ភ្លើងឆេះព្រៃនៅឥណ្ឌូណេស៊ីកំពុងបំពុលបរិយាកាសសិង្ហបុរីសាជាថ្មី
ផ្សែងពុលបរិយាកាសបានឡើងដល់កំរិតកំពូលនៅថ្ងៃនេះ នៅក្នុងប្រទេសសិង្ហបុរី។ តាមអាជ្ញាធរសិង្ហបុរី ភ្លើងឆេះព្រៃនៅឥណ្ឌូណេស៊ី ដែលជាប្រទេសជិតខាង ជាមូលហេតុចំបងធ្វើឲ្យមានផ្សែងពុលខ្លាំង ដែលអាចបង្កគ្រោះថ្នាក់ដល់សុខភាព។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ភ្លើងឆេះព្រៃអស់ប៉ុន្មានថ្ងៃមកហើយ នៅកោះស៊ូម៉ាត្រា ក្នុងប្រទេសឥណ្ឌូណេស៊ី បានបង្កឲ្យមានពពកខ្មៅ ដែលជាផ្សែងពុល គ្របដណ្តប់ប្រទេសដ៏តូចមួយដូចជាសិង្ហបុរី។ តាមទីភ្នាក់ងារបរិស្ថានជាតិសិង្ហបុរី នៅព្រឹកថ្ងៃចន្ទនេះ កំរិតផ្សែងពុលបានឡើងដល់កំរិតមួយខ្ពស់បំផុត គឺ ១១១ មុននឹងធ្លាក់មកនៅ ត្រឹម៨០ នៅពេលថ្ងៃត្រង់។ តាមធម្មតា ខ្យល់ពុលដែលមានកំរិតចាប់ពី១០១ឡើងទៅត្រូវចាត់ទុកជាមេគ្រោះថ្នាក់បំផ្លាញសុខភាព។ អ្នកដែលមានជម្ងឺខ្សោយបេះដូង ឬអ្នកដែលមានជម្ងឺផ្លូវដង្ហើមត្រូវណែនាំឲ្យកាត់បន្ថយសកម្មភាពដើរហើរច្រើន នៅខាងក្រៅអគារ។
តាមសេចក្តីប្រកាសរបស់រដ្ឋាភិបាលសិង្ហបុរី ខ្យល់ពុលបរិយាកាសបង្កឡើងដោយផ្សែងភ្លើងឆេះព្រៃនៅប្រទេសឥណ្ឌូណេស៊ី។ ជារៀងរាល់ឆ្នាំ គឺចាប់ពីខែក្តៅទៅ ភ្លើងឆេះព្រៃនៅ ឥណ្ឌូណេស៊ី ដែលបណ្តាលមកពីវប្បធម៌ដុតរុករានដីធ្វើចំការរបស់ប្រជាជននៅកោះស៊ូម៉ាត្រា ឧស្សាហ៍បង្កឲ្យមានកំរិតផ្សែងពុលខ្ពស់បំផុត នៅប្រទេសជិតខាង។ កាលពីឆ្នាំមុន សិង្ហបុរីបានជួបកំរិតផ្សែងពុលបរិយាកាសខ្លាំងបំផុតមិនធ្លាប់មាននៅក្នុងរយៈពេល១៥ឆ្នាំចុងក្រោយនេះ។
នៅ ចន្លោះឆ្នាំ ១៩៩៧ និងឆ្នាំ ១៩៩៨ ភ្លើងឆេះព្រៃ ជាច្រើនដែលគេមិនអាចគ្រប់គ្រងពន្លត់បានបង្កឲ្យមានផ្សែងពុល ផ្ទៃមេឃអួរអាប់អស់រយៈពេលជាច្រើនខែ នៅបណ្តាប្រទេសអាស៊ីអាគ្នេយ៍។ ផ្សែងពុលនៅឆ្នាំនោះបានប៉ះពាល់យ៉ាងធ្ងន់ធ្ងរដល់សុខភាពផ្លូវដង្ហើមរបស់ប្រជាជន និងបានរាំងស្ទះដល់ដំណើរអាកាសចរណ៍។ គេប៉ាន់ប្រមាណថា ផ្សែងពុលបរិយាកាសបានធ្វើឲ្យសេដ្ឋកិច្ចរបស់ប្រទេសជាច្រើននៅអាស៊ាន ខាតបង់ទឹកប្រាក់សរុបជាង៩ពាន់លានដុល្លារ។
អ្នកជំនាញសិង្ហបុរីវាយតម្លៃថា បាតុភូត អែល នីណូ ឆ្នាំនេះ នឹងបង្កឲ្យមានភាពរាំងស្ងួតខ្លាំង ខុសពីធម្មតា ដែលនឹងផ្តល់អំណោយផលច្រើនសម្រាប់ភ្លើងឆេះព្រៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ