Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ អង្គារ 16 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ អង្គារ 16 តុលា 2012
រដ្ឋាភិបាលរៀបចំមហាជន១០ម៉ឺននាក់ទទួលដង្ហែព្រះបរមសពសម្តេចឪនៅថ្ងៃ១៧តុលា
ប្រជាជនខ្មែរនាំគ្នាគោរពចំពោះវិញ្ញាណខន្ធរបស់អតីតមហាក្សត្រខ្មែរនរោត្តមសីហនុនៅមុខព្រះបរមរាជវាំងនៅភ្នំពេញថ្ងៃអង្គារទី១៦តុលា២០១២
REUTERS/Samrang Pring
លោក ជា គាន អនុ ប្រធានអចិន្ត្រៃយ៍របស់គណៈកម្មាធិការជាតិរៀបចំបុណ្យជាតិនិងអន្តរជាតិ បានប្រាប់វិទ្យុបារាំងអន្តរជាតិ នៅរសៀលថ្ងៃអង្គារនេះថា យ៉ាងហោចណាស់ នឹងមានមហាជនប្រមាណ១០ម៉ឺននាក់ ចូលរួមទទួលនិងដង្ហែព្រះបរមសពសម្តេចឪ ព្រះករុណាសម្តេចព្រះនរោត្តមសីហនុ ចាប់ពីព្រលានយន្តហោះពោធិ៍ចិនតុង រហូតដល់ព្រះបរមរាជវាំង។ តាមគម្រោង ព្រះបរមសពរបស់សម្តេចឪនឹងត្រូវដង្ហែពីទីក្រុងប៉េកាំង មកដល់ព្រលានយន្តហោះភ្នំពេញនៅរសៀលម៉ោង៣ថ្ងៃពុធទី១៧ខែតុលាស្អែកនេះ។
រដ្ឋាភិបាល បានរៀបចំកម្លាំងមហាជនប្រហែលជា ១០ ម៉ឺននាក់ ដើម្បីទទួលព្រះបរមសពសម្តេចព្រះនរោត្តមសីហនុ ដោយត្រូវចាត់ចែងឈរដង្ហែចាប់ពីព្រលានយន្តហោះពោធិ៍ចិនតុងរហូតដល់មុខព្រះបរមរាជវាំង។ ក្នុងនោះក៏មាននិមន្តព្រះសង្ឃ ៩០ អង្គតំណាងឲ្យព្រះជន្មាយុ ៩០ព្រះវស្សារបស់សម្តេចឪ សម្រាប់បង្សុកូលនៅក្នុងព្រលានផង ហើយពេលដង្ហែព្រះបរមសពសម្តេចឪ មកដល់វិមានឯករាជ្យ ក៏នឹងមានការឈប់បង្សុកូលម្តងទៀត។ នេះបើតាមប្រសាសន៍របស់លោក ជា គាន អនុប្រធានអចិន្ត្រៃយ៍នៃគណៈកម្មាធិការជាតិ រៀបចំបុណ្យជាតិនិងអន្តរជាតិ។
លោក ជា គាន បានប្រាប់វិទ្យុបារាំងអន្តរជាតិបន្តថា មហាជន ១០ ម៉ឺននាក់នោះ ជាកម្លាំងមន្ត្រីរាជការ ប៉ូលិសទាហាន សិស្សនិស្សិត ពុទ្ធបរិស័ទ និងប្រជារាស្ត្រគ្រប់ស្រទាប់វណ្ណៈ។
មកដល់រសៀលថ្ងៃទី១៦ខែតុលាឆ្នាំ២០១២ គេឃើញនៅតាមផ្ទះនិងតាមដងផ្លូវនានា ពិសេសនៅភ្នំពេញ ទង់ជាតិ ត្រូវបានតាំង ដោយបង្ហូតនៅត្រឹមពាក់កណ្តាលដង ដើម្បីចូលរួមកាន់ព្រះរាជមរណៈទុក្ខរបស់សម្តេចឪ។ ព្រះឆាយាលក្ខណ៍របស់ព្រះករុណា សម្តេចព្រះនរោត្តម សីហនុក៏ត្រូវបានដាក់តាំងនៅមុខសណ្ឋាគារនិងតាមទីសាធារណៈ។
លោក ជា គានបានបន្ថែមថា នៅតាមក្រសួងស្ថាប័ននានា កំពុងរៀបចំតាំងព្រះឆាយាលក្ខណ៍ព្រះករុណា សម្តេចព្រះ នរោត្តម សីហនុ ក្នុងរូបភាពជារបៀបកាន់ទុក្ខ ដោយដាក់បូខ្មៅមួយនិងគ្រឿងសក្ការៈបូជាថ្វាយព្រះអង្គ។ នៅខេត្តខ្លះ ក៏មានធ្វើពិធីធំ ដោយជ្រើសយកទីតាំងណាមួយ ហើយជួបជុំគោរពវិញ្ញាណក្ខ័ន្ធព្រះបរមសពព្រះអង្គ។ តាមវត្តអារាម ក៏មានរៀបចំពិធីបុណ្យតាមប្រពៃណី ឧទ្ទិសថ្វាយព្រះករុណាផងដែរ ពិសេសនៅថ្ងៃភ្ជុំបិណ្ឌ ថ្ងៃទី១៥តុលាម្សិលមិញ អាជ្ញាធរបានសំណូមពរឲ្យវត្តនិមួយៗ ឧទ្ទិសព្រះរាជពរថ្វាយដល់ព្រះបរមសពរបស់ព្រះអង្គផងដែរ។
ជាមួយគ្នានោះ លោក ជា គានក៏បានបន្ថែមថា រដ្ឋាភិបាល បានចេញសារាចរណែនាំឲ្យចូលរួមកាន់ព្រះរាជមរណៈទុក្ខសម្តេចឪរយៈពេល ៧ ថ្ងៃ គិតចាប់ពីថ្ងៃទី១៧ ខែតុលា ឆ្នាំ២០១២ ដល់ថ្ងៃទី២៣ខែតុលាឆ្នាំ២០១២។ តែរយៈពេលកាន់ទុក្ខនេះ មិនត្រូវបានកំណត់ជាថ្ងៃឈប់សម្រាកទេ។
តាមគម្រោង ព្រះបរមសពរបស់សម្តេចឪ នរោត្តម សីហនុនឹងត្រូវព្រះមហាក្សត្រ សម្តេចព្រះបរមនាថ នរោត្តម សីហមុនី និងលោកនាយករដ្ឋមន្ត្រី ហ៊ុន សែន ព្រមទាំងព្រះរាជវង្សានុវង្ស ដង្ហែតាមយន្តហោះមកពីទីក្រុងប៉េកាំង ប្រទេសចិន មកដល់ព្រលានយន្តហោះអន្តរជាតិភ្នំពេញនៅរសៀលម៉ោង៣ថ្ងៃទី១៧ខែតុលាឆ្នាំ២០១២។
សូមរម្លឹកថា សម្តេចឪ ព្រះករុណា សម្តេចព្រះ នរោត្តម សីហនុ បានយាងចូលព្រះទិវង្គត ក្នុងព្រះជន្មាយុ ៩០ ព្រះវស្សា កាលពីយប់ម៉ោង ១ និង ២០ នាទី ថ្ងៃទី១៥ ខែតុលា ឆ្នាំ២០១២ ដោយព្រះជរាពាធ នៅមន្ទីរពេទ្យ ទីក្រុងប៉េកាំង ប្រទេសចិន។
ទូរទស្សន៍ក្នុងស្រុក នឹងធ្វើការផ្សាយបន្តផ្ទាល់ពីការដង្ហែព្រះបរមសពរបស់សម្តេចឪ នរោត្តម សីហនុ នៅពេលមកដល់ព្រលានយន្តហោះអន្តរជាតិភ្នំពេញ នារសៀលម៉ោង ៣ ថ្ងៃទី១៧ ខែតុលា ឆ្នាំ២០១២៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (1)
សូមចូលរួម ការសោកស្ដាយ
ទោះជាយ៉ាងណាក៏ដោយ ចំពោះខ្ញុំយល់ថា លោកជាបិតាប្រទេសជាតិរបស់យើង ទោះជាលោកមានកំហុសខ្លះ ក៏មានការធ្វើត្រូវដែរ នរយោបាយតែងតែមានខុសនិងត្រូវ មិនមែនឈ្នះរហូតទេ រឿងសំខាន់នោះគឺលោក ធ្វើអ្វីៗ ក៏ដើម្បីប្រទេសជាតិយើង និង ប្រជាពលរដ្ឋ
ព្រមទាំងការពារមាតុភូមិរបស់យើងជានិច្ច ពិសេសលោកមានការព្រួយបារម្មណ៍ចំពោះសុខទុក្ខរបស់ប្រជា
ពលរដ្ឋជានិច្ច និង រហូតដល់ដង្ហើមចុងក្រោយរបស់ព្រះអង្គ ។
ប្រតិកម្មជុំវិញអត្ថបទនេះ