កម្ពុជា -

អត្ថបទចុះផ្សាយនៅថ្ងៃ ចន្ទ 08 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 08 តុលា 2012

ពីរសប្តាហ៍ ស្លាប់៩នាក់ដោយសារមីននៅបាត់ដំបង

ដោយ លាង ដឺលុច

ពលរដ្ឋអ្នកចំការ៣នាក់ទៀតបានស្លាប់នៅក្នុងហេតុការណ៍ផ្ទុះមីនប្រឆាំងរថក្រោះកាលពីថ្ងៃអាទិត្យម្សិលមិញនៅក្នុងស្រុកសំឡូតខេត្តបាត់ដំបង។ នេះជាហេតុការណ៍សោកនាដកម្មមួយថ្មីទៀត បន្ទាប់ករណីផ្ទុះមីនតោនបានសម្លាប់មនុស្ស៦នាក់កាលពីសប្តាហ៍មុននៅក្នុងតំបន់ពាយព្យនៃខេត្តបាត់ដំបង។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:49)

08/10/2012 by លាង ដឺលុច

បុរស៣នាក់នៅក្នុងគ្រួសារតែមួយបានស្លាប់ភ្លាមៗនៅក្នុងឧប្បត្តិហេតុផ្ទុះគ្រាប់មីនប្រឆាំងរថក្រោះមួយកាលពីថ្ងៃអាទិត្យម្សិលមិញ នេះបើតាមការអះអាងរបស់អាជ្ញាធរមូលដ្ឋាន។ ទីភ្នាក់ងារព័ត៌មានបារាំងAFP បានស្រង់សម្តីមន្ត្រីយោធាប្រចាំស្រុកសំឡូតដែលនិយាយហេតុការណ៍ផ្ទុះគ្រាប់មីនបានកើតឡើងនៅពេលដែលមានភ្លៀងធ្លាក់ខ្លាំង ហើយក្រុមគ្រួសារជនរងគ្រោះបានបើកគោយន្តដឹកពោត ហើយបានកិនគ្រាប់មីនតោននៅក្នុងដី។ អ្នកដែលស្លាប់មានអាយុ ១៧ឆ្នាំ ១៩ឆ្នាំ និង៣០ឆ្នាំ។ ក្រៅពីមានមនុស្សស្លាប់៣នាក់ មនុស្ស២នាក់ទៀតក៏កំពុងមានរបួសធ្ងន់ផងដែរ។

ករណីកិនមីនតោនបានកើតឡើងក្នុងរយៈពេល២សប្តាហ៍ជាប់គ្នានៅក្នុងស្រុកសំឡូតតែមួយ។ កាលពីសប្តាហ៍មុន គោយន្តដឹកមនុស្សបានកិនគ្រាប់មីនដែលបានបង្កអោយមានមនុស្សស្លាប់រហូតដល់៦នាក់ផងដែរ។ សំឡូតត្រូវបានស្គាល់ថា ជាអតីតសមរភូមិសង្គ្រាមរវាងរដ្ឋាភិបាល និងអតីតទាហានខ្មែរក្រហមក្នុងទស្សវត្សរ៍៨០ និង៩០។

លោកឡេង សុជា អនុប្រធានក្រុមប្រឹក្សាភិបាល CMAC បានអត្ថាធិប្បាយអោយដឹងថា តួលេខនៃករណីគ្រោះថ្នាក់ដោយគ្រាន់មីនប្រឆាំងរថក្រោះបានកើនឡើងក្នុងរយៈពេលចុងក្រោយនេះ បន្ទាប់ពីប្រជាជនអ្នកចំការមាននិន្នាការប្រើប្រាស់គ្រឿងយន្តសម្រាប់ដឹកជញ្ជូនកាន់តែច្រើន។ ការប្រើប្រាស់គ្រឿងយន្ត ជាពិសេសនៅក្នុងរដូវភ្លៀងដែលដីមានសភាពជ្រាយ បានធ្វើអោយទំងន់គ្រឿងយន្តបានធ្លាក់ដល់កន្លែងដែលមានមីនប្រឆាំងរថក្រោះស្ថិតនៅ។

បើទោះជាករណីគ្រោះថ្នាក់ដោយគ្រាន់មីនប្រឆាំងរថក្រោះ ឬមីនតោនបានកើនឡើង លោកឡេង សុជាអះអាងថា ចំនួនគ្រោះថ្នាក់ដោយសារគ្រាប់មីន ជាទូទៅ បានធ្លាក់ចុះជារៀងរាល់ឆ្នាំ។ យោងតាមរបាយការណ៍ស្តីពីគ្រាប់មីន ក្នុងឆ្នាំ២០១១កន្លងទៅ គ្រាន់មីន និងគ្រាប់មិនទាន់ផ្ទុះបានសម្លាប់ពលរដ្ឋខ្មែរ៤៣នាក់ ធ្វើអោយរបួស១៦៨នាក់ និងបង្កអោយពិការ៣៣នាក់៕