នាយករដ្ឋមន្ត្រីថៃថា ទេសចរជាតិអង់គ្លេស២នាក់ត្រូវគេសម្លាប់មកពី ស្លៀកប៊ីគីនីដើររហេតរហូតពេក
បន្ទាប់ពីសាកសពជនជាតិអង់គ្លេស២នាក់ ត្រូវបានគេរកឃើញ នៅថ្ងៃចន្ទ ទី១៤ កញ្ញា វេលា ទៀបភ្លឺ នៅកោះតៅ ភាគខាងត្បូងប្រទេសថៃ លោកប្រាយុទ្ធ ចន្ទអូចា បានថ្លែងបន្ទោសជនរងគ្រោះថា មកពីស្លៀកឈុតមុជទឹកប៊ីគីនី ដើររហេតរហូតពេក ទើបធ្វើឲ្យឃាតករអត់ទ្រាំមិនបាន ទើបចាប់រំលោភ រួចសម្លាប់ចោល។ សម្តីនេះ បានធ្វើឲ្យស្ថានទូតចក្រភពអង់គ្លេស ចេញមកប្រតិកម្ម ទៀមទារការបកស្រាយ ទន្ទឹមនឹងពេលដែលការស៊ើបអង្កេតរបស់អជ្ញាធរថៃ ក្នុងការស្វែងរកឃាតករ មិនបានទទួលលទ្ធផលអ្វីទាំងអស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
អ្នកទេសចរជនជាតិអង់គ្លេសពីរនាក់ ម្នាក់ជាភេទប្រុសអាយុ២៤ឆ្នាំ និងម្នាក់ទៀត ភេទស្រីអាយុ២៣ឆ្នាំ ត្រូវបានគេប្រទះឃើញស្លាប់នៅវេលាទៀបភ្លឺ ថ្ងៃចន្ទទី១៤ កញ្ញា នៅតាមឆ្នេរខ្សាច់ លើកោះតៅ ភាគខាងត្បូងប្រទេសថៃ។ ស្ថិតក្នុងរាងកាយអាក្រាដននលគក ជនរងគ្រោះ ទំនងជាត្រូវបានឃាតកររំលោភសេពសន្ទវៈ មុននឹងសម្លាប់ចោល។
ក្រោយហេតុការណ៍នេះ មានការឃាត់ខ្លួនមនុស្ស ១២នាក់ ដែលភាគច្រើនសុទ្ធសឹងតែជាកម្មករជនជាតិភូមា និងអ្នកទេសចរបរទេសដែលជាមិត្តភ័ក្ត្រជនរងគ្រោះ។ ប៉ុន្តែក្រោយការពិនិត្យ ADN នៅក្នុងទឹកកាម ដែលគេរកឃើញនៅកន្លែងកើតហេតុ ជនសង្ស័យទាំង១២ ត្រូវបានគេដោះលែងទៅវិញ ព្រោះថាគ្មានជាប់ពាក់ព័ន្ធនឹងឃាតកម្មនេះ។
ស្របពេលដែលការស្រាវជ្រាវរកជនដៃដល់ មិនបានផ្តល់លទ្ធផលជាដុំកំភួន នាយករដ្ឋមន្ត្រី ថៃ លោក ប្រាយុទ្ធ ចន្ទអូចា បានធ្វើសេចក្តីថ្លែងការណ៍មួយ ដោយបានរិះគន់អ្នកទេសចរជាជនរងគ្រោះថា ដោយសាតែស្លៀកឈុតប៊ីគីនី ដើរកណ្តាលយប់ ទើបធ្វើឲ្យពួកជនទុច្ចរិកអត់ទ្រាំមិនបាន។ លោកបាននិយាយទៀតថា ពួកទេសចរបរទេស គិតថា ថៃជាប្រទេសដ៏ស្រស់បំព្រង ជាស្ថានសួគ៌ ម្លោះហើយពួកនេះ ធ្វើអ្វីតាមតែចិត្ត ស្លៀកពាក់លេចលើលេចក្រោម ដើររហេតរហូត ផឹកស៊ីកណ្តាលអាធ្រាត្រ មិនបានប្រយ័ត្នប្រយែងពីសុវត្ថិភាពផ្ទាល់ខ្លួន។ លោកបន្ថែមថា ស្រីៗស្លៀកប៊ីគីនី ដើររហេតរហូតបែបនេះ ប្រឈមមុខនឹងគ្រោះថ្នាក់ណាស់ លើកលែងតែជាស្រ្តី ដែលមានរូបរាង្គមិនស្អាត។ សម្តីរិះគន់ដែលខ្វះការទទួលខុសត្រូវ ក្នុងនាមខ្លួនជាថ្នាក់ដឹកនាំបែបនេះ បានធ្វើឲ្យស្ថានទូតចក្រភពអង់គ្លេសមិនពេញចិត្ត ហើយបានសរសេរលិខិតទៅក្រសួងការបរទេសថៃ ដើម្បីទទួលបានការពន្យល់។
សូមបញ្ជាក់ថា វិស័យទេសចរណ៍នៅប្រទេសថៃ ជាវិស័យចម្បង ដែលនាំប្រាក់ចំណូលឲ្យប្រជាពលរដ្ឋ។ កាលពីឆ្នាំ២០១៣ ទេសចរបរទេសសរុប ប្រមាណជាជាង២៦លាននាក់ បានមកកម្សាន្តនៅប្រទេសថៃ។ ករណីឃាតកម្មថ្មីនេះ នឹងធ្វើឲ្យ វិស័យទេសចរណ៍ ដែលបានធ្លាក់ចុះមួយកំរិតធំទៅហើយ ដោយសាតែវិបត្តិនយោបាយ កូដកម្មហិង្សារ៉ាំរ៉ៃអស់រយៈពេលជិតមួយឆ្នាំកន្លងមកនេះ នឹងបន្តចុះអន់ថយកាន់តែខ្លាំងឡើងថែមទៀត។ លោកប្រាយុទ្ធ ចន្ទអូចា បាននិយាយថានឹងស្តារកិត្តនាមប្រទេសថៃ ជាដែនដីនៃស្នាមញញឹម ឲ្យបានល្អឡើងវិញ ព្រោះថាកន្លងមក មានរឿងអាស្រូវជាច្រើន ទាក់ទងទៅនឹងឃាតកម្មលើជនបរទេស និងការបោកប្រាស់ កេញប្រវញ្ចលើពួកទេសចរជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ