កម្ពុជា-ថៃ -

អត្ថបទចុះផ្សាយនៅថ្ងៃ អង្គារ 14 សីហា 2012 - ព័ត៌មានទើបកែប្រើលើកចុងក្រោយ ថ្ងៃ អង្គារ 14 សីហា 2012

រយៈពេល ៦ ខែ ឆ្នាំ២០១២ ថៃបាញ់សម្លាប់ប្រជាជនកម្ពុជា ៣៨ នាក់

ការស្រាវជ្រាវរកពលរដ្ឋខ្មែរ៥នាក់ទៀតដែលស្លាប់និងបាត់ខ្លួននៅក្នុងទឹកដីថៃក្បែរព្រំដែនខេត្តឧត្តរមានជ័យ

ដោយ លី ម៉េងហួរ

ពលរដ្ឋកម្ពុជា ៣៨ នាក់ ត្រូវបានទាហានថៃបាញ់សម្លាប់ នៅពេលឆ្លងដែន ទៅកាប់ឈើខុសច្បាប់ ក្នុងរយៈពេល ៦ខែ ឆ្នាំ២០១២ គិតចាប់ពីខែមករា។ នេះបើតាមរបាយការណ៍បូកសរុបសង្ខេបលទ្ធផលការងារប្រចាំឆមាសទី១ និងទិសដៅឆមាសទី២ ឆ្នាំ២០១២ របស់ការិយាល័យទំនាក់ទំនងព្រំដែនកម្ពុជា-ថៃ។ របាយការណ៍ក៏បានបង្ហាញថា រយៈពេល ៦ខែដើមឆ្នាំនេះ ក៏មានពលរដ្ឋកម្ពុជា របួសចំនួន ១០ នាក់ និងថៃចាប់យកទៅដាក់ពន្ធនាគារ ចំនួន ១៩៤ នាក់ ព្រមទាំងបាត់ខ្លួនម្នាក់។

សេចក្តីរាយការណ៍របស់ លី ម៉េងហួរ

ស្តាប់ (02:35)

14/08/2012

ក្នុងរបាយការណ៍ចំនួន ៥ ទំព័រ ចុះថ្ងៃទី១២ ខែសីហា ឆ្នាំ២០១២ ធ្វើនៅប៉ោយប៉ែត ព្រំដែនកម្ពុជា-ថៃ ចុះហត្ថលេខាដោយលោកឧត្តមសេនីយ៍ត្រី ពេជ្រ វណ្ណា ប្រធានការិយាល័យទំនាក់ទំនងព្រំដែន កម្ពុជា-ថៃបានបង្ហាញថា ក្នុងរយៈពេល ៦ ខែ គិតចាប់ពីខែមករា ដល់ខែមិថុនា ឆ្នាំ២០១២ ករណីពលរដ្ឋកម្ពុជាកាប់ឈើនៅតាមព្រំដែន ត្រូវបានសមត្ថកិច្ចថៃ បាញ់សម្លាប់ចំនួន ៣៨ នាក់ របួសចំនួន ១០ នាក់ ចាប់ដាក់ពន្ធនាគារ ១៩៤ នាក់ និងបាត់ខ្លួនម្នាក់។ របាយការណ៍ក៏បង្ហាញថា ក្នុងនោះ ថៃក៏បានដោះលែងពលរដ្ឋកម្ពុជា ចំនួន ៨០ នាក់មកវិញ ដោយក្នុងនោះ ករណីកាប់ឈើចំនួន ៤៦ នាក់ និងករណីឆ្លងដែនខុសច្បាប់ចំនួន ៣៤ នាក់។

របាយការណ៍ដដែលក៏បានបង្ហាញថា សមត្ថកិច្ចថៃបានចាប់បញ្ជូនប្រជាពលរដ្ឋកម្ពុជាឆ្លងដែនខុសច្បាប់ ឲ្យត្រឡប់មកកម្ពុជា ចំនួន ១.៤៦៥ លើក សរុបចំនួន ៦៨.៦៥៩ នាក់។ ការិយាល័យទំនាក់ទំនងព្រំដែនកម្ពុជា-ថៃ ស្ថិតក្រោមគណៈកម្មាធិការព្រំដែនទូទៅកម្ពុជា-ថៃ នៅក្រោមក្រសួងការពារជាតិ។ ក្នុងកិច្ចប្រជុំបូកសរុបការងារ តំណាងក្រសួងការពារជាតិកម្ពុជា បានជំរុញឲ្យក្រុមការងារទំនាក់ទំនងព្រំដែនកម្ពុជា-ថៃបន្តពង្រឹងតួនាទី ជាស្ពាន និងជាអ្នកការទូត ជាមួយភាគីថៃ ដើម្បីសន្តិភាព សន្តិសុខ សុវត្ថិភាព និងការអភិវឌ្ឍន៍តាមព្រំដែន។ ក្នុងនោះ អាជ្ញាធរព្រំដែនកម្ពុជាក៏ត្រូវបង្កើនសហប្រតិបត្តិការជាមួយថៃ ដើម្បីកុំអោយកងកម្លាំងថៃ បាញ់សម្លាប់ និងចាប់ខ្លួនប្រជាពលរដ្ឋកម្ពុជានៅតាមបណ្តោយព្រំដែន។

ករណីទាហានថៃបន្តបាញ់ប្រហារលើពលរដ្ឋកម្ពុជាឆ្លងដែនទៅរកការងារធ្វើនៅប្រទេសថៃ ក៏ត្រូវបានលោក អំ សំអាត ប្រធានផ្នែកបច្ចេកទេសស៊ើបអង្កេតរបស់អង្គការសិទ្ធិមនុស្ស លីកាដូ បានជំរុញឲ្យអាជ្ញាធរថៃអនុវត្តច្បាប់ ចាប់ពលរដ្ឋឆ្លងខុសច្បាប់ទាំងនោះ ទៅកាត់ទោស។ ម្យ៉ាងទៀត តាមសកម្មជនសិទ្ធិមនុស្ស បើសិនជាថៃមិនបញ្ឈប់ការបាញ់ ប្រល័យជីវិតពលរដ្ឋកម្ពុជាទេ រដ្ឋាភិបាលកម្ពុជាគួរតែប្តឹងទៅកាន់ក្រុមប្រឹក្សាសិទ្ធិមនុស្សសហប្រជាជាតិ ពិសេសប្តឹងទៅអាស៊ានដែលកម្ពុជា និងថៃ ជាសមាជិកអាស៊ាន។ ក្រសួងការបរទេសកម្ពុជាបានធ្វើកំណត់ទូត តវ៉ាជាញឹកញាប់ទៅកាន់ក្រសួងការបរទេសថៃ ដើម្បីទាមទារឲ្យថៃបញ្ឈប់អំពើបាញ់ប្រហារដ៏ឃោរឃៅលើប្រជាពលរដ្ឋកម្ពុជាផងដែរ៕