ស៊ីរី - 
អត្ថបទចុះ​ផ្សាយ​នៅ​ថ្ងៃ ពុធ 31 សីហា 2011 - ព័ត៌មានទើប​កែប្រើ​លើកចុងក្រោយ​ ថ្ងៃ ពុធ 31 សីហា 2011

Amnesty International៖ អ្នកទោសស្លាប់​ដោយ​ទារុណកម្ម​បាន​កើនឡើងខ្លាំង នៅស៊ីរី

ក្នុង​ទីក្រុង​Amude កុមារ​ចុះ​ថ្នល់​ធ្វើ​បាតុកម្ម​ជាមួយ​ឪពុកម្តាយ ដើម្បី​ប្រឆាំង​នយោបាយ​រដ្ឋាភិបាល​​ស៊ីរី
ក្នុង​ទីក្រុង​Amude កុមារ​ចុះ​ថ្នល់​ធ្វើ​បាតុកម្ម​ជាមួយ​ឪពុកម្តាយ ដើម្បី​ប្រឆាំង​នយោបាយ​រដ្ឋាភិបាល​​ស៊ីរី
©Reuters

ដោយ ឈាង បុប្ផា

ក្នុងពេល​ដែល​អង្គការ​សហប្រជាជាតិ​នៅ​តែ​មិនអាច​បំបែក​សំណុំរឿង​ស៊ីរី សហរដ្ឋអាមេរិក​ និង​សហភាព​អឺរ៉ុប​នៅ​បន្ត​ដាក់​ទណ្ឌកម្ម​សេដ្ឋកិច្ច​ទៅ​លើ​រដ្ឋាភិបាល​ស៊ីរី។ នៅថ្ងៃ​អង្គារ​ទី ៣០ សីហា អាមេរិក​ ​បានសម្រេច​​បន្ថែម​ឈ្មោះ​រដ្ឋមន្រ្តី​ការបរទេស​ស៊ីរីម្នាក់ទៀត ទៅក្នុង​បញ្ជី​ឈ្មោះ​មេដឹកនាំ​ស៊ីរី ​ដែល​អាមេរិក​ត្រូវ​ផ្អាប់​ទុក​ទ្រព្យសម្បត្តិ។ នៅក្នុង​ប្រទេស​ស៊ីរី​ឯណោះវិញ អង្គការ​Amnesty international បាន​បង្ហាញ​ថា អ្នកទោស​ដែលទាហាន​ស៊ីរី ​ចាប់ខ្លួន​ នៅក្នុង​ការបង្រ្កាប​ ​ប៉ុន្មាន​ខែ​ចុងក្រោយ​នេះ បាន​ទទួល​រង​ទណ្ឌកម្ម ​រហូតដល់​​ស្លាប់។

ឈាង បុប្ផា​មាន​ព័ត៌មាន​លម្អិត
 

31/08/2011 by ឈាង បុប្ផា

បើទោះបី​ជា​អង្គការ​អន្តរជាតិ ត្រូវ​ហាម​មិន​ឲ្យ​ចូល​ធ្វើការ​អង្កេត​ក្នុង​ប្រទេស​ស៊ីរី ប៉ុន្តែ អង្គការ​ការពារ​សិទ្ធិមនុស្ស​ Amnesty international បាន​និយាយ​ថា ខ្លួន​មាន​ភស្តុតាង​ដែល​បង្ហាញថា មាន​មនុស្ស​៨៨​នាក់​ស្លាប់ នៅក្នុង​អំឡុង​ពេល​ឃុំខ្លួន នៅក្នុង​ពន្ធនាគារ នៅ​ចន្លោះ​ខែ​មេសា ដល់​ខែ​សីហា​​។ ចំនួន​នេះ​គឺ​កើន​ខ្ពស់​ខ្លាំង បើប្រៀបធៀប​នឹង​រយៈពេល​ដូចគ្នា នៅមុន​ការបើក​បង្រ្កាប​របស់​រដ្ឋាភិបាល។ អ្នកទោស​ទាំងនោះ​ មួយ​ចំនួន​ជាប្រជាជន​ដែល​មាន​តាំង​ពី​កុមារ ក្រោម​អាយុ ១៨​ឆ្នាំ ​ដែល​ទាហានស៊ីរី​​ចាប់​បាន នៅក្នុង​ការបង្រ្កាប​ហិង្សា​។
 
បើតាម​អង្គការ​អន្តរជាតិ​មួយ​នេះ ស្លាកស្លាម​ទារុណកម្ម​នៅលើ​ខ្លួន​អ្នកទោស​ដែល​ជា​មូលហេតុ​ស្លាប់​របស់​អ្នកទោស បាន​បង្ហាញ​ពី​ភាពឃោឃៅ​ និង​ការសម្លាប់​​​ប្រជាជន​ឯង​​ ក្នុង​ទ្រង់ទ្រាយ​ធំ របស់​រដ្ឋាភិបាល​លោក​Bachar Al Assad។
 
សកម្មភាព​សាហាវ​យង់ឃ្នង​របស់​រដ្ឋាភិបាល​ស៊ីរី​មិន​បញ្ចប់​ត្រឹមណេះទេ។ បើតាម​ប្រភព​ពី​អ្នកការពារ​សិទ្ធិមនុស្ស​ក្នុង​ស្រុក​ស៊ីរីវិញ ស្តាតស៊ីរី​ដែល​ត្រូវ​ទទួល​ការប្រកួត​បាល់ទាត់ នៅពេលខាងមុខ ត្រូវ​បាន​ប្រែក្លាយ​ជា​កន្លែង​ឃុំខ្លួន​អ្នកទោស បន្ទាប់​ពីពន្ធនាគារ​មិន​អាច​ទទួលដាក់​មនុស្ស​​ជាង មួយម៉ឺននាក់។ អ្នកទោស​ដែល​ត្រូវ​ទាហាន​​ចាប់ខ្លួន​បាន ពី​ក្នុង​ការបង្រ្កាប​ក្នុង​ខេត្ត​Hama។
 
យោង​តាម​ប្រភព​ដដែល អាជ្ញាធរ​ស៊ីរី​បាន​ប្រើយុទ្ធសាស្រ្ត​ថ្មី ដោយ​ធ្វើ​ត្រឹម​ឲ្យ​របួស​បាតុករ ប៉ុន្តែ​មិន​បាញ់​សម្លាប់​ដូចមុនទេ។ គេ​ជឿថា ការបាញ់​ឲ្យ​របួស​នឹង​មិន​អាច​​​ឲ្យ​មនុស្ស​ដើរ​ចុះ​តាម​ថ្នល់​តវ៉ា ហើយ​ចំនួន​អ្នករបួស​ច្រើន នឹង​មិន​បង្ហាញ​ពី​ស្ថានភាព​ធ្ងន់​ធ្ងរ ដូច​មាន​អ្នកស្លាប់​ច្រើន​នោះទេ។ ​នៅ​ស៊ីរី អង្គការ​Amnesty International​ បាន​រកឃើញថា ចាប់តាំង ពីមាន​ការងើបបះបោរ​របស់​ប្រជាជន កាល​ពី​ខែ​មីនា មនុស្ស​ជិត​២០០០​នាក់​ត្រូវ​គេ​សម្លាប់ និង មនុស្ស​រាប់ពាន់​នាក់​ត្រូវ​ចាប់ ឬ បាត់ខ្លួន នៅក្នុង​ការបង្រ្កាប​របស់​រដ្ឋាភិបាល​ស៊ីរី៕

tags: សិទ្ធិមនុស្ស - ស៊ីរី - អង្គការ​សហប្រជាជាតិ
ទាក់ទងនឹងប្រធានបទនេះ​ដែរ :
Close