សូវៀត-អាមេរិក -

អត្ថបទចុះផ្សាយនៅថ្ងៃ ចន្ទ 22 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 22 តុលា 2012

៥០ឆ្នាំមុន វិះៗផ្ទុះឡើងជាសង្គ្រាមលោកលើកទី៣

កាំជ្រួចមីស្ស៊ីលនុយក្លេអ៊ែររបស់សូវៀត ប្រភេទ SS-4 ដែលនៅបន្សល់ទុកតាំងនៅប្រទេសគុយបា (រូបថតឯកសារ)

REUTERS/Desmond Boylan/Files

ដោយ កែវ ឆាយា

គឺថ្ងៃ២២តុលាឆ្នាំ១៩៦២ ដែលលោកប្រធានាធិបតីស.រ.អា. John Kennedy បានថ្លែងសារទៅកាន់ប្រជាជាតិ ដោយប្រកាសថា សហភាពសូវៀតបានដំឡើងទៅហើយ នៅលើដែនដីគុយបា ជាកាំជ្រួចមីស្ស៊ីល តម្រង់ទៅលើដែនដីអាមេរិកតែម្តង។ កាំជ្រួចនេះត្រូវបានរកឃើញ កាលពីថ្ងៃ១៤តុលាឆ្នាំនោះដោយយន្តហោះឈ្លបយកការណ៍របស់អាមេរិក។ កាលណោះ អស់១៣ថ្ងៃជាប់ ពិភពលោកបានស្ថិតក្នុងភាពព្រួយបារម្ភរកលេខដាក់គ្មាន ទម្រាំ មហាអំណាចបរមាណូទាំងពីរ ចេះធ្វើសម្បទានទៅវិញទៅមក នៅថ្ងៃ២៨តុលា។

សេចក្តីរាយការណ៍របស់ កែវ ឆាយា ពីម៉ូស្គូ

ស្តាប់ (02:10)

22/10/2012

ក្នុងសារនោះ លោកប្រធានាធិបតី John Kennedy បានប្រកាសថា ស.រ.អា. ចាត់វិធានការខ្ទប់ផ្លូវសមុទ្រ និងផ្លូវអាកាស ព័ទ្ធជុំវិញទឹកដីគុយបា មិនឲ្យកងនាវា និងយន្តហោះសូវៀតបានទៅដល់កោះនោះឡើយ។ ព្រមទាំងស្នើភាគីសូវៀត ឲ្យរុះរើ ហើយដកចេញទៅ រាល់កាំជ្រួចមីស្ស៊ីលដែលមានដំឡើងនោះ ព្រមទាំងបត់ត្រឡប់ទៅវិញទៅ នាវាសូវៀតណា ដែលយាត្រាជិតដល់ទឹកដីគុយបាទៅហើយ។

ជាថ្នូរ ស.រ.អា. សន្យាមិនវាយប្រហារទៅលើកោះគុយបាសង្គមនិយម ដើម្បីទម្លាក់លោក Fidel Castro ឡើយ។ ប៉ុន្តែល័ក្ខខ័ណ្ឌធំបំផុត ដែលសហភាពសូវៀតទាមទារពីអាមេរិក គឺឲ្យរដ្ឋបាលវ៉ាស៊ីនតោន រុះរើដកចេញទៅ នូវរាល់កាំជ្រួចមីស្ស៊ីលនុយក្លេអ៊ែរអាមេរិកាំង ដែលពង្រាយ នៅលើដែនដី Turquie ជាប្រទេសស្និទ្ធនឹងអាមេរិកក្នុងបក្សសម្ព័ន្ធ OTAN និងដែលសុទ្ធតែជាកាំជ្រួច ទុកវាយប្រហារមកលើរដ្ឋធានីសូវៀត។ ពោលគឺមិនខុសគ្នាឡើយ ពីកាំជ្រួចមីស្ស៊ីលសូវៀត ដំឡើងនៅគុយបាកាលណោះ ដែលតែក្នុងប៉ុន្មាននាទីប៉ុណ្ណោះ អាចហោះទៅកំទេចរដ្ឋធានីអាមេរិក។

ជាតុល្យាការ នៃការចរចាគ្នាយ៉ាងស្វិតស្វាញ មេដឹកនាំសូវៀតកាលណោះ លោក Nikita Khrouchtchev និងលោកប្រធានាធិបតីអាមេរិកាំង John Kennedy ក៏ចេះនិយាយបានត្រូវគ្នា ហើយបញ្ជាទៅកងកម្លាំងប្រដាប់អាវុធរៀងៗខ្លួន ឲ្យនៅថ្ងៃ២៨តុលា កាលពី៥០ឆ្នាំមុននោះ ចាប់ផ្តើមដកចេញទន្ទឹមគ្នា គឺថា កាំជ្រួចមីស្ស៊ីលអាមេរិកាំងដកចេញពីដែនដីតួកគី ចំណែកកាំជ្រួមីស្ស៊ីលសូវៀត គឺដកចេញ ពីដែនដីគុយបា ហើយខ័ណ្ឌបញ្ចប់ទៅ របស់ដែលហៅថា “វិបត្តិនៅសមុទ្រការ៉ាអ៊ីបឆ្នាំ១៩៦២”។

អ្វីដែលគេចងចាំ គឺថា នាកិច្ចចរចានោះ មេដឹកនាំសូវៀត លោក Nikita Khrouchtchev បានបំភ័យគូសន្ទនាអាមេរិកាំងរបស់គាត់ លោក John Kennedy ថា សហភាពសូវៀតផលិតកាំជ្រួចមីស្ស៊ីល ដូចផលិតសាច់ក្រកអ៊ីចឹង។

ចំណែកកាំជ្រួចមីស្ស៊ីល ដែលត្រូវបានរកឃើញដោយយន្តហោះឈ្លបការណ៍អាមេរិក កាលណោះ ឃើញមានដំឡើងចំនួន ៤០ដើម។ វាជាកាំជ្រួចនុយក្លេអ៊ែរសូវៀតធុន R-12 ដែលត្រូវបក្សសម្ព័ន្ធអូតង់ ឲ្យឈ្មោះថា SS-4 ទុកសម្រាប់បាញ់ទៅចម្ងាយមធ្យម ដ្បិត ពីគុយបា ទៅរដ្ឋធានីអាមេរិក គឺចម្ងាយតែ ១.៨០០គម ប៉ុណ្ណោះ៕