Delicious
Digg
Facebook
Twitter
Yahoo!
Technorati
រុស្ស៊ី-ចំណាកស្រុក -
អត្ថបទចុះផ្សាយនៅថ្ងៃ សុក្រ 21 កញ្ញា 2012 -
ព័ត៌មានទើបកែប្រើលើកចុងក្រោយ ថ្ងៃ សុក្រ 21 កញ្ញា 2012
ពលរដ្ឋរុស្ស៊ីប្រមាណ១/៣ប្រាថ្នាចាកចេញទៅរស់នៅស្រុកក្រៅ
ពលរដ្ឋរុស្ស៊ីប្រមាណ១/៣ ប្រាថ្នាចាកចេញទៅរស់នៅស្រុកក្រៅ-នេះជាតួលេខនៃលទ្ធផលស្ទង់មតិរបស់អង្គការសង្គមសាស្រ្តរុស៊ីRomir
RFI/Keo Chhaya
តួលេខនេះជាលទ្ធផលនៃការស្ទង់មតិធ្វើដោយអង្គការសង្គមសាស្ត្ររុស្ស៊ី Romir តាំងពីដើមខែកញ្ញាមក។ លទ្ធផលដែលទើបចេញផ្សាយថ្ងៃនេះ បញ្ជាក់ឲ្យឃើញពីការកើនឡើងនៃទំនោរនិរប្រវេសន៍របស់ប្រជាពលរដ្ឋរុស្ស៊ី បើប្រៀបទៅនឹង៧ឆ្នាំមុន។
តាមការវិភាគនៃអង្គការសង្គមសាស្ត្ររុស្ស៊ Romir បំណងអ្នកស្រុករុស្ស៊ី ចាកចេញពីទឹកដីកំណើតទៅរស់នៅតាមប្រទេសក្រៅ មានកម្រិតកើនខ្លាំងឡើង គឺក្រោយពីលោកពូទីនបានត្រឡប់ទៅកាន់មុខតំណែងកំពូលជាប្រធានាធិបតីវិញកាលពីខែឧសភាឆ្នាំនេះ។
យ៉ាងណាមិញ លទ្ធផលនៃការស្ទាបស្ទង់ធ្វើនៅតាមក្រុងនៃប្រទេស ដែលមានបណ្តាជនចំនួនចាប់ពី ១០០.០០០នាក់ឡើងទៅសឲ្យឃើញថា ៖
ជនជាតិរុស្ស៊ីដល់ទៅ៣១% ឬប្រមាណ១/៣ ចង់ចាកចេញទៅរស់នៅស្រុកក្រៅ។
តួលេខនេះគឺ១២% ច្រើនជាងកាលពី៧ឆ្នាំមុនដែលកាលណោះ មានត្រឹមតែ ១៩%ប៉ុណ្ណោះឬមិនដល់១/៥ផង។
ទន្ទឹមនេះ ក្នុងចំណោមអ្នកស្រុកដែលត្រូវបានស្ទង់មតិ មានដល់ជាងពាក់កណ្តាលឬ៥៥% មិនចង់ផ្លាស់ប្តូរទីលំនៅឡើយ។ ទោះយ៉ាងណាក្តី ក៏តួលេខនេះនៅតែទាបជាងកាលពីឆ្នាំ ២០០៥ ដែលមានដល់ទៅ៦៣% ប្តេជ្ញាស្រឡាញ់ទឹកដីកំណើតខ្លួនហើយគ្មានចេតនាចាកចេញសោះឡើយ។
សំដែងនូវបំណងញឹកញយជាងគេចង់ទៅរស់នៅស្រុកក្រៅ គឺបុរស ដែលមានចំណេះដឹងជាន់ខ្ពស់ហើយរមែងទទួលប្រាក់ចំណូលយ៉ាងច្រើនឬនៅលីវឬ រួមរស់ជាមួយនារីជាគូខ្លួន ប៉ុន្តែគ្មានចំណងអាពាហ៍ពិពាហ៍ទេ។ យុវជនបែបនេះ ក្នុងវ័យពី១៨ទៅ២៤ឆ្នាំ មានចំនួនដល់ទៅ ៤៨%ឬសឹងពាក់កណ្តាលចង់ចាកចេញពីរុស្ស៊ីទៅរស់នៅបរទេស។
ចំណែកប្រទេសដែលគេចង់ទៅរស់នៅនោះ ៖
ជាប់ចំណាត់ថ្នាក់ទី១ គឺអឺរ៉ុបខាងលិចដែលមានជាតិរុស្ស៊ី ដល់៣៧% ចង់ធ្វើ ចំណាកស្រុកទៅរស់នៅ។ កាលពី៧ឆ្នាំមុន តួលេខនេះ មានដល់ទៅ៥១%។ មូលហេតុនៃការធ្លាក់ចុះនេះ គឺមកពីតំបន់អឺរ៉ុបខាងលិចនោះ កំពុងឆ្លងកាត់វិបត្តិហិរញ្ញវត្ថុ។
ជាប់លេខ២គឺប្រទេស Australie និង Novelle Zelande ដែលឥឡូវ មានជាតិរុស្ស៊ី ២៣% ចង់ទៅរស់នៅគឺកើនឡើង ៤% បើប្រៀបទៅនឹង១៩% កាលពី៧ឆ្នាំមុន។
ជាប់លេខ៣ គឺ ជប៉ុននិងបណ្តាប្រទេសអាស៊ីអគ្នេយ៍ដែលមានជាតិរុស្ស៊ី ចំនួន២១% ចង់ទៅរស់នៅឬកើនឡើងសឹង៣ដងបើប្រៀបទៅនឹងឆ្នាំ២០០៥ ដែលមានត្រឹម៨% ប៉ុណ្ណោះ ដ្បិតតំបន់អាស៊ីអគ្នេយ៍ មានសេដ្ឋកិច្ចកំពុងលូតលាស់យ៉ាងសកម្មទាក់ទាញទេសចរកាន់តែច្រើនឡើងៗ ដោយសារធាតុអាកាសអនុគ្រោះនិងតម្លៃធូរស្រាលនៃជីវភាពនៅទីនោះ៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ