ក្រសួងយុត្តិធម៌៖ ដំណើរការលើកលែង និងបន្ធូរបន្ថយទោសឆ្នាំនេះ តឹងរឹង
គណៈកម្មការជាតិរៀបចំការលើកលែងទោស និងបន្ធូរបន្ថយទោសនៃក្រសួងយុត្តិធម៌ នៅថ្ងៃទី២៨ តុលានេះ បានបិទបញ្ចប់ដំណើរការពិនិត្យនិងវាយតម្លៃលើបេក្ខភាពទណ្ឌិតដែលត្រូវលើកលែងទោស និងបន្ធូរបន្ថយទោសហើយ។ ក្រសួងបានបញ្ជាក់ថាឆ្នាំនេះនីតិវិធីនៃការជ្រើសរើសត្រូវបានរឹតបន្តឹង។ ពោលគឺមានអ្នកទោសតិចតួចតែប៉ុណ្ណោះដែលត្រូវនឹងលើកលែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
មានអ្នកទោសមិនដល់៦០នាក់ផងនោះទេ ដែលនឹងត្រូវទទូលបានការលើកលែងទោសទាំងស្រុងក្នុងព្រះរាជពិធីបុណ្យអ៊ុំទូកឆ្នាំ២០១៤នេះ។ នេះបើតាមការបញ្ជាក់ពីលោកកឹម សន្តិភាពអ្នកនាំពាក្យក្រសួងយុត្តិធម៌នៅរសៀលថ្ងៃអង្គារ ទី២៨តុលានេះ។ តាមតួលេខបឋមក្រោយកិច្ចប្រជុំរបស់គណៈកម្មការជាតិរៀបចំការលើកលែងទោស និងបន្ធូរបន្ថយ ទោស អ្នកនាំពាក្យដដែល បានបញ្ជាក់ថា ក្នុងចំណោមអ្នកទោសចំនួន៨២០ ដែលក្រសួងមហាផ្ទៃបានបញ្ជូនមក មានតែអ្នកទោស៦១៩នាក់តែប៉ុណ្ណោះដែលត្រូវបានពិនិត្យ ហើយក្នុងនោះ អ្នកដែលត្រូវទទួលបានព្រះរាជទានលើកលែងទោសទាំងស្រុងមិនដល់ ១០ភាគរយនោះទេ។
លោកបានបន្ថែមថា ដំណើរការជ្រើសរើសបេក្ខភាពលើកលែងទោស និងបន្ធូរបន្ថយទោសនៅឆ្នាំនេះ ត្រូវឆ្លងកាត់ការវាយតម្លៃ ចំនួន៣ដំណាក់កាល គឺពីប្រធានពន្ធនាគារផ្ទាល់ បន្ទាប់មកគណៈកម្មការលើកលែងទោសខេត្ត និងចុងក្រោយគណៈកម្មការជាតិរៀបចំការលើកលែងទោស និងបន្ធូរបន្ថយទោសនៃក្រសួងយុត្តិធម៌។ វិធានការនេះ គឺជាយន្តការថ្មីរបស់ក្រសួង។ បើតាមអ្នកនាំពាក្យរបស់ក្រសួង ការបន្ធូរបន្ថយទោស និងលើកលែងទោស គឺត្រូវពិនិត្យលើប្រភេទបទល្មើសណា ដែលមិនប៉ះពាល់ដល់សន្តិសុខសង្គមធ្ងន់ធ្ងរ ស្ថានភាពជរានៃអ្នកទោស និងឥរិយាបទអ្នកទោសជាដើម។
សូមបញ្ជាក់ថា មិនមានការបញ្ជាក់ណាមួយត្រូវបានពន្យល់ពីមូលហេតុនៃការរឹតបន្តឹងការលើកលែងទោស និងបន្ធូរបន្ថយទោសឆ្នាំ២០១៤នេះទេ។ ប៉ុន្តែជាការកត់សំគាល់ ក្នុងព្រះរាជពិធីថ្វាយព្រះភ្លើងរបស់ព្រះបរមកោដ្ឋ កាលពីឆ្នាំ២០១៣ មានអ្នកទោស ៤១២នាក់ក្នុងចំណោម៤៩៦នាក់ត្រូវលើកលែងទោស ហើយកាលពីពិធីបុណ្យចូលឆ្នាំជាតិថ្មីៗនេះ មានអ្នកទោសចំនួន៧០ត្រូវបានលើកលែងទោសទាំងស្រុង។
យ៉ាងណាក៏ដោយ លោកអំ សំអាត មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្ស លីកាដូ បានលើកឡើងថា ការជ្រើសរើសទណ្ឌិតដើម្បីបន្ធូរបន្ថយទោសពីពន្ធនាគារនោះ គឺនៅតែមិនមានតម្លាភាពនៅឡើយទេ ព្រោះថាទណ្ឌិតមួយចំនួនដែលមានលក្ខខណ្ឌគ្រប់គ្រាន់សម្រាប់ជ្រើសរើស ប៉ុន្តែមិនត្រូវបានជ្រើសរើស។ ពោលគឺអ្នកដែលមានលុយតែប៉ុណ្ណោះទើបមានឈ្មោះក្នុងបញ្ជីលើកលែងទោស និងបន្ធូរបន្ថយទោសដែលរៀបចំឡើងដោយប្រធានពន្ធនាគារ។ ដូចនេះ លោក អំ សំអាតស្នើឱ្យក្រសួងយុត្តិធម៌បង្កើតគណៈកម្មការវាយតម្លៃមួយរបស់ក្រសួងដើម្បីជ្រើសដោយផ្ទាល់ ជៀសវាងការរិះគន់ដែលតែងតែកើតឡើង។
យ៉ាងណាក៏ដោយ ក្រសួងយុត្តិធម៌ដែលអះអាងថា បានរឹតបន្តឹងនីតិវិធីលើកលែង និងបន្ធូរបន្ថយទោស នៅឆ្នាំ២០១៤នេះ មិនទាន់អាចបញ្ចេញតួលេខចុងក្រោយនៃបញ្ជីអ្នកទោសដើម្បីថ្វាយព្រះមហាក្សត្រចុះព្រះហត្ថលេខាបាននៅឡើយនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ