កម្មវិធីនុយក្លេអ៊ែរ៖ អ៊ីរ៉ង់ទាមទារពន្យារពេលចរចាមួយឆ្នាំទៀត
កិច្ចចរចាលើកម្មវិធីនុយក្លេអ៊ែរអ៊ីរ៉ង់ ដែលកំពុងតែប្រព្រឹត្តិទៅ នៅទីក្រុងវីយែន ប្រទេសអូទ្រីស ហាក់ផ្តល់សញ្ញាអវិជ្ជមានគួរឲ្យព្រួយបារម្ភ ព្រោះនៅសល់តែពេលតែមួយថ្ងៃទៀតប៉ុណ្ណោះ ប៉ុន្តែភាគីទាំងអស់នៅតែនិយាយមិនត្រូវរ៉ូវគ្នា។ អ៊ីរ៉ង់ បានទាមទារ សុំឲ្យពន្យាការចរចានេះ មួយឆ្នាំតទៅទៀត ព្រោះពេលវេលាប្រថុចញ៉ុចពេក មិនអាចឲ្យភាគីទាំងអស់ មានពេលវេលា ជជែកគ្នាឲ្យបានជ្រៅជ្រះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
ក្រុមប្រទេសទាំង៦ ដែលមានបារាំង អង់គ្លេស អាមេរិក អាល្លឺម៉ង់ ចិន និងរុស្ស៊ី កំពុងជួបចរចាគ្នាជាមួយអ៊ីរ៉ង់ ស្តីពីកម្មវិធីនុយក្លេអ៊ែរអ៊ីរ៉ង់ នៅក្នុងទីក្រុងវីយែនប្រទេសអូទ្រីស។ ការចរចានេះបានប្រព្រឹត្តទៅអស់រយៈពេលពីរថ្ងៃមកហើយ។ តាមការគ្រោងទុក ភាគីទាំងអស់ ត្រូវសំរេចឲ្យបាន នូវកិច្ចព្រមព្រៀងជាផ្លូវការមួយ នៅថ្ងៃទី២៤ វិច្ឆិកា ស្អែកនេះ។
សូមបញ្ជាក់ថា ក្រុមប្រទេសមហាអំណាចទាំង៦ បានទាមទារឲ្យអ៊ីរ៉ង់ បញ្ឈប់កម្មវិធីចំរើនធាតុអ៊ុយរ៉ានីញ៉ូមរបស់ខ្លួន ព្រោះខ្លាចថា អ៊ីរ៉ង់យកវាទៅធ្វើគ្រាប់បែកបរមាណូ។ ចំណែកអ៊ីរ៉ង់វិញ បានប្រកែកហើយប្រកែកទៀត ថាកម្មវិធីនុយក្លេអ៊ែររបស់ខ្លួន មានគោលដៅប្រើប្រាស់ក្នុងការផលិតថាមពលអគ្គីសនីតែប៉ុណ្ណោះ។ តែទោះជាយ៉ាងណា ក្រុមប្រទេសមហាអំណាច នៅតែមិនទុកចិត្ត ហើយបានដាក់ទណ្ឌកម្មសេដ្ឋកិច្ច ទៅលើអ៊ីរ៉ង់ ដែលធ្វើឲ្យអ៊ីរ៉ង់នៅឯកោ ពិបាករកស៊ីជាមួយក្រុមហ៊ុនបរទេស។
ឆ្លងតាមការចរចាគ្នា អស់រយៈពេលពីរថ្ងៃកន្លងមកនេះ គេបានសង្កេតឃើញថា ភាគីអាមេរិក និងអ៊ីរ៉ង់ដែលជាដៃគូចរចាចម្បង ក្នុងបញ្ហានេះ ហាក់ត្រូវរូវគ្នា គួរជាទីសង្ឃឹម ថានឹងអាចមានច្រកចេញ។ ប៉ុន្តែ នៅមានចំនុចសំខាន់ៗពីរ ដែលភាគីទាំងពីរនៅតែមិនត្រូវគ្នា គឺទីមួយ ក្រុមប្រទេសមហាអំណាច ទាមទារឲ្យអ៊ីរ៉ង់ បញ្ឈប់កម្មវិធីនុយក្លេអ៊ែរបន្តិចម្តងៗ រហូតទាល់តែអស់តែម្តង។ ប៉ុន្តែអ៊ីរ៉ងមិនសុខចិត្ត ព្រោះថាខ្លួនត្រូវការវា ដើម្បីផលិតអគ្គីសនី។ ចំណុចទីពីរ គឺទាក់ទិនទៅនឹងការដកទណ្ឌកម្ម។ ក្រុមប្រទេសមហាអំណាចថា សន្យាថាដកទណ្ឌកម្មបន្តិចម្តងៗ ប៉ុន្តែអ៊ីរ៉ង់វិញ ទាមទារឲ្យដកចេញម្តងទាំងអស់តែម្តង។
រហូតមកដល់ថ្ងៃនេះ ភាគីទាំងអស់នៅតែបន្តការចរចា ហើយបើតាមមើលទៅ ភាគីទាំងអស់ មិនអាចទាន់ធ្វើកិច្ចព្រមព្រៀងរួមនៅថ្ងៃស្អែកនេះទេ។ នៅថ្ងៃនេះ អ៊ីរ៉ង់បានទាមទារពន្យាការចរចាថែម៦ខែ រឺមួយឆ្នាំទៀត ព្រោះមិនចង់សម្រេចដោយតក់ក្រហល់។ ក្នុងករណី ដែលការចរចានឹងត្រូវពន្យាពេល អ៊ីរ៉ង់ទាមទារ ឲ្យបន្តអនុវត្តកិច្ចព្រមព្រៀងបណ្តោះអាសន្នដែលបានចុះហត្ថលេខា នៅក្រុងហ្សឺណែវ កាលពីខែ វិច្ឆិកា ឆ្នាំទៅ។ កិច្ចព្រមព្រៀងបណ្តោះអាសន្ននេះ តម្រូវឲ្យប្រទេសមហាអំណាចដកចេញទណ្ឌកម្មពាក់កណ្តាល ហើយអ៊ីរ៉ង់វិញ នឹងផ្អាកការចម្រាញ់ជាតិអ៊ុយរ៉ានីញ៉ូម ពាក់កណ្តាលដែរ។ កិច្ចព្រមព្រៀងនេះ បានផុតសុពលភាពកាលពីខែ កក្កដា បាត់ទៅហើយ។ ពេលនេះអ៊ីរ៉ងសុំឲ្យអនុវត្តវាបន្តទៀត ទំរាំដល់ពេលដែលភាគីទាំងអស់ សម្រេចបានកិច្ចព្រមព្រៀងរួមជាផ្លូវការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ