ADBជួយជាង៥០០លានដុល្លារដើម្បីបង្កើតទីក្រុងនៅជនបទ
ធនាគារអភិវឌ្ឍន៍អាស៊ី ADB បានប្រកាសនៅអង្គារនេះអំពីគម្រោងជួយកម្ពុជារយៈ៣ឆ្នាំដែលមានតម្លៃទឹកប្រាក់៥២៥លានដុល្លារ។ វាគឺជាផែនការប្រតិបត្តិធុរៈកិច្ចប្រចាំប្រទេសកម្ពុជាដែលផ្តោតលើការអភិវឌ្ឍន៍ទីប្រជុំជនតូចៗអោយក្លាយជាទីក្រុងការតភ្ជាប់រវាងទីក្រុងនិងជនបទនិងការប្រែប្រួលអាកាសធាតុជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
គម្រោង៣ឆ្នាំដើម្បីកាត់បន្ថយភាពក្រីក្រនៅក្នុងតំបន់ជនបទរបស់កម្ពុជា ត្រូវបង្ហាញដោយតំណាងធនាគារអភិវឌ្ឍន៍អាស៊ី ADB នៅថ្ងៃអង្គារនេះ។ គឺជាផែនការប្រតិបត្តិធុរកិច្ចប្រចាំប្រទេសកម្ពុជា២០១៣-២០១៥ដែលមានតម្លៃ៥២៥លានដុល្លារ។
ក្នុងចំណោមថវិកាទាំងនេះរួមមាន កម្ចីហិរញ្ញប្បទានរបស់មូលនិធិអភិវឌ្ឍន៍អាស៊ីចំនួន៤៩១លានដុល្លារ និងជំនួយឥតសំណងចំនួនជាង៣៤លានដុល្លារទៀតដែលត្រូវប្រើសម្រាប់ជំនួយបច្ចេកទេសនៅក្នុងប្រទេស និងនៅថ្នាក់តំបន់។
ក្រៅពីថវិកាខាងលើនេះ ហិរញ្ញប្បទានចំនួន២៦០,៣លានដុល្លារផ្សេងទៀត ដែលបានពីប្រភពផ្សេងៗទៀតក៏ត្រូវបានបញ្ចូលនៅក្នុងផែនការប្រតិបត្តិការធុរកិច្ចប្រចាំប្រទេសនេះផងដែរ ដែលធ្វើអោយផែនការនេះមានថវិកាកើនឡើងដល់ជាង៧០០លានដុល្លារឯណោះ។
ថវិកាទាំងអស់នេះនឹងគាំទ្រគម្រោងអភិវឌ្ឍន៍ក្នុងប្រទេសកម្ពុជាចំនួន១៤ និងគម្រោងថ្នាក់តំបន់ចំនួន៥ទៀត ដោយរួមបញ្ចូលទាំងគម្រោងពាណិជ្ផភាវូបនីយកម្មផលិតកម្មស្រូវគម្រោងកែលំអផ្លូវខេត្ដ និងផ្លូវជនបទ គម្រោងស្ដារប្រព័ន្ធធារាសាស្ដ្រឡើងវិញ គម្រោងអភិវឌ្ឍន៍ទីប្រជុំជននៅតាមច្រករបៀងនៃមហាអនុតំបន់ទន្លេមេគង្គ (GMS) គម្រោងបញ្ផ្រាបសកម្មភាពកាត់បន្ថយផលប៉ះពាល់នៃការប្រែប្រួលអាកាសធាតុទៅក្នុងគម្រោងនានា និងគម្រោងពង្រឹងភាពជាដៃគូ រវាងវិស័យសាធារណៈ និងវិស័យឯកជន។
លោក Eric Sidgwick នាយកធនាគារអភិវឌ្ឍន៍អាស៊ីប្រចាំប្រទេសកម្ពុជាបានអត្ថាធិប្បាយថា ផែនការប្រតិបត្ដិធុរកិច្ចប្រចាំប្រទេសនេះបានបង្ហាញឱ្យឃើញពីវិស័យចម្បងៗ ដែលធនាគារអភិវឌ្ឍន៍អាស៊ីនឹងផ្ដោតការយកចិត្ដទុកដាក់ដើម្បីកាត់បន្ថយភាពក្រីក្រ ជម្រុញឱ្យមានកំណើនអោយកាន់តែមានប្រសិទ្ធភាព និងធ្វើការដោះស្រាយបញ្ហាប្រឈមធំៗផ្នែកបរិស្ថាន។
យោងតាមសេចក្តីប្រកាសព័ត៌មានរបស់ធនាគារអភិវឌ្ឍន៍អាស៊ីដែលត្រូវបានចែកផ្សាយនៅក្នុងសន្និសីទសារព័ត៌មាននៅថ្ងៃអង្គារនេះ សកម្មភាពដែលត្រូវអនុវត្តន៍ដើម្បីកាត់បន្ថយភាពក្រីក្ររបស់ពលរដ្ឋមានដូចជា ការពង្រឹងការដោះស្រាយបញ្ហាហេដ្ឋារចនាសម្ព័ន្ធដើម្បីការតភ្ជាប់ទំនាក់ទំនងរវាងជនបទនិងទីក្រុង ហើយដែលវានឹងបង្កើនឱកាសការងារ និងចំណូលនៅតាមទីប្រជុំជនតូចៗ និងនៅតាមទីជនបទនានា។ ប្រកានេះហើយដែលវានឹងបង្កើតអោយបានជម្រើសទីកន្លែងថ្មីទៀត ក្រៅពីរាជធានីភ្នំពេញ សម្រាប់អ្នកធ្វើចំណាកស្រុកពីជនបទនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ