លួនឯង។
 
សំណួរ​ដែល​គ្រប់​គ្នា​កំពុង​ចោទ​នៅ​ពេល​នេះ គឺ​ជុំវិញ​ការងារ​ដែល​លោកស្រី អ៊ុង សានស៊ូជី​ត្រូវ​បំពេញ​ក្នុង​នាម​ជា​អ្នកតំណាងរាស្រ្ត។ លោក យ៉ាន វីន ប្រធាន​រៀបចំ​យុទ្ធនាការ​ឃោសនា​បោះឆ្នោត​ឲ្យ​គណបក្ស​សម្ព័ន្ធជាតិ​ដើម្បី​លទ្ធិប្រជាធិបតេយ្យ​បាន​បញ្ជាក់​ថា មាន​ការងារ​ជា​ច្រើន​ដែល​លោកស្រី អ៊ុង សានស៊ូជី​ត្រូវ​បំពេញ និង​ដែល​ជា​ការ​ទន្ទឹង​រង់ចំា​របស់​ប្រជាជន។ ក៏​ប៉ុន្តែ ការងារ​ជា​បន្ទាន់​នៅ​ចំពោះ​មុខ និង​ជា​អាទិភាព​នោះ គឺ​ទាមទារ​ឲ្យ​មាន​ការ​កែប្រែ​ច្បាប់​រដ្ឋធម្មនុញ្ញ​ដែល​របបសឹក​បាន​អនុម័ត​កាល​ពី​ឆ្នំា ២០០៨ តាម​រយៈ​ការ​បោះឆ្នោត​ប្រជាមតិ។ ច្បាប់រដ្ឋធម្មនុញ្ញ​ដែល​បាន​អនុញ្ញាត​ឲ្យ​ប្រមុខរដ្ឋ​ប្រគល់​អំណាច​ទៅ​ឲ្យ​មេបញ្ជាការ​កងទ័ព នៅ​ក្នុង​ករណី​ដែល​ប្រទេស​ធ្លាក់​ក្នុង​ស្ថានការណ៍​អាសន្ន៕

tags: ភូមា
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close