អ្នកសារពត៌មានភូមា៥នាក់ជាប់ទោស១០ឆ្នាំពីបទសរសេរទម្លាយរឿងសម្ងាត់រដ្ឋ
តុលាការភូមាបានធ្វើការផ្តន្ទាទោសអ្នកសារពត៌មាន៥នាក់ ឲ្យជាប់ពន្ធនាគារ១០ឆ្នាំ និងត្រូវធ្វើការដោយបង្ខំ ពីបទដែលអ្នកសារពត៌មានទាំងនោះបានសរសេរអត្ថបទមួយ ចោទថារដ្ឋាភិបាលភូមាបានបង្កើតរោងចក្រផលិតអាវុធជាតិគីមី។ ក្រុមអ្នកឃ្លាំមើលការការពារសិទ្ធមនុស្សនៅភូមា បានហៅការកាត់ទោសនេះថា ជាការបំបិទមាត់អ្នកសារពត៌មានហើយថាវាជាការដើរថយក្រោយរបស់អជ្ញាធរភូមា វិលទៅរកការគ្រប់គ្រងដោយផ្តាច់ការវិញ។
ចុះផ្សាយនៅថ្ងៃ៖
ស្តាប់ - ០២:១៣
អ្នកសារពត៌មាន៥នាក់របស់សារពត៌មានភូមាមូយឈ្មោះថាUnity Weekly News ដោយក្នុងនោះមាននាយកប្រតិបត្តិម្នាក់ផង ត្រូវបានតុលាការតំបន់ម៉ាកវ៉េ ភាគកណ្តាលប្រទេសភូមា ផ្តន្ទាទោសឲ្យជាប់ពន្ធនាគារ១០ឆ្នាំ ហើយដោយត្រូវឲ្យធ្វើការដោយបង្ខំផង។ អ្នកសារពត៌មានទាំង៥នាក់នេះ ត្រូវបានចាប់ខ្លួនកាលពីខែ កុម្ភៈកន្លងទៅ បន្ទាប់ពីបានសរសេរផ្សាយពត៌មានមួយដោយចោទថា រដ្ឋាភិបាលភូមាបានដាក់ឲ្យដំណើរការរោងចក្រផលិតអាវុធជាតិផ្ទុះផ្សំពីជាតិគីមី។ ការចាប់ខ្លួននេះត្រូវបានធ្វើឡើង ដោយអនុវត្តទៅតាមបទបញ្ជាផ្ទាល់របស់លោក ថាន់ ហ្ស្វេ អតីតៈមេដឹកនាំយោធាភូមាកាលណោះ។
លោកវ៉ា វីន ម៉ូង ដែលជាមេធាវីការពារក្តីរបស់អ្នកសារពត៌មានជាប់ចោទបាននិយាយថា ការកាត់ទោសដែលយោងទៅលើច្បាប់ស្តីពីការរក្សាការសម្ងាត់រដ្ឋនេះ គឺមានភាពអយុត្តិធម៌បំផុត ពោលគឺគ្មានហេតុផលផ្លូវច្បាប់ត្រឹមត្រូវនោះទេ។ លោកថា កូនក្តីលោកនឹងធ្វើបណ្តឹងឧទ្ធរណ៍។
គួរបញ្ជាក់ផងដែរថា បន្ទាប់ពីបានកាន់កាប់អំណាចផ្តាច់ការយ៉ាងរឹងទទឹងអស់រយៈពេលជិត៥០ឆ្នាំ របបយោធាភូមាបានបន្ទន់ឥរិយាបថកាលពីឆ្នាំ២០១១កន្លងទៅ។ បន្ទាប់ពីនោះមក របបយោធាបានធ្វើកំណែរទំរង់ជាច្រើនវិស័យ ដែលធ្វើឲ្យបណ្តាប្រទេសលោកខាងលិចមានទំនុកចិត្ត ហើយបានដកទណ្ឌកម្មជាបន្តបន្ទាប់់។ពួកយោធាបានអនុញ្ញាតឲ្យមានការបោះផ្សាយសារពត៌មានប្រចាំថ្ងៃ និង មានការដោះលែងអ្នកទោសនយោបាយជាច្រើននាក់ផងដែរ។ស្ថិតនៅចំពោះមុខការកែរលម្អបែបនេះ ប្រទេសភូមាបានរំកិលខ្លូនឡើងជាប្រទេសទី១៤៥ ក្នុងចំណោមប្រទេសទាំង១៨០ ដែលមានការគោរពសិទ្ធសេរីភាពសារពត៌មាន។
ទោះបីជាយ៉ាងណាអ្នកតំណាងអង្គការReporters sans frontières បានសំដែងការព្រួយបារម្ភចំពោះការកាត់ទោសថ្មីនេះ ហើយថារដ្ឋាភិបាលភូមាកំពុងតែដើរថយក្រោយ វិលទៅរកការបំបិទសិទ្ធសេរីភាពសារពត៌មានសាជាថ្មីវិញ។ អ្នកតំណាងអង្គការ Human Rights Watch ក៏មានការព្រួយបារម្ភដូចគ្នាដែរ បន្តែលោកថាគេគួរចាត់ការកាត់ទោសនេះជារឿងដោយឡែក ពីព្រោះថាមានប្រទេសច្រើនណាស់ដែលមានច្បាប់ការពារការសម្ងាត់របស់រដ្ឋ។ ប៉ុន្តែទោះជាយ៉ាងណាលោកថា ដាក់ទោស១០ឆ្នាំគឺវាធ្ងន់ហួសហេតុពេកហើយ។ គួររំលឹកដែរថា កាលពីខែមករាឆ្នាំ២០១៣ រដ្ឋាភិបាលភូមាបានបដិសេធថាយោធាភូមា មិនបានប្រើប្រាស់អាវុធគីមី ក្នុងការវាយប្រហារទៅលើក្រុមជនជាតិភាគតិច កាឈីន នៅភាគខាងជើងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ