រុស្ស៊ីចល័តទ័ពនៅតាមព្រំដែនតំបន់គ្រីម៉េ ស្របពេលដែលប្រធានាធីបតីអ៊ុយក្រែន និងអាមេរិកជួបគ្នា
កាលពីថ្ងៃព្រហ្បតិ៍ទី១៨ កញ្ញា មានទាហានរុស្ស៊ីប្រមាណជា៤ពាន់នាក់ ត្រូវបានបញ្ជូនឲ្យទៅឈរជើង នៅតាមព្រំដែនជាមួយអ៊ុយក្រែន ក្នុងតំបន់គ្រីម៉េ។ អ្នកនាំពាក្យរដ្ឋាភិបាលអ៊ុយក្រែន បានចោទរុស្ស៊ីថា មានចេទនាគំរាមកំហែងស្ថិរភាព និងបូរណភាពដែនដីអ៊ុយក្រែន។ ដោយឡែក ប្រធានាធិបតីរុស្ស៊ី លោកពូទីន បាននិយាយថាទណ្ឌកម្មដែលប្រទេសអឺរ៉ុប បានដាក់លើរុស្ស៊ី គឺវាខុសពីគោលការណ៍ច្បាប់ របស់អង្គការពាណិជ្ជកម្មពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
អ្នកនាំពាក្យក្រសួងការពារជាតិអ៊ុយក្រែន បានថ្លែងឲ្យដឹងថា រុស្ស៊ីបានបញ្ជូនកងទ័ព មិនតិចជាង៤ពាន់នាក់ទេ ឲ្យចល័តនៅតាមព្រំដែនក្នុងតំបន់គ្រីម៉េ។ ការធ្វើបែបនេះវាស្របពេលទៅនឹងជំនួបរវាងលោក បារ៉ាក់ អូបាម៉ា និងលោកប៉េត្រូ ប៉ូរ៉ូឆិនកូ នៅក្រុងវ៉ាស៊ីនតោន នៅថ្ងៃសុក្រនេះ។ អ៊ុយក្រែន មើលឃើញការពង្រាយទ័ពតាមព្រំដែននេះ ជាការបញ្ចេញចង្កូមរបស់រុស្ស៊ី គំរាមដល់សន្តិសុខរបស់អ៊ុយក្រែន។
សូមរំលឹកថា តំបន់គ្រីម៉េ ទើបតែត្រូវបានរុស្ស៊ី ប្រើប្រាស់កម្លាំងយោធា វាយដណ្តើមពីអ៊ុយក្រែន កាលពី ខែមិនា ដើមឆ្នាំនេះប៉ុណ្ណោះ។ តំបន់នេះ ជាដែនដីជ្រោយលយចូលសមុទ្រខ្មៅ នៅភាគខាងត្បូងអ៊ុយក្រែន។ តំបន់នេះ មិនមានព្រំដែនដីគោកជាមួយរុស្ស៊ីទេ ពោលគឺត្រូវកាត់ផ្តាច់ដោយសមុទ្រ។ អ៊ុយក្រែនមានការព្រួយបារម្ភថា ការវាយពង្រីកដែនដី នៅភាគខាងកើត ខិតទៅទិសខាងត្បូង ក្បែរតំបន់គ្រីម៉េរបស់ពួកឧទ្ទាម អាចនិងបង្កការងាយស្រួលដល់រុស្ស៊ីកាន់តែខ្លាំង នៅពេលណាតំបន់ទាំងនោះធ្លាក់ក្នុងដៃពួកឧទ្ទាម។ ពោលគឺរុស្ស៊ី អាចចេញចូលក្នុងតំបន់គ្រីម៉េ តាមផ្លូវគោកបានយ៉ាងងាយស្រួល។
យ៉ាងណាមិញ មេបញ្ជាការកងទ័ពរុស្ស៊ី បានទទួលស្គាល់ថា ពិតជាមានទាហានរុស្ស៊ីជាច្រើនពាន់នាក់ ឈរជើងនៅតាមព្រំដែនតំបន់គ្រីម៉េមែន តែថា ការពង្រាយទ័ពនេះ គឺវាស្ថិតក្នុងគម្រោងពង្រីកទីបញ្ជាការដ្ឋានកងទ័ពរុស្ស៊ី នៅតំបន់គ្រីម៉េ ដែលរុស្ស៊ីទើបតែមកកាន់កាប់ ហើយមួយវិញទៀត ដើម្បីត្រៀមខ្លួនទៅនឹងសមយុទ្ធយោធា ដែលអង្គការអូតង់កំពុងតែធ្វើ នៅតាមតំបន់មួយចំនួន នៅភាគខាងលិចអ៊ុយក្រែន។ ដោយឡែក យោងតាមតួលេខអង្គការអូតង់ មានទាហានរុស្ស៊ីយ៉ាងហោចណាស់ ២ពាន់នាក់ ផ្សេងទៀត ដែលកំពុងតែឈរជើង នៅតាមបណ្តោយព្រំដែនភាគខាងកើតអ៊ុយក្រែន ហើយនិងទាហានរុស្ស៊ី១ពាន់នាក់ទៀត ដែលកំពុងធ្វើប្រតិបត្តិការនៅក្នុងទឹកដីអ៊ុយក្រែន។
សហភាពអឺរ៉ុប និងសហរដ្ឋអាមេរិក បានដាក់ទណ្ឌកម្មជាបន្តបន្ទាប់លើរុស្ស៊ី ដើម្បីជំរុញឲ្យរុស្ស៊ី បញ្ឈប់រាល់ការជ្រៀតជ្រែកចូលក្នុងវិបត្តិនៅអ៊ុយក្រែន។ ប៉ុន្តែលោកប្រធានាធិបតីពូទីន បាននិយាយនៅថ្ងៃព្រហ្បតិ៍ ម្សិលមិញថា ទណ្ឌកម្មទាំងនោះ វាប្រាសចាកពីគោលការណ៍របស់អង្គការពាណិជ្ជកម្មពិភពលោក ព្រោះវាធ្វើឲ្យការប្រកួតប្រជែងមានភាពមិនស្មើគ្នា។ លោកពូទីនបានបន្ថែមថា រុស្ស៊ីគ្មានចេតនាសងសឹង នឹងដាក់ទណ្ឌកម្មបកទៅវិញទេ។ អ្វីដែលរុស្ស៊ីនឹងធ្វើ គឺខិតខំពង្រឹងការផលិតក្នុងស្រុក ឲ្យបានច្រើន និងមានគុណភាពខ្ពស់ដើម្បីឈប់រំពឹងទៅលើផលិតផលរបស់អឺរ៉ុប។
ទោះបីជាយ៉ាងណា អ្នកវិភាគទូទៅយល់ថា គោលនយោបាយរបស់លោកពូទីនពិបាកស្មានណាស់ ព្រោះថានៅចំពោះមុខគេ ធ្វើជាល្អ តែនៅពីក្រោយខ្នង បានបញ្ជូនកងទ័ពនិងអាវុធ ពង្រាយតាមព្រំដែន និងបញ្ជូនចូលទៅក្នុងដីអ៊ុយក្រែន។ បន្ទាប់ពីបានចុះហត្ថលេខាលើកិច្ចព្រមព្រៀងពិសេស ជាមួយសហភាពអឺរ៉ុប អ៊ុយក្រែនបានបោះជំហ៊ានមួយយ៉ាងធំ ដោយបានខិតទៅជិតកៀកជាមួយអឺរ៉ុប និងសហរដ្ឋអាមេរិក។ យើងរងចាំមើល ថាតើលោកពូទីន មានស្នៀតនិងកល្បិចអីទៀត ក្នុងការលេបត្របាក់យកអ៊ុយក្រែន?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ