តួកគីប្រែចិត្តចូលប្រយុទ្ធប្រឆាំងនឹងអង្គការរដ្ឋអ៊ីស្លាម ជាមួយសម្ព័ន្ធមិត្ត ដោយស្ថានការណ៍តម្រូវ
ចុះផ្សាយនៅថ្ងៃ៖
ស្តាប់ - ០៤:១១
តួកគី បានបញ្ជាក់ព័ត៌មាននៅថ្ងៃចន្ទទី ២៩ កញ្ញា ថាពិតជាមានចេតនាចង់ចូលសហការជាមួយសម្ព័ន្ធអន្តរជាតិដឹកនាំដោយសហរដ្ឋអាមេរិកដើម្បីប្រយុទ្ធប្រឆាំងនឹងអង្គការរដ្ឋអ៊ីស្លាម។ សភាតួកគីនឹងត្រូវបោះឆ្នោតអនុម័តសំណើនេះនៅថ្ងៃព្រហស្បតិ៍ទី ២ តុលា។ តួកគីដែលធ្លាប់តែព្រងើយកន្តើយនឹងការគំរាមកំហែងជីហាតរដ្ឋអ៊ីស្លាមបាន មិនអើពើព្រមចូលរួមដៃជាមួយសម្ព័ន្ធមិត្ត ស្រាប់តែសម្រេចប្តូរជំហរវិញនៅសប្តាហ៍នេះ គួរឱ្យភ្ញាក់ផ្អើល។ តើអាជ្ញាធរតួកគីចង់ភ្ជាប់ខ្លួនជាមួយសម្ព័ន្ធអន្តរជាតិដោយចេតនានិងសកម្មភាពពិត ឬគ្រាន់តែជាចូលរួមសម្បកក្រៅបង្គប់កិច្ច ?!
គឺនៅពេលត្រលប់មកមហាសន្និបាតអង្គការសហប្រជាជាតិ ថ្ងៃសៅរ៍ទី ២៧កញ្ញា ដែលប្រធានាធិបតីតួកគី លោក Recep Tayyip Erdogan បានប្រកាសជាផ្លូវការប្តូរជំហរ ព្រមចូលរួមប្រយុទ្ធប្រឆាំងជាមួយនឹងសម្ព័ន្ធមិត្ត។ ជាប់ចោទតាំងពីយូរថាបានបិទភ្នែកបណ្តោយឱ្យពួកចលនាជីហាតរដ្ឋអ៊ីស្លាមបញ្ចេញសកម្មភាពតាមចិត្ត ប្រធានាធិបតីតួកគីទើបបានទទួលស្គាល់អំពីភាពចាំបាច់របស់តួកគីក្នុងសម្ព័ន្ធអន្តរជាតិប្រឆាំងនឹងចលនារដ្ឋអ៊ីស្លាម។ ជាផ្លូវការ សេរីភាពរបស់ចំណាប់ខ្មាំងតួកគី៤៦នាក់ ដែលចលនាជីហាតនៅស៊ីរីចាប់ខ្លួន និងទើបដោះលែងមកវិញ ជាបុព្វហេតុជំរុញឱ្យរដ្ឋាភិបាលតួកគីអាចសម្រេចចិត្តចូលលូកដៃក្នុងជម្លោះដោយផ្ទាល់បាន ដោយគ្មានក្រែងខាតបង់ជីវិតពលរដ្ឋ។ ប៉ុន្តែតាមការពិតទៅនោះ សម្ពាធរបស់អាមេរិកមានកាន់តែធ្ងន់ អង់ការ៉ា ដឹងច្បាស់ថាមិនអាចដាក់ខ្លួនឱ្យនៅឯកាពីក្រុមសម្ព័ន្ធមិត្តបានទៀតឡើយ ចង់ឬមិនចង់តួកគី ត្រូវតែប្តូរជំហរ (តួកគីមិនអាចការពារជំហរចាស់បានទៀតទេ)។
ជំហរមិនជាក់លាក់ ! ពេលចង់ឬមានប្រយោជន៍ក៏គាំទ្រ ហើយពេលមិនត្រូវ មិនគាំទ្របាននោះទេ ! តួកគីជាប្រទេសអ៊ីស្លាម តែមួយគត់ ក្នុងសម្ព័ន្ធអាត្លង់ទិកអូតង់ និងជាសមាជិកតែមួយគត់ដែលមិនព្រមចូលសហការក្នុងសម្ព័ន្ធអន្តរជាតិប្រឆាំងនឹងអង្គការរដ្ឋអ៊ីស្លាម។ បើព្រមចូលនិងធ្វើជាសមាជិកអូតង់ហើយ មានន័យថាព្រមទទួលយកគោលការណ៍អង្គការ ព្រមទទួលខុសត្រូវឱ្យស៊ីចង្វាក់គ្នា ព្រមឱ្យអាមេរិកដាក់មូលដ្ឋានទ័ព និងត្រូវមានសាមគ្គីភាព។ តួកគីមិនអាចដើរទិសផ្សេងពីអូតង់ នៅពេលចង់ស្រួលខ្លួន ហើយពេលមានភ័យ (ពេលស៊ីរី ឬសត្រូវវាយប្រហារ) ស្រែកប្រកូកសុំសាមគ្គីភាពពីអង្គការបានឡើយ។
យ៉ាងណាមិញ នៅពេលនេះ ក្នុងពេលដែលកងកម្លាំងសម្ព័ន្ធអន្តរជាតិ អាមេរិក បារាំងអង់គ្លេស បើកប្រតិបត្តិការផ្លូវអាកាសកម្ទេចទីតាំងសំខាន់ៗរបស់ចលនារដ្ឋអ៊ីស្លាម នៅអ៊ីរ៉ាក់ នៅខាងស៊ីរីវិញ អង្គការរដ្ឋអ៊ីស្លាម បន្តវាតទីទឹកដីនៅភាគខាងជើង និងរុលកាន់តែមកជិតដល់ព្រំដែនរវាងស៊ីរីនិងតួកគីហើយ។ អង្គការរដ្ឋអ៊ីស្លាមចំណេញដី នោះជនភៀសខ្លួនមានកាន់តែច្រើន ហើយអ្នកដែលត្រូវទទួលរងផលវិបាកនេះមុនគឺតួកគីតែម្តង។ តាំងពីថ្ងៃចន្ទទី ២៩កញ្ញា២០១៤មក ទាហានតួកគីបានពង្រឹងសន្តិសុខតាមព្រំដែន (ព្រំដែនរួមជាមួយស៊ីរី ១២៥០គ.ម.)។ ការគំរាមកំហែងមានកាន់តែខ្លាំង ! ចំណាប់ថ្នូរក្នុងដៃសត្រូវក៏លែងមាន ! តួកគីគ្មានជម្រើសអ្វីប្រសើរជាងប្រកាសទទួលស្គាល់ អំពីភាពចាំបាច់ក្នុងការប្រយុទ្ធប្រឆាំងនឹងអង្គការរដ្ឋអ៊ីស្លាមជាមួយសម្ព័ន្ធអន្តរជាតិទេ។
ប៉ុន្តែក្រៅអំពីបានបង្ហើបបេះដូង និងរៀបចំឱ្យសភាអនុម័តយល់ព្រមឱ្យរដ្ឋាភិបាលតួកគីចូលសហការជាមួយសម្ព័ន្ធអន្តរជាតិ គេបានដឹងតិចតួចបំផុតអំពីចេតនាពិតប្រាកដរបស់តួកគី និងអំពី ទំហំនៃសកម្មភាពដែលតួកគីគ្រោងធ្វើដើម្បីប្រយុទ្ធប្រឆាំងនឹងអង្គការរដ្ឋអ៊ីស្លាម។ ជាមួយនឹងការភ្ជាប់ខ្លួននឹងសម្ព័ន្ធអន្តរជាតិដឹកនាំដោយសហរដ្ឋអាមេរិក តួកគីទំនងជាឆក់ឱកាសភ្លាម ស្នើទាមទារ ឱ្យបង្កើតតំបន់ស នៅតាមបណ្តោយព្រំដែនតួកគី-ស៊ីរី ដែលជាគម្រោងដ៏សំខាន់និងចង់បានជាយូរឆ្នាំមកហើយ ពោលតាំងពីសង្គ្រាមស៊ីវិលនៅស៊ីរីបានផ្ទុះឡើងភ្លាម។ ក៏ប៉ុន្តែគម្រោងបង្កើតតំបន់សដ៏ស្រពិចស្រពិល សម្រាប់ទទួលជនភៀសខ្លួន និងការពារព្រំដែនតួកគីនេះ ទំនងជាពិបាកសម្រេចកម្មវត្ថុបានណាស់ ដោយហេតុតែភាពស្មុគស្មាញតាមផ្លូវច្បាប់និងយោធា។
សម្រាប់អ្នកវិភាគមួយចំនួនធំ សំណើរបស់តួកគីនេះ គឺគ្រាន់តែជាលេសសម្រាប់ឱ្យអង់ការ៉ា បង្អូសពេលវេលា និងចំណេញពេល ចំណេញនយោបាយ កុំឱ្យតួកគីឆាប់បានចូលបំពេញកាតព្វកិច្ចប្រយុទ្ធប្រឆាំងនឹងអង្គការរដ្ឋអ៊ីស្លាម ដោយជាក់ស្តែងពេក។ អ្នកសង្កេតការណ៍មើលឃើញដូចៗគ្នា ថាតួកគី គ្មានបំណងពិតចង់ផ្តល់កិច្ចសហប្រតិបត្តិការអ្វី ក្រៅអំពីផ្តល់មូលដ្ឋានចាត់ចែងដល់ក្រុមសម្ព័ន្ធអន្តរជាតិ ក្នុងការប្រយុទ្ធកម្ទេចចលនាជីហាតរដ្ឋអ៊ីស្លាមនោះទេ។ ពីព្រោះ តួកគីខ្លាចណាស់ ! ខ្លាចក្រុមប្រយុទ្ធគៀរឌីស្ថាននៅស៊ីរី ដែលស្និទ្ធនឹងក្រុមគៀរឌីស្ថាននៅតួកគី យកចំណេញពីការវាយប្រហារផ្លូវអាកាសរបស់អាមេរិកនិងអារ៉ាបលើពួកអង្គការជីហាត។
ជួយសម្ព័ន្ធអន្តរជាតិ វាយពួកជីហាត ដូចជាជួយឱ្យក្រុមគៀរឌីស្ថានមានអំណាចឆ្លងព្រំដែន មានការទទួលស្គាល់នយោបាយដោយស្របច្បាប់កាន់តែខ្លាំងពីសំណាក់ក្រសែភ្នែកអាមេរិក និងអឺរ៉ុប។ ការប្តូរជំហររួមរួមជាមួយសម្ព័ន្ធមិត្តប្រឆាំងនឹងក្រុមភេរវនិយម ព្រោះមិនអាចគេចបាន ប៉ុន្តែមិនប្រាកដឡើយថាអាជ្ញាធរតួកគីមានចេតនាពិត និយាយហើយ ធ្វើសកម្មភាពជាក់ស្តែងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ