អ៊ុងសាន ស៊ូជី ចូលរួមពិធីព្យុហយាត្រាទ័ពភូមាប្រចាំឆ្នាំ
នៅថ្ងៃពុធនេះ នៅប្រទេសភូមា មេដឹកនាំគណបក្សប្រឆាំងលោកស្រី អ៊ុងសាន ស៊ូជី បានចូលរួមក្នុងពិធីព្យុហយាត្រាប្រចាំឆ្នាំ របស់កងទ័ពភូមា។ នៅចំពោះមុខលោកស្រី អ៊ុងសាន ស៊ូជី ប្រមុខដឹកនាំទ័ពភូមា លោក Min Aung Hlaing បានរំលឹកឡើងវិញពីតួនាទីកងទ័ពភូមា នៅក្នុងឆាកនយោបាយជាតិ ព្រមទាំងបានអះអាងថាទ័ពភូមាធ្វើការគាំទ្រកំណែទម្រង់ក្នុងប្រទេស ដើម្បីពង្រឹងដំណើរការឆ្ពោះទៅកាន់លទ្ធិប្រជាធិបតេយ្យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ប្រទេសភូមាបានរៀបចំពិធីព្យុហយាត្រាកងទ័ពប្រចាំឆ្នាំរបស់ខ្លួន នៅថ្ងៃពុធនេះ ដោយមានវត្តមានដ៏គួរអោយកត់សម្គាល់របស់មេដឹកនាំគណបក្សប្រឆាំងភូមា គឺលោកស្រី អ៊ុងសាន ស៊ូជី ផងដែរ។
ក្បួនដង្ហែរបានប្រព្រិត្តិទៅយ៉ាងអធិកអធម ដោយគេឃើញមានទាហានភូមាជាង ៦ ០០០ នាក់ រួមជាមួយនឹងរថក្រោះ ឧទ្ធម្ភាគចក្រ ព្រមទាំងយន្តហោះចំបាំងទៀតផង។ កងទ័ពភូមាទាំងនេះ មាននាមថា តាត់ម៉ាដាវ (Tatmadaw)។
ប្រមុខដឹកនាំទ័ពភូមា លោក Min Aung Hlaing បានរំលឹកឡើងវិញពីតួនាទីកងទ័ពភូមានៅក្នុងឆាកនយោបាយជាតិ ព្រមទាំងបានអះអាងថា ទ័ពភូមាធ្វើការគាំទ្រកំណែទម្រង់ដើម្បីពង្រឹងដំណើរការឆ្ពោះទៅកាន់លទ្ធិប្រជាធិបតេយ្យនៅក្នុងប្រទេស អោយបានរឹងមាំថែមទៀត។
“តាត់ម៉ាដាវ ការពារជាតិអោយចាកផុតពីគ្រោះថ្នាក់គ្រប់បែបយ៉ាង ហើយក៏បានចូលរួមក្នុងឆាកនយោបាយជាតិ បានសមស្របទៅតាមឆន្ទៈប្រជាជនផងដែរ នៅដែលពេលប្រទេសជាតិប្រឈមមុខនឹងជម្លោះជនជាតិភាគតិច រឺក៏ការប្រយុទ្ធនានានៅក្នុងវិស័យនយោបាយ។” នេះជាការលើកឡើងរបស់ លោក Min Aung Hlaing នៅថ្ងៃពុធនេះ។
ទន្ទឹមនេះដែរអ្វីដែលគេចាប់អារម្មណ៍ គឺការចូលរួមរបស់ លោកស្រី អ៊ុងសាន ស៊ូជី នៅក្នុងពិធីដង្ហែរទ័ពនេះ ដែលបានបង្ហាញនូវការខិតជិតរវាងគណបក្សប្រឆាំងភូមាជាមួយនឹងរដ្ឋាភិបាលថ្មី។ គួរបញ្ជាក់ថា លោកស្រី អ៊ុងសាន ស៊ូជី ពុំដែលធ្លាប់បានចូលរួមក្នុងពិធីដ៏សំខាន់របស់កងទ័ពភូមាយ៉ាងដូច្នេះនោះទេ។ គិតរហូតដល់ឆ្នាំ ២០១១ ការរៀបចំពិធីទ័ពដ៏គគ្រឹកគគ្រេងបែបនេះ បានបង្ហាញពីសក្តានុពលកងទ័ពភូមា ដែលធ្លាប់បានឃុំខ្លួនមេដឹកនាំបក្សប្រឆាំងអស់រយៈពេល ១៥ឆ្នាំ ហើយគ្រប់គ្រងប្រទេសរហូតដល់ទៅកន្លះសតវត្សរ៍ឯណោះ។
ប៉ុន្តែ រដ្ឋាភិបាលភូមាបច្ចុប្បន្នដែលឡើងបន្តកាន់តំណែងពីរបបសឹកចាស់ បានព្យាយាមធ្វើកំណែទម្រង់ជាច្រើន ហើយអនុញ្ញាតអោយ លោកស្រី អ៊ុងសាន ស៊ូជី ដែលជាមេដឹកនាំបក្សប្រឆាំង បានចូលរួមការងារនៅក្នុងសភារបស់ខ្លួនទៀតផង។ លោកស្រី អ៊ុងសាន ស៊ូជី ធ្លាប់បានប្រាប់ទូរទស្សន៍អង់គ្លេស BBC កាលពីខែមករា កន្លងមកថា លោកស្រីស្នេហាកងទ័ពភូមា ដោយសារតែលោកស្រីមើលឃើញកងទ័ពភូមាដូចជាទ័ពរបស់ឪពុកលោកស្រីអញ្ចឹង។
គួររំលឹកថា ឪពុកមេដឹកនាំបក្សប្រឆាំងរូបនេះគឺលោកឧត្តមសេនីយ អ៊ុងសាន ជាវីរបុរសតំណាងឯករាជ្យភាពនៅភូមា។ លោកបានត្រូវគេធ្វើឃាត កាលពីឆ្នាំ ១៩៤៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ