ពិភពលោកប្រារព្ធទិវាបុណ្យការងារក្រោមប្រធានបទផ្សេងៗគ្នា
បណ្តាជនរាប់លាននាក់ នៅគ្រប់ជ្រុងនៃពិភពលោក បានជួបជុំគ្នាប្រារព្ធទិវាបុណ្យការងារ ឬទិវាពលកម្មអន្តរជាតិ ៖ ពីជើងទៅត្បូង ពីលិចទៅកើត ពីហុងកុង ទៅ តួកគី ឆ្លងកាត់ម៉ូស្គូ អឺរ៉ុប រួចចុះមកឥណ្ឌូណេស៊ី ម៉ាឡេស៊ី ពលករ កម្មករ បាតុករ សហជីពបានប្រមូលផ្តុំគ្នាក្នុង ថ្ងៃទី ១ ឧសភា ក្រោមរូបភាពជាបាតុកម្ម ជាការដើរដង្ហែក្បួន ឬជាជួបប្រជុំគ្នា ... ដែលពេលខ្លះអមដោយអំពើហិង្សា ប៉ះទង្គិចគ្នារវាងប៉ូលិស និងក្រុមបាតុករ។
ចុះផ្សាយនៅថ្ងៃ៖
នៅប្រទេសតួកគី ប៉ូលិសបានប្រើមធ្យោបាយធំ ជាកាំភ្លើងបាញ់ទឹក បាញ់ឧស្ម័នបង្ហូរទឹកភ្នែក បំបែកហ្វូងបាតុករដែលនាំគ្នាជម្នះបម្រាមអាជ្ញាធរមិនឱ្យធ្វើដង្ហែក្បួនបាតុកម្ម ទៅកាន់ទីលាន Taksin ទីលានជានិមិត្តរូបនៃការបះបោរប្រឆាំងនឹងរដ្ឋាភិបាល ដូចអ្វីដែលមានកើតឡើងទន្ទឹមគ្នានេះនៅក្នុងប្រទេសកម្ពុជា។
បាតុកម្មក៏មានរៀបចំធ្វើឡើងដែរ នៅប្រទេសម៉ាឡេស៊ី ឥណ្ឌូណេស៊ី ហុងកុង សិង្ហបុរី តៃវ៉ាន់ ឬកូរ៉េខាងត្បូង ដើម្បីទាញចំណាប់អារម្មណ៍និងបរិហារ អំពីជីវភាពកាន់តែលំបាក ទំនិញឡើងថ្លៃ និងពិសេសតម្លៃផ្ទះសម្បែងខ្ពស់ ដែលធ្វើឱ្យគម្លាតសង្គមមានកាន់តែជ្រៅ។
នៅអឺរ៉ុប មានក្បួនដង្ហែជាប្រពៃណីជាច្រើនសម្រាប់ឧទ្ទិសដល់ថ្ងៃទី ១ ឧសភា ទិវាការងារអន្តរជាតិ ដែលបានបង្កើតឡើងនាចុងសតវត្សរ៍ទី ១៩ នៅសហរដ្ឋអាមេរិក ដោយ ចលនាទាមទារកាត់បន្ថយពេលម៉ោងធ្វើការ។ សម្រាប់ប្រទេសបារាំង ក្រុមសហជីព មិនសូវស៊ីចង្វាក់គ្នាទេ ខ្លះបានឆ្លៀតយកទិវានេះ ដើម្បីរិះគន់រដ្ឋាភិបាល ដែលទើបអនុម័តផែនការសេដ្ឋកិច្ច៥០ពាន់លានអឺរ៉ូ និងខ្លះទៀត ធ្វើបាតុកម្មក្រោមប្រធានបទអឺរ៉ុប។ អេស្ប៉ាញដែលទើបស្គាល់កំណើនសេដ្ឋកិច្ចរើបឡើងវិញ ក៏នាំគ្នាចុះថ្នល់ នៅរដ្ឋធានី និងក្រុងជាង៧០ ព្រោះអត្រាអ្នកអត់ការងារធ្វើខ្ពស់ត្រដឹមនៅឡើយ។
នៅអាហ្វ្រិកខាងត្បូង ដោយការបោះឆ្នោតកាន់តែខិតជិតមកដល់ លោកប្រធានាធិបតីបានចេញមុខធ្វើសន្ទរកថា ក្នុងអង្គមិទ្ទិញឧទ្ទិសដល់ទិវាការងារ។
ដោយឡែកនៅក្រុងម៉ូស្គូ ទីលានក្រហម ការប្រមូលផ្តុំអបអរទិវាពលកម្មអន្តរជាតិមានទំហំធំក្រៃ និងអត្ថន័យពិសេសខុសពីសព្វមួយដង។ បាតុករប្រមាណ១សែននាក់ បានយកទិវានេះទៅភ្ជាប់នឹងប្រវត្តិអតីតកាលជាសហភាពសូវៀត។ វិបត្តិអ៊ុយក្រែន បានត្រឹមតែបំផុសបំផុលឱ្យឆន្ទៈជាតិនិយម កាន់តែរីកធំធាត់។ ដឹកនាំដោយអភិបាលក្រុងម៉ូស្គូ ទិវាការងារអន្តរជាតិឆ្នាំនេះ ត្រូវបានរៀបចំឡើងជាលើកទីមួយ គិតចាប់ពីឆ្នាំ១៩៩១ នៅមុខវិមានក្រេមឡាំង ជាមួយជ័យឃោសគាំទ្រលោកពូទីន មិនខុសអ្វីពីសម័យសហភាពសូវៀត ដែលជារៀងរាល់ថ្ងៃទី១ឧសភា មានការប្រារព្វពិធីបុណ្យនៅទីលានក្រហមនេះ អមដោយព្យុះហយាត្រយោធា និងស៊ីវិលផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ