រុស្ស៊ីចោទលោកខាងលិចថាចង់រំលំរបបនយោបាយរុស្ស៊ី
ស្របពេលដែលសហគមន៍អឺរ៉ុប និងសហរដ្ឋអាមេរិកបានបន្តដាក់ទណ្ឌកម្មផ្ទួនៗទៅលើ រុស្ស៊ី ក្នុងរឿងដែលរុស្ស៊ី ឈ្លានពានអ៊ុយក្រែន លោកប្រមុខការទូតរុស្ស៊ី បានលយសម្តីថា ប្រទេសលោកខាងលិចទាំងអស់នេះ មានចេតនាចង់ផ្តួលរំលំរបបនយោបាយរុស្ស៊ីចោលតែម្តង។ លោកបានប្រៀបធៀបទណ្ឌកម្មសេដ្ឋកិច្ច ដែលសហគមន៍អឺរ៉ុប និងអាមេរិក បានដាក់ទៅលើរុស្ស៊ី ដែលមានគោលដៅខុសគ្នា ពីទណ្ឌកម្មដែលដាក់លើអ៊ីរ៉ង់ និងកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
ថ្លែងក្នុងឱកាសបើកវេទិការជំនាញការនយោបាយ នៅក្រុងមូស្គូ លោករដ្ឋមន្ត្រីក្រសួងការបរទេសរុស្ស៊ី Sergueï Lavrov បានធ្លោយសម្តីថា សហគមន៍អឺរ៉ុប និងសហរដ្ឋអាមេរិក មានចេតនា បង្កភាពជ្រួលច្របល់នៅរុស្ស៊ី។ លោកបន្តថា លោកខាងលិចមិនមែនមានចេតនា ចង់ឲ្យរដ្ឋាភិបាលរុស្ស៊ីផ្លាស់ប្តូរបន្ទាត់នយោបាយនោះទេ ផ្ទុយទៅវិញ លោកខាងលិច មានចេត្តនាចង់បង្កភាពចលាចល ដើម្បីផ្តួលរំលំរបបនយោបាយរុស្ស៊ីបច្ចុប្បន្នចោលតែម្តង។
លោកបានថ្លែងបែបនេះ ដោយយោងទៅលើទណ្ឌកម្មសេដ្ឋកិច្ច ដែលសហគមន៍អឺរ៉ុប និងសហរដ្ឋអាមេរិក បានដាក់ទៅលើរុស្ស៊ី។ លោកបញ្ជាក់ថា ទណ្ឌកម្មទាំងនេះ មានគោលដៅ បង្កចលាចលសង្គម ហើយបង្កឲ្យមានការបះបោរ ក្តៅក្រហាយរបស់ប្រជាជនរុស្ស៊ីទូទៅ ដោយសាតែទ្រាំលែងបាន ទៅនឹងទណ្ឌកម្មសេដ្ឋកិច្ច។ លោករដ្ឋមន្ត្រីការបរទេសរុស្ស៊ី បញ្ជាក់យ៉ាងធ្ងន់ៗថា មានថ្នាក់ដឹកនាំនៅអឺរ៉ុបខ្លះ ធ្លាប់ទាំងបាននិយាយថា ត្រូវរិះរកដាក់ទណ្ឌកម្មណាលើរុស្ស៊ី ដើម្បីបំផ្លាញសេដ្ឋកិច្ចរស្ស៊ី។ ដូច្នេះ ប្រជាជននឹងងើបឡើង បះបោរប្រឆាំងនឹងរដ្ឋាភិបាលរុស្ស៊ី ហើយផ្តួលរំលំរដ្ឋាភិបាលបច្ចុប្បន្នចោល។
លោករដ្ឋមន្រ្តីបានធ្វើការប្រៀបធៀបពីភាពខុសគ្នារវាង ទណ្ឌកម្មដែលលោកខាងលិចដាក់លើរុស្ស៊ី និងទណ្ឌកម្មដែលដាក់លើអ៊ីរ៉ង់ និងកូរ៉េខាងជើង។ លោកនិយាយថា ទណ្ឌកម្មដែលដាក់លើប្រទេសទាំងពីរ គ្រាន់តែយកតែនាមប៉ុណ្ណោះ វាមិនបានបង្កការលំបាកដល់សង្គម និងសេដ្ឋកិច្ចក្នុងប្រទេសទាំងពីរនេះទេ។ ពោលគឺវាខុសគ្នា ពីទណ្ឌកម្មដែលដាក់លើរុស្ស៊ី ដែលមានចេតនាបំផ្លាញ និងបង្កចលាចល។
សូមរំលឹកថា ក្រោយហេតុការណ៍ផ្ទួនៗនៅអ៊ុយក្រែន ដែលគ្រប់គ្នាបានដឹងថា រុស្ស៊ីបានលូកដៃចូលទៅយ៉ាងជ្រៅ ដោយបានបញ្ជូនកម្លាំងទ័ព គ្រឿងសព្វាវុធ យ៉ាងសន្ធឹកសន្ធាប់ ទៅវាយទាហានអ៊ុយក្រែន ប្រទេសលោកខាងលិច រួមមានសមាជិកសហគមន៍អឺរ៉ុប និងសហរដ្ឋអាមេរិក បានបន្តដាក់ទណ្ឌកម្មសេដ្ឋកិច្ចលើរុស្ស៊ីល្គិកណារុស្ស៊ីមិនព្រមបញ្ឈប់ការឈ្លានពានលើអ៊ុយក្រែន។ ទណ្ឌកម្មទាំងនោះមានជាអាថទិ៍ ការហាមឃាត់មិនឲ្យចូលមកទីផ្សារហិរញ្ញវត្ថុអឺរ៉ុប លើក្រុមហ៊ុនប្រេង និងក្រុមហ៊ុនឧស្ម័នរបស់រុស្ស៊ី។ ជាការឆ្លើយតប រុស្ស៊ី បានបិទទ្វារ មិនឲ្យបន្លែ ផ្លែឈើរបស់អឺរ៉ុបចូល ទៅលក់នៅក្នុងដីរុស្ស៊ី។
តែទោះជាយ៉ាងណា សម្តីរបស់ លោករដ្ឋមន្ត្រីការបរទេសរុស្ស៊ីនេះ គ្រាន់តែជាសម្តីផ្គើន ញុះញង់ឲ្យមតិមហាជន រុស្ស៊ីប្រកាន់ចិត្តខឹងនឹងអឺរ៉ុប និងសហរដ្ឋអាមេរិក តែប៉ុណ្ណោះ។ តាមធម្មតា គេដាក់ទណ្ឌកម្មសេដ្ឋកិច្ចលើប្រទេសណា គឺមានគោលដៅបង្កការលំបាកដល់សេដ្ឋកិច្ចរបស់ប្រទេសនោះ ក្នុងន័យជំរុញឲ្យរដ្ឋាភិបាលប្រទេសនោះ យល់ព្រមធ្វើអ្វីមួយ ឲ្យបានត្រឹមត្រូវនឹងមានប្រយោជន៍។ បើសិនជាប្រជាជនរុស្ស៊ីក្តៅក្រហាយ គឺមានមូលហេតុដោយផ្ទាល់តែមួយគត់ គឺដោយសាតែបន្លែ ផ្លែឈើ ត្រីសាច់ នៅរុស្ស៊ីកាន់តែឡើងថ្លៃ។ តាមការពិត រុស្ស៊ីខ្លួនឯងទេតើ ដែលបិទទ្វារមិនឲ្យអឺរ៉ុបនាំបន្លែ ផ្លែឈើចូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ