នៅរុស្ស៊ី អាជ្ញាធរទើបឃាត់ខ្លួនមហាសេដ្ឋីម្នាក់ទៀតពី ”បទលាងលុយ”
ការឃាត់ខ្លួននេះ បាននាំឲ្យផ្អើលដល់មជ្ឈដ្ឋានធុរកិច្ច ដែលបកស្រាយថា អាច មកពីមូលហេតុនយោបាយ ហើយប្រៀបធៀបទៅនឹង ករណីមហាសេដ្ឋីម្នាក់ទៀត ឈ្មោះ ខូដ័រកូវស្គី ដែលក្នុងឆ្នាំ ២០០៣ ត្រូវបានឃាត់ខ្លួន តាមការចោទប្រកាន់ ជាផ្លូវការ ថា “គេចពន្ធ”។ ប៉ុន្តែ វិមានក្រេមឡាំង ប្រតិកម្មថា សំណុំរឿងទាំងចាស់ ទាំងថ្មីនេះ ឥតពាក់ព័ន្ធនឹងនយោបាយ សោះឡើយ។ លោកប្រធានាធិបតីពូទីន ត្រូវបានគេរាយការណ៍ជូនគាត់ទៅហើយ អំពីរឿងនេះ។
ចុះផ្សាយនៅថ្ងៃ៖
មហាសេដ្ឋីដែលឃាត់ខ្លួន កាលពីថ្ងៃ ១៦កញ្ញា ហើយបន្ទាប់មក ត្រូវបានតុលាការម៉ូស្គូ សម្រេចឃុំខ្លួន ក្នុងភូមិគ្រឹះគាត់ សម្រាប់រយៈពេល ២ខែសិន គឺលោក វ៉្លាឌីមៀរ យេវទូឆេនកូវ ជាអ្នកមានម្នាក់ ដ៏ល្បី នៅរុស្ស៊ី ដែលតាមទស្សនាវដ្តី អាមេរិកាំង Forbes មានទឹកប្រាក់ ៩.០០០លាន ដុល្លា រស.រ.អា ដោយ ជាប់ចំណាត់ថ្នាក់ ទី១៥ ក្នុងចំណោមអ្នកមានជាងគេ នៅរុស្ស៊ី។ ក្នុងស្ថានភាពឃុំខ្លួនគ្មានសេរីភាព គាត់ពាក់ទៅ ដោយ ខ្សែដៃអេឡិកត្រូនិក ដែលហុចលទ្ធភាពឲ្យសមត្ថភាព តាមដានឃ្លាំមើលរាល់សកម្មភាពរបស់គាត់។ គាត់គ្មានសិទ្ធិ ប្រើទូរស័ព្ទ ប្រើអ៊ិនធ័រនែតទេ។
លោកមហាសេដ្ឋី យេវទូឆេនកូវ ដែលនៅថ្ងៃ ២៥ កញ្ញា ខាងមុខ នឹងមានអាយុ ៦៦ឆ្នាំ ជា ប្រធាននៃក្រុមប្រឹក្សាភិបាល “បណ្តុំក្រុមហ៊ុនហិរញ្ញវត្ថុ-ឧស្សាហកម្ម” ក្រោមឈ្មោះថា AFK Sistema មានតម្លៃ ៤៤.៧០០ លានដុល្លារ ជាប់លេខ៦ នៅរុស្ស៊ី និងជាប់លេខ ៣០៨ ក្នុង បញ្ជីក្រុមហ៊ុនពិភពលោក Fortune Global– 500។ ក្នុងបណ្តុំក្រុមហ៊ុន AFK Sistema គាត់មាន ហ៊ុន ៦៤,២% ពីក្នុងនោះ ១៩% ជួញនៅលើទីផ្សារ ក្រុងឡុងដ្រ៏ និង ៥% ជួញ នៅលើទីផ្សារ ម៉ូស្គូ។ ដំណឹងស្តីអំពីការឃាត់ខ្លួនគាត់ បានញ៉ាំងឲ្យក្រដាសហ៊ុន AFK Sistema គ្រាន់តែ ក្នុង១ថ្ងៃ ១៧កញ្ញា ចុះថ្លៃអស់ ដល់ទៅ៣៧%។
ខ្លឹមសារនៃបទចោទប្រកាន់ទល់នឹងរូបគាត់ តាមដែល”ស្ថាប័នស៊ើបអង្កេត” ប្រកាសឲ្យដឹង គឺមកពីក្នុងឆ្នាំ២០០៨-២០០៩ ក្នុងដំណើរឯកជនឧបនីយកម្ម ក្រុមហ៊ុនប្រេង BachTEK របស់រដ្ឋ ក្នុងតម្លៃ ២.៥០០លានដុល្លារ គាត់បានបង់តែ២.០០០ លាន ប៉ុណ្ណោះ ចំណែកហ៊ុនក្នុងតម្លៃ ៥០០លានដុល្លារ គាត់ទទួលបានដោយខុសច្បាប់ ហើយបន្ទាប់មក លាងវាឲ្យមានលក្ខណៈ ស្របច្បាប់ ម៉្លោះហើយ បានជា ការចោទប្រកាន់នោះ មានឈ្មោះថា តាមបទ ”លាងលុយ”។
ប្រធាន“សហភាពនៃឧស្សាហករ និងសហគ្រិន នៅរុស្ស៊ី “ លោក អាឡេកសង់ដ្រ៏ ស្ហូឃិន ថ្លែងថា សំណុំរឿងថ្មីនេះ ប្រៀបបាននឹង សំណុំរឿង លោក ខូដ័រកូវស្គី។ គាត់ទទូច លោក ប្រធានាធិបតីពូទីន ឲ្យអន្តរាគម ជួយដោះលែង លោក យេវទូឆេនកូវ ទៅ ដ្បិត បរិយាកាស ធុរកិច្ច នៅរុស្ស៊ី កំពុងរងទៅហើយ នូវ គំនាបនៃទណ្ឌកម្ម ពីខាង បស្ចិមលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ