ភ្នំភ្លើងអុនតាកិ នៅជប៉ុនកម្រើកឡើងវិញដោយស្ងាត់ៗ សម្លាប់មនុស្សជាង៣០នាក់
កាលពីថ្ងៃសៅរ៍ម្សិលមិញ នៅប្រទេសជប៉ុនមានហេតុការផ្ទុះភ្នំភ្លើងមួយ ឈ្មោះ អុនតាកិ ដែលនៅចម្ងាយប្រមាណជា ២០០គីឡូមែត្រ ពីទីក្រុងតូក្យូ។ ភ្នំភ្លើងនេះបានកម្រើកឡើងវិញ ដោយគ្មានបានឲ្យសញ្ញាជាមុន ហើយបានសម្លាប់មនុស្សជាង៣០នាក់ ដែលកំពុងតែឡើងទៅកំសាន្តនៅលើភ្នំនោះ។ ថ្វីត្បិតតែពេលនេះ ភ្នំភ្លើងហាក់បានស្ងប់ស្ងាត់ទៅវិញ ប៉ុន្តែអ្នកជំនាញ មានការព្រួយបារម្ភថា វាអាចនឹងផ្ទុះឡើងជាថ្មី ក្នុងពេលឆាប់ៗនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ភ្នំភ្លើង អុនតាកិ ដែលនៅក្បែរក្រុងតូក្យូ ហើយមិនឆ្ងាយប៉ុន្មានពីភ្នំហ៊្វូជី បានកម្រើកឡើងវិញ យ៉ាងស្ងាត់ៗ គ្មានឲ្យសញ្ញាជាមុន នៅថ្ងៃសៅរ៍ ទី២៧ កញ្ញា។ ក្នុងកំឡុងពេលនេះ ដែលជារដូវស្លឹកឈើជ្រុះនៅជប៉ុន មានមនុស្សម្នាជាច្រើននាក់ បាននាំគ្នាទៅឡើងលើភ្នំនេះ។ ក្នុងពេលដែលភ្នំភ្លើងនេះផ្ទុះ មានមនុស្សយ៉ាងហោចណាស់៣០០នាក់ ដែលកំពុងតែធ្វើដំណើរឡើងទៅលើភ្នំ។ យោងតាមការរាយការណ៍ របស់អជ្ញាធរជប៉ុន មានមនុស្សស្លាប់ចំនួនជាង៣០នាក់ហើយ ហើយនិងមានអ្នករងរបួសជាច្រើននាក់ផ្សេងទៀត ដែលត្រូវបានដឹកទៅសង្គ្រោះបន្ទាន់ នៅមន្ទីរពេទ្យ។
ស្ត្រីម្នាក់ដែលបានរួចជីវិត ក្នុងហេតុការណ៍នេះ បានថ្លែងថា គាត់បានឮសំឡេងដូចជារន្ទះបាញ់ ហើយបន្ទាប់មកមានបំណែកថ្មជាច្រើន បានផ្ទុះចេញពីកំពូលភ្នំ ហើយនិងមានផ្សែងខ្មៅក្រាស់ លាយជាមួយផេះ។ មានមនុស្សប្រហែលជា៥០នាក់ មានជាប់គាំងនៅលើភ្នំ អស់មួយយប់ ដោយសាតែផ្សែងផេះខ្មៅ ធ្វើឲ្យមើលផ្លូវមិនឃើញ។ ក្រុមសង្រ្គោះមានគ្នាចំនួន៥៥០នាក់ កំពុងតែជួយរំដោះមនុស្សចុះពីលើភ្នំ ហើយនឹងដឹកអ្នកដែលរងរបួលទៅមន្ទីរពេទ្យ។ មនុស្សដែលស្លាប់ ភាគច្រើនដោយសាតែថប់ដង្ហើម ព្រោះផ្សែងផេះក្រាស់ខ្មឹក ហើយនិងរបួសដោយសា ត្រូវបំណែកថ្មដែលផ្ទុះត្រូវ។
សូមបញ្ជាក់ថា ប្រទេសជប៉ុនជាប្រជុំកោះ ដែលស្ថិតនៅលើខ្សែក្រវ៉ាត់ភ្នំភ្លើង។ ស្រទាប់ម៉ាក់ម៉ា ដែលនៅខាងក្រោមដីប្រទេសជប៉ុន មានចម្ងាយជិតបំផុត។ ដូចនេះហើយ បានជានៅក្នុងតំបន់នេះ សម្បូរគ្រោះរញ្ជួយដី ទាំងនៅលើគោក និងនៅបាតសមុទ្រ ព្រោះស្រទាប់ដីដែលស្តើង តែងតែកម្រើក ដោយសាស្រទាប់ម៉ាក់ម៉ា ដែលពុះកញ្រ្ជោល។
អ្នកជំនាញធរណីវិទ្យាបានប៉ាន់ស្មានថា ការរញ្ជួយដីនៅបាតសមុទ្រកាលពីឆ្នាំ២០១១ អាចជាមូលហេតុ ដែលធ្វើឲ្យភ្នំភ្លើង អុនតាកិកម្រើកឡើងវិញ ព្រោះវាបានធ្វើឲ្យស្រទាប់ដីបែកប្រេះ កាន់តែខ្លាំង នាំឲ្យកម្លាំងម៉ាក់ម៉ា ផ្ទុះចេញមកក្រៅបាន។ ទោះបីជាយ៉ាងណា រហូតមកទល់ពេលនេះ គេនៅមិនទាន់បានឃើញកំអែលភ្នំភ្លើង ជារងើកភ្លើងក្រហមឆ្អៅ ហូរចេញមកទេ។ ប៉ុន្តែអ្នកជំនាញ មានការព្រួយបារម្ភថា ក្នុងពេលឆាប់ៗនេះ នឹងមានការផ្ទុះជាថ្មី ហើយដែលមានកំអែលភ្លើងផ្ទុះហូរចេញ។ ក្នុងករណីនេះ ប្រជាជននៅតំបន់នោះ ត្រូវតែជម្លាសចេញជាបន្ទាន់។ មួយវិញទៀត ភ្នំហ៊្វូជី ដែលនៅមិនឆ្ងាយប៉ុន្មានពីទីនោះដែរ អាចនឹងកម្រើកឡើងវិញដូចគ្នាដែរ។ សូមរំលឹកថា កាលពីឆ្នាំ១៩៧៩ ភ្នំភ្លើង អុនតាកិ បានផ្ទុះម្តង ដែលកាលនោះ បានបន្សល់ទុកផេះ ជាង២០ម៉ឺនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ