ភូមា - 
អត្ថបទចុះ​ផ្សាយ​នៅ​ថ្ងៃ ចន្ទ 09 មេសា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ ចន្ទ 09 មេសា 2012

លោកស្រី​អ៊ុងសាន​ស៊ូជី​​​ចូល​​រួម​​ប្រជុំ​​ក្នុង​​រដ្ឋសភា​​ជា​​លើក​​ទី​​មួយ​​ថ្ងៃ២៣មេសា​

លោកស្រី អ៊ុង សានស៊ូជី ប្រធានគណបក្សប្រឆាំងភូមា​​
លោកស្រី អ៊ុង សានស៊ូជី ប្រធានគណបក្សប្រឆាំងភូមា​​
Reuters/Soe Zeya Tun

ដោយ នុយ ប៊ែរណាដែត

លោក​ស្រី​ អ៊ុងសាន​ស៊ូជី ​ប្រមុខ​​គណបក្ស​​ប្រឆាំង​​គឺ​​សម្ព័ន្ធ​ជាតិ​​ដើម្បី​​លទ្ធិ​​ប្រជាធិបតេយ្យ ​LND​ ដែល​​ទើប​​បាន​​ជាប់​​​ឆ្នោត​​ជា​​​តំណាងរាស្រ្ត​​នៅ​​ឱកាស​​បោះ​ឆ្នោត​​សភា​​កាលពី​​​ថ្ងៃ​​ទី​​១​​មេសា​​២០១២​​កន្លង​ទៅ​​នេះ​នឹង​​​ឡើង​​​កាន់​​​កាប់​​​​អាសនៈ​​​របស់​​ខ្លួន​​​ជា​​លើ​ក​​ទី​មួយ​​​នៅ​​ក្នុង​​​រដ្ឋ​សភា​​​​​នៅ​​ថ្ងៃ​​ទី​​២៣​​មេសា​​ខាង​​មុខ​​-នេះ​​ជា​​ការ​​គូស​​បញ្ជាក់​​របស់​​អ្នក​​នាំ​​ពាក្យ​​នៃ​គណបក្ស​​LND។​
 

សេចក្តីរាយការណ៍​របស់ នុយ ប៊ែរណាដែត
 

09/04/2012 by នុយ ប៊ែរណាដែត

ជ័យលាភី​រង្វាន់​ណូបែល​ផ្នែក​សន្តិភាព លោកស្រី​អ៊ុងសាន​ស៊ូជី ដែល​បាន​ជាប់​ឆ្នោត​​ជា​តំណាងរាស្រ្ត​នៅ​មណ្ឌល បោះ​ឆ្នោត​នៅ​​តំបន់​ជនបទ Kawhmu ជិត​ទីក្រុង​រ៉ង់ហ្គូន នឹង​បង្ហាញ​ខ្លួន​​ជា​លើក​ទី​មួយ ក្នុង​ឋានៈ​ជា​អ្នកតំណាង​រាស្ត្រ​ភូមា-នេះ​ជា​ការ​គូស​បញ្ជាក់​របស់​​លោក Nyan Win អ្នក​​នាំ​ពាក្យ​​របស់​សម្ព័ន្ធជាតិ​ដើម្បី​លទ្ធិ​ប្រជាធិប​តេយ្យ​​(LND) គណបក្ស​ប្រឆាំង​របស់​លោក​ស្រី ​ស៊ូជី ប្រាប់​​ទីភ្នាក់ងារ​ព័ត៌មាន​បារាំង AFP នៅ​ថ្ងៃ​ចន្ទ​៩​មេសា​នេះ។
 
គួររំលឹកថា លោកស្រី ស៊ូជី ​ធ្លាប់​បាន​ជាប់​ឃុំឃាំង​នៅ​ក្នុង​លំនៅ​ឋាន​១៥​ឆ្នំា​ក្នុង​អំឡុង​​២០​ឆ្នាំ​ចុង​ក្រោយ​នេះ ក៏​ប៉ុន្តែ​ត្រូវ​បាន​របប​ថ្មី​នៃ​លោក​ប្រធានាធិបតី​​និង​ជា​អតីត​ឧត្តម​សេនីយ៍ ​ថេនសេន ដែលបាន​​ឡើង​កាន់​អំណាច​​តាំង​ពី​មួយ​ឆ្នាំ​កន្លង​មកហើយ អញ្ជើញ​​ឲ្យ​មក​ចូល​​រួម​ប្រឡូក​ក្នុង​ឆាក​នយោបាយ​ស្របច្បាប់​មួយ​ ដើម្បី​ចូលរួម​​កសាង​និង​ផ្សះផ្សា​ជាតិ។
 
អ្នក​ទទួល​ខុស​ត្រូវ​ម្នាក់​នៃ​រដ្ឋសភា​ភូមា បាន​អះអាង​​ថា ”គាត់​​​បាន​​អញ្ជើញ​សមាជិក​រដ្ឋ​សភា​​ទាំង​អស់​​រួម​ទាំង​​លោកស្រី​អ៊ុងសាន​ស៊ូជី​​ផង​ ​ឲ្យ​មក​ចូល​រួម​ប្រជុំ​នៅ​រដ្ឋសភា​​នៅ​ថ្ងៃ​២៣​​មេសា​ខាង​មុខ​នេះ។
សូមបញ្ជាក់ថា គណបក្ស ​(LND)​របស់​លោកស្រី​ស៊ូជី ​បាន​ទទួល​ជ័យ​ជំនះ​ដ៏​​ធំធេង​​នៅ​ក្នុង​ការ​បោះឆ្នោត​សភា​មួយ​ភាគ​​នៅ​ថ្ងៃ​១​មេសា​នោះ​ ​ដោយ​ដណ្តើម​​យក​បាន​ ​​៤៣​​​អាសនៈ​ក្នុង​ចំណោម​​អាសនៈទាំង​៤៤ ។ គណបក្ស​(LND) ចាប់ពី​អំណើះ ​តទៅ ​បាន​ក្លាយ​ជា​គណបក្ស​ប្រឆាំង​ដ៏​សំខាន់​​ទី​មួយ​នៅ​ភូមា មួយ​ឆ្នាំ​កន្លះបន្ទាប់ពី ​របបសឹក​ភូមា​បាន​ទទួល​ជ័យ​ជំនះ​ដ៏​គគ្រឹក​គគ្រេង​នៅ​ក្នុង​ការ​បោះឆ្នោត​ដ៏​ចម្រូង​ចម្រាស​​នៅ​​ខែ​វិច្ឆិកា​២០១០​-ការ​បោះ​ឆ្នោត​ដែល​គណបក្ស​(LND) ធ្វើ​ពហិការ​មិន​ចូល​រួម។
 
ចំណែក​គណបក្ស​សាមគ្គី​និង​អភិវឌ្ឍន៍​​សហភាព (USDP) ដែលឧប្បត្តិក​ឡើង​ទាំង​ស្រុង​​​ ដោយ​​អតីត​របប​សឹកជំនាន់​នោះ បាន​ប្រកាស​ថា ​គណបក្ស​របស់​ខ្លួន​ដណ្តើម​បាន​អាសនៈ​សភា​ចំនួន​៨០%​-ហើយ ​សមាជិក​សភា​ចំនួន​១/៤ ​សុទ្ធតែ​ជា​ពួក​យោធា​ដដែល។​
 
នៅ​ក្នុង​ការ​បោះ​ឆ្នោត​សភា​មួយ​ភាគ​លើក​នេះ គណបក្សសាមគ្គី​និង​អភិវឌ្ឍន៍​​សហភាព (USDP)នេះ  ​ដណ្តើម​បាន​អាសនៈ​​តែ​មួយ​គត់​នៅ​ក្នុង​មណ្ឌល​បោះ​ឆ្នោត​​តែ​មួយ​គត់​​ដែល​ពុំ​មាន​បេក្ខជន​របស់​គណបក្សប្រឆាំង។

ការបោះឆ្នោតសភាទី១​មេសា​កន្លង​ផុត​ទៅ​នេះ ត្រូវ​បាន​គេ​ចាត់​ទុក​ជា ​test​មួយ​ ដើម្បី​ពិសោធ​ចង់ដឹង​​ភាព​ស្មោះត្រង់​​នៃ​​កំណែ​ទម្រង់​​ធ្វើដោយ​របបថ្មី និង​បាន​ទទួល​ការ​ស្វាគមន៍​​​ពី​សហគមន៍​អន្តរជាតិផងដែរ។
ដើម្បីបង្ហាញក្តីសោមនស្សពេញចិត្ត​របស់​ខ្លួន​ សហរដ្ឋអាមេរិក បានសន្យាថានឹង​ « សម្រាល​ »​ទណ្ឌកម្មរឹតត្បិត​ការធ្វើ​វិនិយោគ​​ទុន​​​នៅប្រទេស​ភូមានិង​តែង​តាំង​ឲ្យ​​បានឆាប់រហ័ស​ឯកអគ្គរដ្ឋទូតមួយរូប​ឲ្យ​ទៅ​​ប្រចាំ​នៅ​ប្រទេស​ភូមា៕
 

 

tags: គណបក្សនយោបាយ - ភូមា
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close