បុគ្គលិកភោជនីយដ្ឋានកំពុងទាមទារដំឡើងប្រាក់ម៉ោងអប្បបរមានៅសហរដ្ឋអាមេរិច
ចុះផ្សាយនៅថ្ងៃ៖
ស្តាប់ - ០៤:៣១
ចាប់តាំងពីដើមខែកញ្ញាមក បុគ្គលិកបំរើការងារនៅតាមបណ្តាភោជនីយដ្ឋានម្ហូបលឿនឬហៅថា fast-food ក្រោមស្លាកយីហោដូចជា McDonald's, Burger King, Wendy's ជាដើមបានធ្វើបាតុកម្មកក្រើកសហរដ្ឋអាមេរិច។ បុគ្គលិកទាំងនោះកំពុងទាមទារដំឡើងប្រាក់ឈ្នួលអប្បបរមាអោយបាន ១៥ ដុល្លារក្នុងមួយម៉ោង និងសិទ្ធិមួយចំនួន ដោយសារលក្ខខ័ណ្ឌការងារបច្ចុប្បន្នរបស់ពួកគេពុំសមស្របនឹងប្រាក់ចំណូលប្រចាំខែ។ ប្រាក់ឈ្នួលទាប ម៉ោងការងារតិច និងអវត្តមានសហជីពនៅកន្លែងធ្វើការសុទ្ធសឹងជាសំរែកទាមទាររបស់បាតុករទាំងនោះ។ នៅសហរដ្ឋអាមេរិច ភាគច្រើននៃបុគ្គលិកបំរើការងារនៅតាមបណ្តាភោជនីយដ្ឋានទាំងនោះកំពុងរស់នៅក្រោមបន្ទាត់នៃភាពក្រីក្រ ដែលក្នុងនោះមួយចំនួនត្រូវបង្ខំចិត្តធ្វើការពីរ ឬបីកន្លែង។
ការធ្វើអត្តឃាតរបស់នាង Maria Fernandes កាលពីចុងខែសីហាកន្លងទៅនេះបានធ្វើអោយមតិសារធារណជនអាមេរិចចាប់ផ្តើមយល់ពីលក្ខខ័ណ្ឌការងារនៅតាមបណ្តាភោជនីយដ្ឋានលក់ម្ហូបលឿន ឬគេតែងហៅថា Fast food។ មានអាយុ ៣២ ឆ្នាំ នាង Maria Fernandes បំរើការងារអោយហាង Dunkins Donuts ចំនួនពីរ និងភោជនីយដ្ឋានចំនួនពីរកន្លែងផេ្សងទៀត នៅរដ្ឋ New Jersey។ ដោយសារតែពុំអាចរកបានការងារពេញម៉ោង នាងត្រូវបង្ខំចិត្តទទួលយកម៉ោងបន្តិចបន្តួច ហើយធ្វើការបួនកន្លែងខុសគ្នា។ ភាពអស់សង្ឃឹមក្នុងជីវិត និងភាពនឿយហត់ក្នុងការងារជាមូលហេតុចម្បងបណ្តាលអោយនាងសំរេចចិត្តផ្តាច់ជីវិតខ្លួនបែបនេះ។
រឿងរ៉ាវនេះជាចំនុចតូចមួយបង្ហាញពីភាពមិនប្រក្រតីក្នុងសង្គមសហរដ្ឋអាមេរិច ដែលញាំញីដោយវិបត្តិសេដ្ឋកិច្ច និងអត្រាអ្នកអត់ការងារធ្វើកើនឡើង ក្នុងរយៈពេលប៉ុន្មានឆ្នាំចុងក្រោយនេះ។ បើតាមការិយាល័យស្ថិតិការងារសហព័ន្ធអាមេរិច តួលេខអ្នកធ្វើការងារពាក់កណ្តាលម៉ោង និងធ្វើការច្រើនកន្លែងមានរហូតទៅដល់ ៧,៥ លាននាក់ឯណោះ។ ដូចនេះហើយទើបមានចលនាបាតុកម្មចាប់តាំងពីដើមខែកញ្ញានេះ ដើម្បីទាមទារអោយមានការដំឡើងប្រាក់ម៉ោងអប្បបរមា និងលក្ខខ័ណ្ឌការងារប្រសើរជាងមុន។
បុគ្គលិកបំរើការងារអោយភោជនីយដ្ឋានធំៗដូចជា McDonald's, Burger King, Wendy's ជាដើមនោះកំពុងដឹកនាំការទាមទារដំឡើងប្រាក់ម៉ោងអប្បបរមា និងសិទ្ធិបង្កើតសហជីពនៅតាមកន្លែងធ្វើការរបស់ខ្លួន។
បាតុកររាប់ពាន់នាក់បានដើរតាមទីសាធារណ និងអង្គុយមួយកន្លែង នៅតាមដងផ្លូវដើម្បីអោយមនុស្សម្នាចាប់អារម្មណ៍ចំពោះការទាមទាររបស់ពួកគេ។ ក្រោមពាក្យស្លោកថា «ទាមទារសុំ ១៥ ដុល្លារក្នុងមួយម៉ោង» (Fight for 15 $ US) បាតុកម្មនេះត្រូវបានរៀបចំធ្វើនៅតាមបណ្តាទីក្រុងចំនួន ១៥០ កន្លែងទូទាំងសហរដ្ឋអាមេរិច។ យុទ្ធនាការថ្នាក់ជាតិនេះបានទទួលការគាំទ្រពីសហព័ន្ធអន្តរជាតិសំរាប់នយោជិកផែ្នកសេវាកម្ម (Service Employees International Union)។
បច្ចុប្បន្ននេះ បុគ្គលិកម្នាក់បំរើការងារនៅតាមភោជនីយដ្ឋានម្ហូបលឿន fast-food អាចទទួលបានប្រាក់ឈ្នួល ៧,២៥ ដុល្លារក្នុងមួយម៉ោង។ ប្រសិនបើគេធ្វើការ ៤០ ម៉ោងក្នុងមួយសប្តាហ៍ គេអាចរកចំណូលបានប្រមាណ ១៥ ០០០ ដុល្លារក្នុងមួយឆ្នាំ។ បើតាមពិតទៅ ប្រាក់ចំណូលនេះពុំច្រើនទេ ព្រោះវាស្ថិតនៅក្រោមបន្ទាត់ភាពក្រីក្រទៅទៀត។ នៅសហរដ្ឋអាមេរិច បន្ទាត់ភាពក្រីក្រត្រូវបានគេកំណត់ត្រឹមប្រាក់ចំណូល១៦ ០០០ ដុល្លារក្នុងមួយឆ្នាំ សំរាប់មនុស្សម្នាក់។
ក្រៅពីប្រឈមមុខនឹងប្រាក់ឈ្នួលទាប បុគ្គលិកនៅតាមបណ្តាភោជីយដ្ឋានទាំងនោះគ្មានសិទ្ធិបង្កើតសហជីពនៅកន្លែងធ្វើការរបស់ខ្លួនឡើយ។ លើសពីនេះ ពួកគេពុំទទួលបានការងារពេញម៉ោង ព្រមទាំងត្រូវប្រឈមមុខនឹងម៉ោងការងារចេញចូលមិនទៀងទាត់ ពិតប្រាកដ។ នយោជក ដែលជាម្ចាស់ហាងធំៗទាំងនោះចូលចិត្តធ្វើបែបនេះ ព្រោះពួកគេចៀសវាងការចំណាយច្រើនលើបុគ្គលិក ជាពិសេសពួកគេពុំចាំបាច់ចំណាយប្រាក់លើម៉ោងបន្ថែម។
យុទ្ធនាការ«ទាមទារសុំ ១៥ ដុល្លារក្នុងមួយម៉ោង» នេះបានទាក់ទាញចំណាប់អារម្មណ៍ពលរដ្ឋអាមេរិចយ៉ាងខ្លាំងក្រៃលែង ខណៈពេលដែលគម្លាតប្រាក់ចំណូលរបស់ប្រជាពលរដ្ឋកំពុងក្លាយជាប្រធានបទដ៏ក្តៅគគុក។ លោកប្រធានាធិបតី បារាក់ អូបាម៉ា ធ្លាប់បានអះអាងថា ការដំឡើងប្រាក់ខែដល់បណ្តាជនដែលមានចំណូលទាបអាចជួយពង្រឹងជីវភាពថ្នាក់កណ្តាល។ សូមបញ្ជាក់ដែរថា អស់រយៈពេលជាច្រើនខែមកហើយ ដែលរដ្ឋបាលរបស់លោកប្រធានាធិបតី អូបាម៉ា បានធ្វើសំណើច្បាប់ទៅសភា ដើម្បីសុំដំឡើងប្រាក់អប្បបរមាពី ៧,២៥ ទៅដល់ ១០ ដុល្លារក្នុងមួយម៉ោងសំរាប់ទូទាំងអាមេរិចទាំងមូលតែម្តង។ ប៉ុន្តែ ការប៉ុនប៉ងនេះកំពុងជួបឧបសគ្គ ព្រោះសមាជិកសភាមកពីគណបក្សសាធារណរដ្ឋជំទាស់ដាច់ខាត។ ខាងគណបក្សសាធារណរដ្ឋយល់ឃើញថា ការដំឡើងប្រាក់ម៉ោងនេះនឹងធ្វើអោយបណ្តាពួកថៅកែភោជនីយដ្ឋានមិនសប្បាយចិត្ត និងពុំព្រមបង្កើតការងារបន្ថែមទៀត។ គួររំលឹកផងដែរថា ការដំឡើងប្រាក់ម៉ោងអប្បបរមាចុងក្រោយ នៅសហរដ្ឋអាមេរិចបានធ្វើឡើងកាលពីឆ្នាំ ២០០៩ មុនពេលវិបត្តិសេដ្ឋកិច្ចពិភពលោកផ្ទុះឡើង។
គេពិបាកជឿថា សមាជិកសភាមកពីគណបក្សសាធារណរដ្ឋគាំទ្រសំណើនេះណាស់ ហើយគេក៏ពុំដឹងដែរថា ពេលណាសំណើច្បាប់នេះអាចឆ្លងរួចផុតពីសភា។ ប៉ុន្តែ នៅតាមបណ្តារដ្ឋ និងក្រុងមួយចំនួនដែលដឹកនាំដោយគណបក្សប្រជាធិបតេយ្យរបស់លោក អូបាម៉ា ប្រាក់ឈ្នួលអប្បបរមាគ្រោងនឹងត្រូវដំឡើងជាបណ្តើរៗរួចទៅហើយ តួយ៉ាងមានដូចជានៅទីក្រុង Seattle, San Francisco និង Washington ជាដើម។
បើតាមយោបល់អ្នកជំនាញរបស់មូលនិធិរូបិយវត្ថុអន្តរជាតិ (FMI) ការដំឡើងប្រាក់ម៉ោងអប្បបរមា នៅសហរដ្ឋអាមេរិចនឹងពុំបង្កបញ្ហាប៉ះពាល់ដល់ការបង្កើតការងារបន្ថែមឡើយ។ ផ្ទុយទៅវិញ វាប្រហែលជាអាចជួយទប់ស្កាត់សន្ទុះ ភាពក្រីក្រនៅសហរដ្ឋអាមេរិច ដែលចេះតែកើនឡើង និងគួរអោយបារម្ភយ៉ាងខ្លាំងក្រៃលែង។ បច្ចុប្បន្ននេះ ភាពក្រីក្រប៉ះពាល់ដល់ពលរដ្ឋ អាមេរិចប្រមាណ ៥០ លាននាក់ ដែលស្មើនឹងមនុស្សម្នាក់ក្នុងចំណោមមនុស្ស ៦ នាក់។ ដូចនេះ ការដំឡើងថ្លៃប្រាក់ម៉ោងធ្វើការអាចជួយពលរដ្ឋក្រីក្រអាមេរិចអោយមានជីវភាពប្រសើរឡើង ហើយពេលនោះអំណាចនៃការទិញក៏នឹងអាចកើនឡើងផងដែរ ហើយអាចធ្វើអោយសេដ្ឋកិច្ចអាមេរិចអាចងើបឡើងពីវិបត្តិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ