ស្ថានភាពវិបត្តិនុយក្លេអ៊ែរ នៅជប៉ុនមានការប្រសើរទៅមុខ ប៉ុន្តែយឺត
ចាប់តាំងពីថ្ងៃព្រហស្បតិ៍ ទី ១៧ មីនា គេមិនឃើញមានករណីផ្ទុះ និងភ្លើងឆេះ នៅម៉ាស៊ីនប្រតិកម្ម នៅរោងចក្រអគ្គិសនី ដើរដោយថាមពលនុយក្លេអ៊ែរ Fukushima។ សម្រាប់អ្នកជំនាញនុយក្លេអ៊ែរជប៉ុន នេះជាសញ្ញាល្អមួយ បន្ទាប់ពីបានខិតខំយកទឹកទៅស្រោចចាក់ម៉ាស៊ីនប្រតិកម្មវិបត្តិនុយក្លេអ៊ែរ។ ក្តីសង្ឃឹមជៀសផុតពីគ្រោះថ្នាក់ផ្ទុះរោងចក្រនុយក្លេអ៊ែរ ត្រូវបានគេមើលឃើញជាបណ្តើរៗហើយ នៅថ្ងៃនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ឈាង បុប្ផា
គ្មានគ្រោះថ្នាក់ផ្ទុះ ឬភ្លើងឆេះ នៅរោងចក្រនុយក្លេអ៊ែរ Fukushima នៅប៉ុន្មានថ្ងៃនេះ បានធ្វើឲ្យអាជ្ញាធរជប៉ុនសង្ឃឹមថា នឹងមានឱកាសស្តារម៉ាស៊ីនប្រតិករឲ្យដំណើរការឡើងវិញ។ អ្វីដែលអាជ្ញាធរជប៉ុននៅបន្ត ប្រញឹកដៃធ្វើ គឺប្រើទឹកចាក់ និងបាញ់ពីខាងក្រៅទៅលើម៉ាស៊ីនប្រតិកម្មទាំងបួន។
ហើយ ជាលើកទីមួយ នៅថ្ងៃម្សិលមិញ ឧទ្ធម្ភាគចក្រយោធាជប៉ុន បួនគ្រឿងបានចេញប្រតិបត្តិការ ទៅជួយដឹកទឹកដើម្បីចាក់ស្រោចលើម៉ាស៊ីនប្រតិកម្ម។ ឡានដឹកទឹក នៅបន្តសម្រុកបាញ់ទឹកទៅលើអគារមាស៊ីនប្រតិករទាំងបួន ដែល កាលពីប៉ុន្មានថ្ងៃនេះ ជួបបញ្ហាផ្ទុះ និងភ្លើងឆេះ។
ការប្រើឧទ្ធម្ភាគចក្រដើម្បីស្រោចទឹកពីលើ និងឡានបាញ់ទឹក ជាជម្រើសថ្មីមួយ បន្ទាប់ពីប្រព័ន្ធរក្សាកំដៅសីតុណ្ហភាពម៉ាស៊ីនប្រតិករ ឆេះខូច រួមផ្សំនឹងម៉ាស៊ីនភ្លើងដែលខូចធ្ងន់ធ្ងរដោយសារគ្រោះរញ្ជួយដី កាលពីថ្ងៃសុក្រ សប្តាហ៍មុន។ គេត្រូវការចាំបាច់បំផុត ទឹកត្រជាក់ ដើម្បីរក្សាកំដៅស្នូលម៉ាស៊ីនប្រតិកម្ម កុំឲ្យខ្ពស់ពេក ព្រោះ បើស្នូលដែលមានផ្ទុកអ៊ុយរ៉ានីញ៉ូមក្តៅពេក វាអាចផ្ទុះ បញ្ចេញសារធាតុវិទ្យុសកម្ម នោះមកក្រៅ។ គេត្រូវដឹងថា ស្នូលនុយក្លេអ៊ែររបស់ម៉ាស៊ីនប្រតិករមួយៗ មានកំដៅមិនតិចជាង ២០០០អង្សារទេ។
នៅថ្ងៃនេះ អ្នកជំនាញនុយក្លេអ៊ែរជប៉ុននិយាយថាពេលនេះគេកំពុងផ្តោតការងារចំបង និងស្រោចទឹកជាអចិន្ត្រៃយ៍ ទៅលើម៉ាស៊ីនប្រតិកម្មទីបី ដែលមានស្ថានភាពយ៉ាប់ ជាងគេ ពីព្រោះ ខុសពីម៉ាស៊ីនប្រតិកម្មទីមួយ ទីពីរ និងទី បួន អាងស្តុកទឹកត្រជាក់សម្រាប់រក្សាកំដៅស្នូលនុយក្លេអ៊ែរដែលប្រើរួចហើយ របស់ម៉ាស៊ីនប្រតិកម្មទីបីបានបាក់បែកខូចខាត ដោយសារការផ្ទុះ កាលពីប៉ុន្មានថ្ងៃមុន។
បិទគ្របម៉ាស៊ីនប្រតិកម្មឲ្យជិត?
អាជ្ញាធរជប៉ុន បានបញ្ជាក់ថា គេមិនបានបោះបង់ចោលគំនិតដែលថា នឹងកប់ម៉ាស៊ីនប្រតិកម្ម ដូចកាលគេបានធ្វើនៅរោងចក្រនុយក្លេអ៊ែរ Tchernobyl នៅអ៊ុយក្រែននោះទេ (Sacophage Tchernobyl)។ កាលណោះ បន្ទាប់ពីរោងចក្រនុយក្លេអ៊ែរផ្ទុះ គេបានបោះ បាវដីខ្សាច់រាប់ពាន់ រាប់ម៉ឺនទៅក្នុងម៉ាស៊ីនប្រតិកម្មដើម្បីទប់កុំឲ្យសារធាតុវិទ្យុសកម្មសាយភាយចេញមកក្រៅ។ បន្ទាប់មក គេបានសង់គម្រប Sacophage មួយធ្វើពីបេតុង និងដែកកម្រាស់ក្រាសឃ្មឹក ដើម្បីដាក់គ្របបិទម៉ាស៊ីន កុំឲ្យមានផ្ទុះសាយភាយសារធាតុវិទ្យុសកម្មចេញមកក្រៅ។
ក្នុងករណីជប៉ុន នេះ អ្នកជំនាញនុយក្លេអ៊ែរបាននិយាយថា ជម្រើសនេះធ្លាប់បានត្រូវគេគិតទុករួចហើយ។ គឺគេគ្រោងនឹងសង់ប្រអប់បិទជិតធ្វើពីបេតុង ដាក់គ្របពីលើម៉ាស៊ីនប្រតិកម្ម។ នេះ គឺជាជម្រើសចុងក្រោយបំផុតដើម្បីជៀសវាងគ្រោះមហន្តរាយដែលបណ្តាញមកពីការលេចចេញសារធាតុវិទ្យុសកម្ម។
ទោះជាយ៉ាងណា អាទិភាពរបស់ពួកគេ ពេលនេះ គឺបន្ថយកំដៅរបស់ស្នូលម៉ាស៊ីនប្រតិកម្មទាំងបួន កុំឲ្យវាផ្ទុះ។ ក្នុងខណៈនេះ ក្រុមហ៊ុនTEPCO ដែលជាម្ចាស់រោងចក្រនុយក្លេអ៊ែរ Fukushima កំពុងរៀបចំ ជួសជុល តបណ្តាញ យកអគ្គិសនីពីសុ្រកជិតខាង ដើម្បីយកមកផ្គត់ផ្គង់ ដាក់ឲ្យដំណើរការម៉ាស៊ីនបូមទឹកនៅម៉ាស៊ីនប្រតិកម្មទាំងបួន។
អាជ្ញារជឿជាក់ថា យ៉ាងហោចណាស់ ម៉ាស៊ីនប្រតិកម្មពីរ នឹងមានថាមពលអគ្គិសនីឡើងវិញ នៅយប់ថ្ងៃសុក្រទី ១៨មីន ហើយ ម៉ាស៊ីនបួនទៀត នឹងមានថាមពលអគ្គិសនី អាចបូមទឹកខ្លួន ឯង ចាប់ពីថ្ងៃអាទិត្យ ទី ២០ មីនានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ