កម្ពុជា -

អត្ថបទចុះផ្សាយនៅថ្ងៃ ពុធ 17 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 17 តុលា 2012

ពលរដ្ឋរាប់សិបម៉ឺននាក់ទទួលព្រះបរមសពសម្តេចឪ

ក្បួនដង្ហែព្រះសព នរោត្តម សីហនុ ពីព្រលានយន្តហោះ ទៅកាន់ព្រះរាជរាំង

ដោយ លាង ដឺលុច

ម៉ោង២និង៤៥នាទីរសៀលថ្ងៃពុធនេះ យន្តហោះពិសេស Air China បានដឹកព្រះបរមសពរបស់សម្តេចឪមកដល់ព្រលានយន្តហោះអន្តរជាតិភ្នំពេញដែលមាននាម៉ឺនមន្ត្រីគ្រប់ជាន់ថ្នាក់ជាច្រើនរយនាក់កំពុងរង់ចាំ។ នៅលើផ្លូវថ្នល់វិញ ចាប់ពីច្រកចេញនៃព្រលានយន្តហោះ មានពលរដ្ឋ ដូនជី ព្រះសង្ឃរាប់ម៉ឺននាក់រួចទៅហើយ ដែលបានឈរសងខាងផ្លូវសហព័ន្ធរុស្ស៊ី។
នៅឯព្រលានយន្តហោះអន្តរជាតិនោះ អ្នកនាំពាក្យរដ្ឋាភិបាលលោកខៀវ កាញ្ញារីទ្ធបានថ្លែងប្រាប់អ្នកកាសែតថា សម្តេចឪគឺជាអ្នកតំណាងអោយឯកភាពជាតិ។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (03:32)

17/10/2012

ក្មេង ចាស់ ប្រុសស្រី សិស្សនិស្សិត ពលរដ្ឋមន្ត្រីរាជការបានមកអង្គុយនៅលើមហាវិថីសហព័ន្ធរុស្ស៊ីតាំងពីម៉ោងជិត២រសៀល។ ពោលគឺប្រហែល៤៥នាទីមុនយន្តហោះពិសេស Air China ដែលដឹកព្រះបរមសពរបស់អង្គសម្តេចតាមកដល់ព្រលានយន្តហោះងអន្តរជាតិភ្នំពេញ។ មិនខ្វល់ពីកំដៅព្រះអាទិត្យដែលជះពីខាងលើ និងកំដៅដែលជះពីថ្នល់កៅស៊ូនោះឡើយ ពលរដ្ឋក្នុងសម្លៀកបំពាក់កាន់ទុក្ខ ខ្មៅស មានពាក់បូខ្មៅលើលើអាវ អង្គុយចាំក្បួនហែរព្រះបរមសពយ៉ាងអន្ទះសារ។ ដៃកាន់ផ្កាឈូ អ្នកខ្លះកាន់ព្រះឆាយាលក្ខសម្តេចឪ អ្នកកាន់ទង់សាសនា អ្នកខ្លះទៀតកាន់ទង់ព្រះរាជវាំង។ ពួកគេសុទ្ធតែមានទឹកមុខក្រៀមក្រំ និងយំខ្សឹកខ្សួលយ៉ាងស្ងៀមស្ងាត់។

ទីនាំងដឹកព្រះបរមសពសម្តេចឪ

©Reuters

នៅក្នុងទីលានព្រលានយន្តហោះវិញ សមាជិករដ្ឋាភិបាលសុទ្ធតែពាក់អាវកាក់សរ និងពាក់ប្រឡង់ដៃពណ៌ខ្មៅ ឈនិយាយគ្នាតិចៗ នៅពីក្រោយកងត្រែទ័ព។ លោក ខៀវ កាញារីទ្ធ អ្នកនាំពាក្យរដ្ឋាភិបាលកម្ពុជាដែលស្ថិតនៅក្នុងចំណោមមន្ត្រីជាន់ខ្ពស់រដ្ឋាភិបាលបានអះអាងថា ចំនួនប្រជាពលរដ្ឋមានច្រើនហួសការគ្រោងទុក។

លោក ជា គាន អនុប្រធានអចិន្ត្រៃយ៍នៃគណៈកម្មាធិការរៀបចំបុណ្យជាតិបានពន្យល់ប្រាប់អំពីសម្មានចិត្តរបស់ពលរដ្ឋដែលមកចួលរួមដង្ហែព្រះបរមសពសម្តេចឪដោយឆន្ទៈស្មោះស្ម័គ្រយ៉ាងដូច្នេះ។

នៅតាមដងផ្លូវវិញព្រះសង្ឃនិងដូនជីមានមិនតិចឡើយ។ នៅពេលក្បួនដង្ហែរព្រះបរមសពគ្រាន់តែចេញពីព្រលានយន្តហោះភ្លាម ការសូត្រធម៌បានបន្ទរឡើងភ្លាមដែរ។ នៅពេលនោះហើយដែលសំឡេងយំខ្សឹកខ្សួលរបស់ពលរដ្ឋ ទាំងក្មេងទាំងចាស់បានចាប់ផ្តើមដែរនោះ។

ព្រះទីនាំងដឹកព្រះសព ជារថយន្តដែលមានរចនាសត្វហង្សពណ៌មាន តាមពីក្រោយដោយរថយន្តដែលមានដឹកព្រះសង្ឃដែលសូត្រធម៌។ បន្ទាប់មកគឺព្រះទីនាំងរបស់ព្រះមហាក្សត្រ និងសម្តេចម៉ែ ដែលតាមពីក្រោយរថយន្តរបស់ថ្នាក់ដឹកនាំកំពូល ដូចជាប្រធានរដ្ឋសភា និងប្រមុខរដ្ឋាភិបាល រាជវង្សានុវង្ស និងរថយន្តមន្ត្រីជាន់ខ្ពស់យ៉ាងវែង៕