Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ ចន្ទ 22 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ ចន្ទ 22 តុលា 2012
ដាក់ទោសពន្ធនាគារ២ឆ្នាំ ក្នុងរឿងឃាតកម្មពាក់ព័ន្ធនឹងសកម្មជនការពារព្រៃឈើលោកឈុត វុទ្ធី
លោក ឈុត វុទ្ធី អតីតសកម្មជនការពារព្រៃឈើ
RFI/Leang Delux
នៅព្រឹកថ្ងៃចន្ទ ទី២២តុលានេះ ចៅក្រមតុលាការខេត្តកោះកុង បានសម្រេចផ្តន្ទាទោស បុរសជាប់ចោទម្នាក់ ដាក់ពន្ធនាគាររយៈពេល ២ ឆ្នាំ ក្នុងសំណុំរឿងឃាតកម្ម ជាប់ពាក់ព័ន្ធនឹងព្រឹត្តិការណ៍នៃការបាញ់សម្លាប់សកម្មជនការពារព្រៃឈើ លោក ឈុត វុទ្ធី កាលពីខែមេសា។ ក៏ប៉ុន្តែចៅក្រម បានតម្រូវឲ្យបុរសជាប់ចោទនោះ ជាប់ពន្ធនាគារត្រឹមតែ ៦ ខែប៉ុណ្ណោះ រីឯទោសនៅសល់ ១ ឆ្នាំ និង ៦ ខែទៀត ត្រូវព្យួរ។ ពោលគឺគិតដល់ថ្ងៃទី៣ ខែវិច្ឆិកា បុរសជាប់ចោទនឹងត្រូវរួចខ្លួនចេញពីពន្ធនាគារ បើសិនជាភាគីព្រះរាជអាជ្ញាមិនប្តឹងឧទ្ធរណ៍។
សាលក្រមនោះ ត្រូវបានប្រកាសដោយលោកចៅក្រម ខាន់ សុផារី ប្រធានក្រុមប្រឹក្សាជំនុំជម្រះរបស់តុលាការសាលាដំបូង ខេត្តកោះកុង នៅព្រឹកថ្ងៃចន្ទនេះ ក្រោយពីបើកសវនាការលើសំណុំរឿងក្តីពាក់ព័ន្ធនឹងឃាតកម្មលើសកម្មជនព្រៃឈើ លោក ឈុត វុទ្ធី កាលពីព្រឹកថ្ងៃទី៤ ខែតុលា ឆ្នាំ២០១២។ សាលក្រមនៃសំណុំរឿងក្តីនោះ ដំបូងឡើយ ចៅក្រមកំណត់ថា ត្រូវប្រកាស កាលពីថ្ងៃទី៨តុលា តែត្រូវពន្យារពេល មកប្រកាសនៅព្រឹកថ្ងៃចន្ទនេះវិញ។
សូមរម្លឹកថា សំណុំរឿងក្តីឃាតកម្ម លើលោក ឈុត វុទ្ធី សកម្មជនការពារព្រៃឈើដ៏ល្បីល្បាញ ត្រូវបានតុលាការខេត្តកោះកុង តម្កល់ទុក មិនចាត់ការទេ ព្រោះថា ជនជាប់ចោទ ថាជាឃាតកបាញ់សម្លាប់លោក ឈុត វុទ្ធី ដែលត្រូវបានអាជ្ញាធរអះអាងថា ជាប៉េអឹម ឈ្មោះ អ៊ិន រតនា បានស្លាប់ក្នុងព្រឹត្តិការណ៍ផ្ទុះអាវុធ កាលពីរសៀលថ្ងៃទី២៦ ខែមេសា ឆ្នាំ២០១២។
ដូច្នេះមានតែជនជាប់ចោទតែម្នាក់គត់ ក្នុងសំណុំរឿងក្តីនោះ គឺយុវជន រ៉ាន់ បូរ័ត្ន ជាសន្តិសុខក្រុមហ៊ុន Timber Green ត្រូវបានចោទប្រកាន់ពីបទឃាតកម្មដោយអចេតនា តាមរយៈការបាញ់សម្លាប់ ដោយអចេតនាលើ ប៉េអឹមឈ្មោះ អ៊ិន រតនា ក្នុងព្រឹត្តិការណ៍ផ្ទុះអាវុធ កាលពីថ្ងៃទី២៦ ខែមេសា ឆ្នាំ២០១២។
ចៅក្រមបានប្រកាសថា ប៉េអឹម អ៊ិន រតនា ពិតជាបានបាញ់សម្លាប់លោក ឈុត វុទ្ធី ហើយក្រោយមក រ៉ាន់ បូរ័ត្ន បានទៅដណ្តើមកាំភ្លើងអាកា ពីប៉េអឹម អ៊ិន រតនា ដើម្បីរារាំងកុំឲ្យមានការផ្ទុះអាវុធតទៅទៀត ក៏រាលកៃកាំភ្លើងលើប៉េអឹម អ៊ិន រតនា ស្លាប់នៅនឹងកន្លែងកើតហេតុ ដែលជាទីតាំងក្រុមហ៊ុន Timber Green មានគំនរឈើ និងវល្លិ៍ល្មៀត នៅតំបន់ព្រៃភ្នំ ក្នុងខេត្តកោះកុង។
ក្នុងព្រឹត្តិការណ៍នោះ ក្រុមសន្តិសុខ និងប៉េអឹម បីបួននាក់ បានព្យាយាមរារាំងលោក ឈុត វុទ្ធី និងស្ត្រីអ្នកកាសែតពីរនាក់ មិនឲ្យថតរូប និងយកព័ត៌មានពីការកាប់ឈើនៅតំបន់នោះ កាលពីថ្ងៃទី២៦ ខែមេសា ឆ្នាំ២០១២ រហូតនាំឲ្យមានការផ្ទុះអាវុធ។
លោកព្រះរាជអាជ្ញារង ស្រី ម៉ាក់នី តំណាងអយ្យការរបស់តុលាការ ខេត្តកោះកុង នៅថ្ងៃនេះ បានបដិសេធមិនធ្វើអត្ថាធិប្បាយអ្វីឡើយ ជុំវិញសំណួរថា តើលោកនឹងធ្វើការប្តឹងឧទ្ធរណ៍ជំទាស់នឹងសាលក្រមនេះ ឬក៏មិនប្តឹងបន្តទៀតនោះ។
ចំណែកសកម្មជនអង្គការសិទ្ធិមនុស្សលីកាដូ លោក អំ សំអាត ដែលបានតាមដានសំណុំរឿងក្តីដ៏រសើបនៅខេត្តកោះកុងនោះ បានចាត់ទុកថា សាលក្រមរបស់តុលាការខេត្តកោះកុង នៅថ្ងៃនេះ ជាការប្រកាសបិទបញ្ចប់សំណុំរឿងក្តីឃាតកម្មលើសកម្មជនការពារព្រៃឈើ លោក ឈុត វុទ្ធី ដែលជាការបន្សល់ទុកនូវភាពអយុត្តិធម៌សម្រាប់ក្រុមគ្រួសាររបស់លោក ឈុត វុទ្ធី។ សកម្មជនសិទ្ធិមនុស្សក៏បង្ហាញការសោកស្តាយលើករណីស្លាប់សកម្មជនបរិស្ថាន លោក ឈុត វុទ្ធី ដែលតាំងពីដំបូង អាជ្ញាធររដ្ឋាភិបាល ចង់បិទបញ្ចប់សំណុំរឿងក្តីដ៏រសើបនោះ។
ជាការកត់សម្គាល់ បើសិនជាភាគីព្រះរាជអាជ្ញា មិនប្តឹងជំទាស់នឹងសាលក្រមនោះទេ ជនជាប់ចោទ លោក រ៉ាន់ បូរ័ត្ន នឹងត្រូវរួចទោស នាថ្ងៃទី៣ ខែវិច្ឆិកា ឆ្នាំ២០១២ ព្រោះយុវជននោះ ជាប់ពន្ធនាគាររយៈពេល ៦ ខែ គិតពីពេលតុលាការ ចេញដីឃុំខ្លួន ពីបទមនុស្សឃាត ដោយអចេតនា៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (2)
អយុត្តិធម៌ណាស់
បើបិតជាឃាតករមែនម៉េចបែរជាជាប់គុកតែក្នុងរយះពេលពីរឆ្នាំអញ្ចឹង, ពិតជាអយុត្តិធម៌ចំពោះជនរងគ្រោះមែន,បើជនរងគ្រោះប៉ះចប់សាច់ញាតិរបស់តុលាការវិញប្រហែលជាជាប់គុកមួយជីវិតហើយ, ពិតជាយ៉ាប់ណាស់អ្នកអនុវត្តន៍ច្បាប់ស្រុកខ្មែរ។
ពិតជាមហាអយុត្តិធ៌មណាស
It is not fare at all. The court is belongs only for the winner! Oh God! RFI, do you think it is justice?
ប្រតិកម្មជុំវិញអត្ថបទនេះ