នាយករដ្ឋមន្ត្រីអេកូសលាលែងចេញពីតំណែង ក្រោយពីខាង "No” ឈ្នះប្រជាមតិ
បន្ទាប់ពីបានឃើញជាផ្លូវការនូវលទ្ធផលប្រជាមតិ ថាបណ្តាពលរដ្ឋអេកូសភាគច្រើនជ្រើសរើសមិនផ្តាច់ខ្លួនចេញ ពីអង់គ្លេស នាយករដ្ឋមន្ត្រីអេកូស Alex Salmond អ្នកផ្តួចផ្តើមទាមទារឯករាជ្យ បានលាលែងចេញ ពីតំណែង។ ប៉ុន្តែនេះមិនមែនជាបរាជ័យសម្រាប់ក្រុមអ្នកឯករាជ្យនិយមឡើយ។ ប្រជាមតិថ្ងៃទី១៨កញ្ញា គឺជាការបើកផ្លូវឱ្យមានការតស៊ូថ្មីៗទៀត។
ចុះផ្សាយនៅថ្ងៃ៖
ស្តាប់ - ០២:៣១
សេដ្ឋកិច្ច នយោបាយ សង្គម អឺរ៉ុប សុទ្ធសឹងជាមូលហេតុសំខាន់ៗដែលជំរុញឱ្យបណ្តាពលរដ្ឋអេកូស ឆ្លើយ "ទេ” ក្នុងថ្ងៃបោះឆ្នោតប្រជាមតិ។ សេដ្ឋកិច្ច ! ក្នុងករណីបានឯករាជ្យ អេកូសត្រូវប្រឈមនឹងបំណុល នឹងវិសមភាពក្នុងវិស័យធនាគារ ប្រឈមនឹងការបាត់បង់ភាពល្បីល្បាញផ្នែកផលិតស្រាវីស្គីស្តុកឡិន។ រីឯធនធានធម្មជាតិប្រេងក្រោមដី ក៏មិនប្រាកដថាអាចចិញ្ចឹមប្រទេសរួចឬអត់។
លើផ្នែកនយោបាយ អេកូសជាអ្នកគាំទ្រអឺរ៉ុប មិនចង់ចេញពីអឺរ៉ុបដូចអង់គ្លេសរបស់លោក ដេវីត កាមឺរោនទេ។ ប៉ុន្តែប្រសិនបើអេកូសមានឯករាជ្យ ក្លាយជារដ្ឋមួយ នោះមិនដឹងថាតើថ្ងៃណារដ្ឋអេកូសចូលជាសមាជិកអឺរ៉ុបបាន។ ថ្វីបើបណ្តាជនអេកូសមានកំរិតជីវភាពរស់នៅខ្ពស់ជាងអង់គ្លេសមែន ប៉ុន្តែក្រៅពីមានប្រេង អេកូសពឹងផ្អែកលើប្រាក់ឧបត្ថម្ភពីក្រុងឡុងដ៍ ដើម្បីទ្រទ្រង់ផ្នែកសង្គម នឹងគ្មានឡើយសមត្ថភាពហិរញ្ញវត្ថុសម្រាប់វិស័យនេះទេ។
ជាចុងក្រោយ បណ្តាជនអេកូស ៥៥,៣%សុខចិត្តបន្តរស់នៅជាមួយអង់គ្លេស។ ជាមួយនឹងលទ្ធផលដាច់ច្បាស់ៗដូច្នេះ ផលវិបាកទីមួយសម្រាប់អេកូស គឺលោក Alex Salmond បានប្រកាសលាលែងចេញពីតំណែងជានាយករដ្ឋមន្ត្រីតំបន់អេកូសផង និងលាលែងចេញពីតំណែងប្រធានគណបក្សជាតិនិយមអេកូស ចាប់ពីខែវិច្ឆិកា។ “ខ្ញុំជិតបានបំពេញពេលវេលាជាអ្នកដឹកនាំហើយ ប៉ុន្តែសម្រាប់អេកូស ការឃោសនានៅតែបន្ត និងក្តីស្រមៃបានឯករាជ្យមិនរលាយស្លាប់ទេ” !
សេចក្តីសម្រេចចិត្តរបស់លោក អាឡិច សាល់ម៉ុង បានបង្កបង្កើតភាពភ្ញាក់ផ្អើល! និងគ្មាននរណាគិតស្មានសល់សោះ ដោយហេតុថាអ្វីបើខាងអ្នកទាមទារឯករាជ្យមិនបានទទួលជ័យជំនះ ប៉ុន្តែអេកូសអាចទាញបានផលប្រយោជន៍ខ្លាំង ពីការបោះឆ្នោតប្រជាមតិនេះ។ លោក អាឡិចសាល់ម៉ុង អាចមានមោទនភាព ដោយបានធ្វើឱ្យជោគវាសនាអេកូសនិងអង់គ្លេសប្តូរផ្លាស់ មានស្វ័យភាពធំជាងមុន ! នេះបើតាមពាក្យសន្យារបស់រដ្ឋាភិបាលកណ្តាលក្រុងឡុងដ៍។ តាមការពិតអ្នកដែលរងផលវិបាកធ្ងន់ធ្ងរខ្លាំងគឺខាងលោកនាយករដ្ឋមន្រ្តីអង់គ្លេសទេ ព្រោះទន្ទឹមនឹងការធ្វើខ្លួនជាអ្នកស្រោចស្រង់អង់គ្លេសមិនឱ្យមានការប្រេះឆា ដល់វេលាដែលត្រូវអនុវត្តពាក្យសន្យា ផ្តល់ស្វ័យភាពធំជាងមុនដល់អេកូស ផ្តល់ប្រាក់ឧបត្ថម្ភច្រើនជាងមុន ... តើលោក កាមឺរោន គោរពសន្យាបានប៉ុណ្ណា ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ