ទូតស៊ុយអែតវាយតម្លៃខ្ពស់ចំពោះដំណើរការយុទ្ធនាការបោះឆ្នោតនៅកម្ពុជា
លោកស្រី Anne Hogund ឯកអគ្គរាជទូត ស៊ុយអែត ប្រចាំនៅកម្ពុជាដែល ទើបបញ្ចប់អាណត្តិបេសកកម្មការទូត បានវាយតម្លៃខ្ពស់ចំពោះបរិយាកាសនៃដំណើរការឃោសនាបោះឆ្នោត នៅកម្ពុជា ថាមានភាពល្អប្រសើរប្រកបដោយសន្តិភាព និងអហិង្សា ពិសេសលោកស្រីបានស្វាគមន៏ចំពោះការលើកលែងទោសដល់លោក សម រង្ស៊ី វិលត្រឡប់ចូលរួមបោះឆ្នោតនាពេលខាងមុខឆាប់ៗនេះ។ ការថ្លែងបែបនេះ បានធ្វើឡើងនៅក្នុងជំនួប ជម្រាបលាជាមួយលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួងការបរទេស នាព្រឹកថ្ងៃចន្ទ ទី១៥ ខែកក្កដា ឆ្នាំ២០១៣ ក្នុងដំណើរដើម្បីបញ្ចប់ការបេសកកកម្មរបស់លោកស្រីរយៈពេល៣ឆ្នាំនៅកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
នៅក្នុងជំនួបជម្រាបលាបញ្ចប់បេសកកម្មការទូតរបស់លោកស្រីនៅកម្ពុជា លោកស្រី Anne Hoglund ក្រៅតែពីបានកោតសរសើរដល់ការចម្រើន និងការអភិវឌ្ឍន៍នៅក្នុងប្រទេសកម្ពុជានោះ លោកស្រីក៏បានបញ្ជាក់ថា រដ្ឋាភិបាលរបស់ប្រទេសស៊ុយអ៊ែតរបស់លោកស្រី នឹងបន្តតាមដានយ៉ាងដឹតដល់អំពីដំណើរការបោះឆ្នោត ពិសេសក្នុងកំឡុងពេលដំណើរការឃោសនាបោះឆ្នោតនេះ។
តាមរយៈអ្នកនាំក្រសួងការបរទេសកម្ពុជា លោក កុយ គួង ដែលបានថ្លែងប្រាប់អ្នកសារព័ត៌មានអំពីជំនួបនោះ រដ្ឋាភិបាលស៊ុយអែតបានធ្វើការវាយតម្លៃខ្ពស់ចំពោះដំណើរឃោសនាបោះឆ្នោត ដែលបានកំពុងប្រព្រឹត្តទៅនៅពេលនេះ ថាមានលក្ខណៈប្រកបដោយសុខសន្តិភាព និងគ្មានអំពើហឹង្សា ពិសេសនោះគឺអ្នកស្រីសូមកោតសរសើរជំហរចុងក្រោយថ្មីៗនេះរបស់រដ្ឋាភិបាលកម្ពុជាដែលបានផ្តួចផ្តើមគំនិតផ្សះផ្សាជាតិ ដោយបានអនុញ្ញាតិឲ្យលោក សម រង្ស៊ី វិលត្រឡប់ចូលរួមការបោះឆ្នោតនៅពេលខាងមុខនេះ។
លោក កុយ គួងបានបញ្ជាក់យ៉ាងដូច្នេះ៖«សំលេង»
ចំណែកការពង្រឹងកិច្ចសហប្រតិបត្តិរវាងប្រទេសទាំងពីរវិញលោកស្រី Anne Hogund បានបញ្ជាក់ថា រដ្ឋាភិបាលប្រទេសស៊ុយអែតនឹងបន្តជម្រុញបន្ថែមទៀតលើវិស័យសេដ្ឋកិច្ច ដោយស្នើដល់គណប្រតិភូវិនិយោគពាណិជ្ជកម្មរបស់ស៊ុយអែត នៅក្នុងប្រទេសសឹង្ហបូរី និងបណ្តាប្រទេសក្នុងសហគមន៏អាស៊ានឲ្យចូលមកក្នុងប្រទេសកម្ពុជាដើម្បីពិនិត្យមើលសក្តានុពលវិនិយោគនៅក្នុងប្រទេសនេះ។
គួរបញ្ជាក់ថា នៅក្នុងកិច្ចសហប្រតិបត្តិអភិវឌ្ឍន៏ប្រចាំឆ្នាំ២០១២ និង២០១៣ រវាងប្រទេសទាំងពីរ ស៊ុយអែតបានផ្តល់ជំនួនដល់កម្ពុជានូវទឹកប្រាក់ចំនួន៥៧លានដុល្លារ ដែលត្រូវបានយកមកប្រើប្រាស់នៅក្នុងគម្រោងមួយចំនួនដូចជា ការប្រែប្រួលអាកាសធាតុ ការអភិវឌ្ឍន៍លទ្ធិប្រជាធិបតេយ្យ និងសិទ្ធិមនុស្សនៅកម្ពុជា និងវិស័យអប់រំ។ ដោយឡែក ការផ្តោះប្តូរវិស័យពាណិជ្ជកម្មរវាងប្រទេសទាំងពីរ កាលពីឆ្នាំ ២០១២កន្លងទៅ មានទំហំទឹកប្រាក់ចំនួន៤៦លានដុល្លារតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ