តួកគីអាចជាឆ្អឹងទទឹងករបស់សម្ព័ន្ធអន្តរជាតិដែលចង់ប្រយុទ្ធប្រឆាំងនឹងពួកជីហាតអ៊ីរ៉ាក់
ចុះផ្សាយនៅថ្ងៃ៖
ស្តាប់ - ០៥:១១
តាំងពីចុងសប្តាហ៍មុន សហរដ្ឋអាមេរិកបានប្រកាសប្រមែប្រមូលបានប្រទេសជាង ៤០ឲ្យចូលរួមក្នុងសម្ព័ន្ធអន្តរជាតិដើម្បីប្រយុទ្ធប្រឆាំងនឹងក្រុមជីហាតអ៊ីរ៉ាក់ រដ្ឋអ៊ីស្លាម ដែលរហូតមកដល់ពេលនេះកំពុងពង្រីកដែនគ្រប់គ្រងរបស់ខ្លួននៅក្នុងទឹកដីអ៊ីរ៉ាក់ និងស៊ីរី។ ប្រទេសអារ៉ាប់មួយចំនួន ដូចជាអារ៉ាប៊ី សាអូឌីត និងកាតាជាដើម បានសស្រាក់សស្រាំចូលរួមជាមួយអាមេរិក ដោយសារតែខ្លាចក្រុមជីហាតពង្រីកឥទ្ធិពល និងចូលទៅគំរាមកំហែងក្នុងប្រទេសខ្លួន។ ផ្ទុយពីប្រទេសពីរខាងលើ ប្រទេសតួកគីដែលមានព្រំដែនជាប់នឹងស៊ីរី និងអ៊ីរ៉ាក់បែរជាបង្ហាញការស្ទាក់ស្ទើរមិនសូវចង់ប្រលូកក្នុងប្រតិបត្តិការយោធារបស់អាមេរិកដើម្បីប្រយុទ្ធប្រឆាំងនឹងក្រុមជីហាត។ ហេតុអ្វីបានជាដូច្នេះ?
នៅថ្ងៃដែលសម្ព័ន្ធអារ៉ាប់ប្រកាសគាំទ្រយុទ្ធសាស្រ្តយោធារបស់អាមេរិកប្រឆាំងនឹងក្រុមជីហាតអ៊ីរ៉ាក់ រដ្ឋអ៊ីស្លាម នៅស៊ីរី និងនៅអ៊ីរ៉ាក់ រដ្ឋាភិបាលតួកគីវិញបានប្រកាសជាផ្លូវការថា ខ្លួននឹងមិនចូលរួមនៅក្នុងប្រតិបត្តិការយោធាដែលដឹកនាំដោយសហរដ្ឋអាមេរិកទេ។ ទីក្រុងអង់ការ៉ាបានសន្យាថា ខ្លួននឹងផ្តល់មូលដ្ឋានទ័ពឲ្យសម្ព័ន្ធអន្តរជាតិ ប៉ុន្តែ គេត្រូវប្រើប្រាស់វា ក្នុងក្របខ័ណ្ឌសកម្មភាពមនុស្សធម៌ និងការប្រមូលព័ត៌មាន ទាក់ទងនឹងសកម្មភាពរបស់ពួកជីហាតនៅស៊ីរី និងនៅអ៊ីរ៉ាក់។
ជាដំណឹងផ្លូវការ រដ្ឋាភិបាលតួកគីមិនចង់ប្រលូកខ្លួនចូលក្នុងប្រតិបត្តិការយោធារបស់អាមេរិកនៅអ៊ីរ៉ាក់ និងស៊ីរី ដោយសារតែតួកគីមិនចង់ប្រឈមមុខ តាំងខ្លួនជាសត្រូវរបស់ក្រុមជីហាត រដ្ឋអ៊ីស្លាម។ ទីក្រុងអង់ការ៉ាខ្លាចថា ក្រុមជីហាតអាច សម្លាប់ សងសឹក ប្រជាជនតួកគី ដែលក្រុមជីហាតកំពុងចាប់ជាចំណាប់ខ្មាំងក្នុងទឹកដីអ៊ីរ៉ាក់ ប្រសិនបើតួកគីចូលដៃជាមួយអាមេរិកដើម្បីវាយប្រហារទៅលើក្រុមជីហាត។
នេះជាហេតុផលផ្លូវការដែលរដ្ឋាភិបាលតួកគីលើកយកមកអះអាងដើម្បីបញ្ជាក់ពីជំហររបស់ខ្លួន មិនចង់ចូលរួមក្នុងប្រតិបត្តិការយោធារបស់អាមេរិកប្រឆាំងនឹងក្រុមជីហាត។ ប៉ុន្តែ បើតាមក្រុមអ្នកជំនាញតំបន់ដើមបូព៌ា មានហេតុផលសំខាន់ជាងនេះដែលធ្វើឲ្យទីក្រុងអង់ការ៉ា ស្ទាក់ស្ទើរ មិនចង់ចូលប្រយុទ្ធប្រឆាំងនឹងក្រុមជីហាតអ៊ីរ៉ាក់។ ទីមួយ គឺហេតុផលនយោបាយ និងឥទ្ធិពលសាសនានៅក្នុងតំបន់។ រដ្ឋាភិបាលតួកគីមិនចង់ផ្តល់ទីតាំង ដល់ក្រុមសម្ព័ន្ធអន្តរជាតិ ឬក៏បំពាក់អាវុធដល់ក្រុមប្រឆាំងស៊ីរី ដើម្បីប្រយុទ្ធប្រឆាំងនឹងក្រុមជីហាត ព្រោះតែតួកគីភ័យខ្លាចថា អាវុធរបស់ខ្លួន និងសព្វាវុធរបស់សម្ព័ន្ធអន្តរជាតិធ្លាក់នៅក្នុងដៃរបស់ក្រុមគៀរឌីស្ថានស៊ីរី ឬក្រុមគៀរឌីស្ថានតួកគី ដែលពេលនេះ កំពុងកៀកស្មាជាមួយក្រុមប្រឆាំងស៊ីរី និងប្រយុទ្ធតទល់នឹងក្រុមជីហាតអ៊ីរ៉ាក់។ សម្រាប់រដ្ឋាភិបាលតួកគី ក្រុមគៀរឌីស្ថានតួកគី ជាសត្រូវគំរាមកំហែងអំណាចរបស់ខ្លួន នៅក្នុងប្រទេស។ ដូច្នេះ ទីក្រុងអង់ការ៉ាគ្មានហេតុផលអ្វីដែលត្រូវប្រយុទ្ធប្រឆាំងនឹងក្រុមជីហាត ដែលរហូតមកកំពុងជួយទប់ទល់អំណាចរបស់ក្រុមគៀរឌីស្ថាន ដែលជាសត្រូវក្នុងស្រុករបស់ខ្លួនទេ។ និយាយពីនិកាយសាសនាវិញ តួកគីមានសំបូររស់នៅដោយក្រុមនិកាយស៊ុននីត ដែលរហូតមកដល់ពេលនេះកំពុងចូលរួមប្រយុទ្ធច្រើននៅក្នុងជួរក្រុមជីហាតអ៊ីរ៉ាក់។
ទីពីរទៀត ការណ៍ដែលតួកគីមិនព្រមចូលរួមយ៉ាងសកម្មដើម្បីកាត់បន្ថយអំណាចរបស់ក្រុមជីហាតអ៊ីរ៉ាក់ ក៏ដោយសារតែតួកគីបានទទួលប្រយោជន៍សេដ្ឋកិច្ចមិនតិចទេ ចាប់តាំងពីវិបត្តិ អសន្តិសុខកើតមាននៅក្នុងប្រទេសស៊ីរី និងអ៊ីរ៉ាក់ ក្នុងរយៈពេលបីឆ្នាំចុងក្រោយនេះ។ ក្រុមជីហាតអ៊ីរ៉ាក់ដែលវាយដណ្តើមយកបានទីក្រុងសំបូរប្រេងមួយចំនួនរបស់ស៊ីរី និងនៅអ៊ីរ៉ាក់បានលក់ប្រេងឆៅក្នុងតម្លៃថោកទៅឲ្យតួកគី។ អាមេរិក និងក្រុមប្រទេសសម្ព័ន្ធមិត្តផ្សេងទៀត បានចោទតួកគីក្នុងនាមជាអ្នកទិញប្រេងដ៏សំខាន់ពីក្រុមជីហាតអ៊ីរ៉ាក់ ថា ជាអ្នកផ្គត់ផ្គង់ ជួយធ្វើឲ្យក្រុមនេះសំបូរលុយ យកទៅទិញអាវុធដើម្បីបង្កវិនាសកម្មសម្លាប់មនុស្ស នៅអ៊ីរ៉ាក់ និងនៅស៊ីរី។
ប្រទេសនៅអឺរ៉ុបជាច្រើន ក៏បានចោទប្រកាន់រដ្ឋាភិបាលទីក្រុងអង់ការ៉ាផងដែរ ថា ធូររលុងធ្មេចភ្នែក អនុញ្ញាតឲ្យជនបរទេស ប្រើប្រាស់ទឹកដីរតួកគី ដើម្បីឆ្លងដែនចូលប្រយុទ្ធជាមួយក្រុមជីហាត ក្នុងទឹកដីស៊ីរី។ តួកគី បិទភ្នែកឲ្យយុវជនបរទេសចូលទៅប្រយុទ្ធជាមួយក្រុមជីហាត នៅទឹកដីស៊ីរី ដោយសារតែតួកគីចង់ឃើញរបបលោកបាស្ហា អាល់អាសាដដួលរលំដោយដៃក្រុមជីហាត។
សម្រាប់សម្ព័ន្ធអន្តរជាតិ និងអាមេរិក តួកគីដើរតួនាទីយ៉ាងសំខាន់ ដើម្បីកាត់បន្ថយឥទ្ធិពល មហាអំណាចរបស់ក្រុមជីហាតអ៊ីរ៉ាក់។ គេអាចកាត់បន្ថយទាំងថវិកា និងសមាជិករបស់ក្រុមជីហាតអ៊ីរ៉ាក់ ប្រសិនបើតួកគីយល់ព្រមបិទព្រំដែន ឈប់ឲ្យក្រុមជនបរទេសចូលទៅប្រយុទ្ធនៅទឹកដីស៊ីរីជាមួយក្រុមជីហាត និងបំបាត់ចោលទីផ្សារងងឹតដែលលក់ប្រេងខុសច្បាប់របស់ក្រុមជីហាត។ យោងតាមប្រធានវិទ្យាស្ថានថាមពលអ៊ីរ៉ាក់ តែនៅក្នុងប្រទេសអ៊ីរ៉ាក់មួយ ក្រុមជីហាតដែលបានបូមប្រេង នៅក្នុងតំបន់កាន់កាប់របស់ខ្លួនយកទៅលក់នៅផ្សារងងឹតក្នុងប្រទេសតួកគី អាចរកប្រាក់បានជិត ២លានដុល្លារក្នុងមួយថ្ងៃៗ។
ដោយសារតែការដាក់គំនាបខ្លាំងពីប្រទេសសម្ព័ន្ធមិត្ត ជាពិសេសអឺរ៉ុប តួកគីបានពង្រឹងការត្រួតពិនិត្យ នៅតាមព្រំដែនជាមួយប្រទេសស៊ីរី និងបានចាប់ឃាត់ខ្លួនយុវជនបរទេសជាច្រើនរយនាក់ដែលចង់ឆ្លងដែនចូលទៅក្នុងប្រទេសស៊ីរី តាមរយៈទឹកដីតួកគី។ តួលេខហាក់បង្ហាញថា តួកគីបានចូលរួមទប់ស្កាត់កុំឲ្យក្រុមជីហាតរើសបានក្រុមប្រយុទ្ធថ្មី ប៉ុន្តែ តាមសេចក្តីរាយការណ៍របស់កាសែតក្នុងស្រុក កាលពីចុងខែមុននេះ គេនៅឃើញនៅឡើយ ជំរំហ្វឹកហ្វឺនមួយរបស់ក្រុមអ៊ីស្លាមជ្រុលនិយម ដែលជាសមាជិករបស់ក្រុមជីហាតអ៊ីរ៉ាក់ នៅក្នុងទឹកដីតួកគី។
ដោយសារប្រយោជន៍សេដ្ឋកិច្ច និងផលចំណេញភូមិសាស្ត្រនយោបាយ ដែលបានមកពីវត្តមានរបស់ក្រុមជីហាតនៅអ៊ីរ៉ាក់ និងនៅស៊ីរី តួកគីអាចមិនងាយលះបង់ចោលល្បែងយុទ្ធសាស្រ្តរបស់ខ្លួន គឺការគាំទ្រក្រុមជីហាត។ ដូច្នេះ យុទ្ធសាស្រ្តប្រយុទ្ធប្រឆាំងនឹងក្រុមជីហាត រហូតធ្វើឲ្យក្រុមនេះត្រូវបំផ្លាញទាំងស្រុងរបស់លោកអូបាម៉ាអាចនឹងត្រូវការ ពេលវេលាវែង ព្រោះថា សម្ព័ន្ធមិត្តរបស់អាមេរិកនៅក្នុងអង្គការអូតង់ហាក់មិនចង់ចូលរួមជាមួយអាមេរិកប៉ុន្មានទេ។ តាមការប៉ាន់ស្មានរបស់លោកប្រធានាធិបតីអាមេរិក គេអាច ត្រូវការពេលយ៉ាងតិច ៣ឆ្នាំ ដើម្បីប្រយុទ្ធប្រឆាំងនឹងក្រុមជីហាតអ៊ីរ៉ាក់ រដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ