Francophonie -

អត្ថបទចុះផ្សាយនៅថ្ងៃ សៅរ៍ 13 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 13 តុលា 2012

ជំនួបកំពូលប្រទេសនិយាយភាសាបារាំង ប្រព្រឹត្តទៅអាហ្វ្រិកកណ្តាលជាលើកទីមួយ

វិមានប្រជាជន ត្រៀមខ្លួនជាស្រេចនឹងទទួលជំនួបកំពូលប្រទេសនិយាយភាសាបារាំង Francophonie លើកទី១៤ នៅប្រទេសកុងហ្កោ

REUTERS/Noor Khamis

ដោយ អៀង សុខម៉ិញ

សាធារណរដ្ឋប្រជាធិបតេយ្យកុងហ្កោ ត្រូវធ្វើជាម្ចាស់ផ្ទះរៀបចំជំនួបកំពូលប្រទេសនិយាយភាសាបារាំងលើកទី ១៤ នៅថ្ងៃសៅរ៍ទី ១៣ តុលាឆ្នាំ ២០១២នេះ ដោយមានប្រមុខរដ្ឋ និងរដ្ឋាភិបាលជាង១០ប្រទេសចូលរួម និងក្រោមអធិបតីភាពលោកប្រធានាធិបតីបារាំង ហ្វ្រង់ស័រ ហូឡង់ (François Hollande)។ ក្រៅពីសំណុំរឿងបរិស្ថាន សេដ្ឋកិច្ច និងវិបត្តិនៅប្រទេសម៉ាលី ជាកម្មវត្ថុចំបងនៃជំនួបប្រចាំឆ្នាំលើកនេះ ក៏នឹងត្រូវផ្តោតទៅលើស្ថានភាពនយោបាយរបស់ប្រទេសកុងហ្កោ ជាម្ចាស់ផ្ទះតែម្តង។

សេចក្តីរាយការណ៍របស់ អៀង សុខម៉ិញ

ស្តាប់ (02:09)

13/10/2012

មានប្រមុខរដ្ឋនិងរដ្ឋាភិបាល តែ១៥ប្រទេសប៉ុណ្ណោះ ភាគច្រើនជាប្រទេសនៅទ្វីបអាហ្វ្រិក ដែលបង្ហាញវត្តមានក្នុងឱកាសជំនួបលើកទី១៤នេះ ផ្ទុយពីជំនួបកំពូលលើកទី ១៣ នៅប្រទេសស្វីស ដែលមានសមាជិកចូលរួមដល់ទៅជាង៤០ប្រទេស។

ប៉ុន្តែសម្រាប់កុងហ្កោ អាជ្ញាធរបានប្រើមធ្យោបាយធំ ដាក់ពង្រាយកងកម្លាំងរក្សាសន្តិសុខយ៉ាងច្រើនសន្ធឹកសន្ធាប់ នៅពេញទីក្រុង មានទាំងប៉ូលិស និងយោធានៃឆ្មាំសាធារណរដ្ឋផង។ ជាមួយនឹងចំនួនប្រជាជន ៧០លាននាក់ សាធារណរដ្ឋប្រជាធិបតេយ្យកុងហ្កោ ជាប្រទេសនិយាយភាសាបារាំងលេខមួយ។ ដំបូងឡើយ ប្រធានាធិបតីបារាំង លោក ហ្វ្រង់ស័រ ហូឡង់ បានបង្ហាញពីភាពស្ទាក់ស្ទើរមិនចង់មានវត្តមានក្នុងជំនួបកំពូលនេះទេ តែទីបំផុត លោក ហូឡង់ បានអញ្ជើញមកដល់តាំងពីព្រលឹមអុលព្រឹកថ្ងៃសៅរ៍ និងត្រូវជួបសន្ទនាជាមួយប្រធានាធិបតីកុងហ្កោ និងបក្សប្រឆាំង បន្ទាប់មកនឹងឡើងថ្លៃងសុន្ទរកថានៅចំពោះមុខសភាប្រជាជនកុងហ្កោថែមទៀត ដើម្បីលើកឡើងពីបញ្ហាសិទ្ធិមនុស្ស និងប្រជាធិបតេយ្យ។

ក្នុងពេលរសៀល ថ្នាក់ដឹកនាំរដ្ឋនៃប្រទេសជាសមាជិកFrancophonies ត្រូវពិភាក្សាដោយបិទទ្វារ អំពីស្ថានភាពនយោបាយរបស់ប្រទេសកុងហ្កោផ្ទាល់តែម្តង ដែលកំពុងមានជម្លោះខ្លាំង នៅភាគខាងកើតប្រទេស។

ជាផ្លូវការ ជំនួបកំពូលប្រទេសនិយាយភាសាបារាំងលើកទី ១៤នេះ មានប្រធានបទផ្តោតជាសំខាន់ទៅលើ “បញ្ហាបរិស្ថាន និងសេដ្ឋកិច្ចនៅចំពោះអភិបាលកិច្ចពិភពលោក”។ ប៉ុន្តែថ្នាក់ដឹកនាំប្រទេសជាសមាជិក ក៏ត្រូវជជែក និងពិភាក្សាសំណុំរឿងក្តៅៗនៅក្នុងតំបន់ អាហ្វ្រិកមួយទៀត គឺ វិបត្តិនៅប្រទេសម៉ាលី។ ម៉ាលី ប្រទេសនិយាយភាសាបារាំងដែរ តែភាគខាងជើងកំពុងតែត្រូវកាន់កាប់ដោយពួកអ៊ីស្លាមជ្រុលនិយមស្និទ្ធនឹងពួកភេរវនិយមអាល់កៃដា។ បារាំងចង់ឱ្យអាហ្វ្រិកព្រមព្រៀងគ្នាស្នើសុំអន្តរាគមន៍យោធាអន្តរជាតិ ក្នុងក្របខ័ណ្ឌអង្គការសហប្រជាជាតិ ដើម្បីជួយអាជ្ញាធរម៉ាលីដណ្តើមយកភាគខាងជើងពីកណ្តាប់ដៃពួកភេរវនិយមមកវិញ។

ក្រុមប្រឹក្សាសន្តិសុខអង្គការសហប្រជាជាតិ ដែលទើបអនុម័ត ជាឯកច្ឆ័ន្ទនៅយប់មិញ លើសេចក្តីសម្រេចចិត្តស្នើឡើងដោយបារាំង ព្រមព្រៀងអនុញ្ញាតឱ្យអន្តរាគមន៍យោធាអន្តរជាតិលើទឹកដីម៉ាលីភាគខាងជើង ប្រសិនបើអាជ្ញាធរក្រុងបាម៉ាកូស្នើសុំ៕