អគ្គលេខាធិការអង្គការអូតង់ចោទរុស្ស៊ីថា នៅតែបន្តបញ្ជូនទ័ពនិងសព្វាវុធទៅអ៊ុយក្រែន
លោកអគ្គលេខាធិការអង្គការអូតង់ បានថ្លែងចេញពីប្រទេសលីទុយអានី នៅថ្ងៃសុក្រ ម្សិលមិញថា អង្គការអូតង់មានភស្តុតាងគ្រប់គ្រាន់ដើម្បីបញ្ជាក់ថា រុស្ស៊ីនៅតែបន្តបញ្ជូនកម្លាំងទ័ព និងគ្រឿងសព្វាវុធធំៗ ចូលទៅក្នុងទឹកដីអ៊ុយក្រែន ក្នុងតំបន់ដែលកាន់កាប់ ដោយពួកឧទ្ទាមបំបែកទឹកដី។ ទង្វើរនេះ វាផ្ទុយទាំងស្រុងទៅនឹង សំដីរបស់លោកប្រធានាធិបតីពូទីន ដែលអះអាងថាចង់ឃើញសន្តិភាពនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៣៥
លោក Jens Stoltenberg អគ្គលេខាធិការអង្គការអូតង់ បានបរិហារដោយចំៗ អំពីមហិច្ឆិតារបស់រុស្ស៊ី។ នេះមិនមែនជាលើកទីមួយទេ ដែលអូតង់ បង្ហាញជាសាធារណៈ អំពី សកម្មភាពរំលោភបំពាន ទៅលើអធិបតេយ្យភាពរបស់អ៊ុយក្រែន ដោយបានបញ្ជូនទ័ព និងគ្រឿងសព្វាវុធយ៉ាងសន្ធឹកសន្ធាប់ ទៅជួយពួកឧទ្ទាម នៅភាគខាងកើតអ៊ុយក្រែន។
ដោយសុំមិនលម្អិតឲ្យអស់ ថាមានចំនួនប៉ុន្មានពិតប្រាកដ លោក អគ្គលេខាធិការអង្គការអូតង់ បានថ្លែងថា ភ្នាក់ងារអូតង់បានឃើញនូវសកម្មភាព បង្កើនការរាយកម្លាំងទ័ព នៅតាមតំបន់ដែល តាមធម្មតាត្រូវដាក់អាវុធឈប់បាញ់ ដោយយោងទៅតាមកិច្ចព្រមព្រៀងទីក្រុងមីនស្គ៍។ ក្នុងនោះ លោកបានសង្កត់ធ្ងន់ថា រុស្ស៊ីកំពុងតែបញ្ជូនបន្ថែម នូវកងទាហាន សម្ភារៈសិកធំៗ ដូចជារថក្រោះ កាំភ្លើងធំ និងកាំភ្លើងកម្ទេចយន្តហោះជាដើម។ លោកបន្ថែមទៀតថា នេះមិនមែនជារឿងលេងសើចទេ។ រុស្ស៊ីកំពុងតែ បំផ្លាញកិច្ចព្រមព្រៀងឈប់បាញ់នៅទីក្រុងមីនស្គ៍ ដែលបានចូលជាធរមាន កាលពីថ្ងៃ ៥ កញ្ញាកន្លងទៅ។
សូមបញ្ជាក់ថា នៅចំពោះមុខសាធារណៈមតិអន្តជាតិ លោកប្រធានាធិបតីរុស្សី vladimir poutine បានសម្តែងហាក់ដូចជាខំ ខ្នះខ្នែងណាស់ ក្នុងការជួយស្វែងរកសន្តិភាព នៅភាគខាងកើតអ៊ុយក្រែន។ ប៉ុន្តែធាតុពិត នរណាក៏គេដឹងដែរ ពីសារជាតិពិតរបស់មហិច្ឆិតារុស្ស៊ីក្នុងការ លេបត្របាក់ដី ភាគខាងកើតអ៊ុយក្រែន ម្តងបន្តិចៗ។
នៅថ្ងៃសុក្រ ម្សិលមិញនេះដែរ នៅអ៊ុយក្រែន មានប្រារព្ធពិធីរំលឹកខួប ដល់ការតវ៉ាប្រជាធិបតេយ្យ នៅទីលានម៉ៃដាន់។ វាជាការតវ៉ារបស់ប្រជាជនអ៊ុយក្រែន ប្រឆាំងនឹងអតីតប្រមុខរដ្ឋាភិបាលអ៊ុយក្រែន លោក អ៊ីយ៉ាណូកូវិច ដែលត្រូវគេស្គាល់ថា ជាអាយ៉ងរបស់លោកពូទីន។ ស្របពេលដែលអ៊ុយក្រែនរំលឹកខួបនេះ រុស្ស៊ីបានបាញ់គ្រាប់កាំភ្លើងធំ ជាច្រើនគ្រាប់ ចូលមកក្នុងទឹកដីអ៊ុយក្រែន ជាសញ្ញាប្រាប់ថា នរណាហ៊ានខ្លាំងជាមួយរុស្ស៊ី អ្នកនោះត្រូវត្រៀមក្តាម្ឈូសទុកទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ